Elite Life Fair  պրեմիում դասի ապրանքանիշերի ցուցահանդեսում, որը մեկնարկեց հունիսի 26-ին երեւանյան Golden Palace հյուրանոցային համալիրում, “Մուրան” ընկերությունը ներկայացրեց ճապոնական արտադրության Infiniti մակնիշի ավտոմեքենաները:

Շքեղ մեքենաներն էլ էլիտար կյանքի մաս են կազմում: “Մուրանը” անակնկալ մատուցեց ներկաներին` ցուցադրելով հանդիսատեսի մեծամասնության համար բացարձակ նորույթ` Infiniti FX50 շքեղ մեքենան: Այն համապատասխանում է բոլոր այն չափանիշներին, որոնք պետք է ունենա ժամանակակից շքեղ մեքենան:

“Պետք է ցանկանաս ավտոմեքենան, - ասաց ցուցահանդեսի հաղորդավարուհի Գայանե Ասլամազյանը,- համաձայն չեմ, որ այս մեքենան միայն իսկական տղամարդկանց համար է”:

Նրբաճաշակ հաղորդավար Արամ Չախոյանն էլ հաստատեց, որ Infiniti-ն առանձնանում է unisex մեքենաների արտադրությամբ, եւ գեղեցիկ կդիտվի, եթե այն վարեն նաեւ կանայք:

Ի դեպ, Elite Life Fair-ի ժամանակ ներկայացված Infiniti EX35 ավտոմեքենաներից մեկը գտավ իր գնորդին: Սարգիս Վարդանյանին հյուրերը անփորձանք երթեւեկություն մաղթեցին:

Elite Life Fair ցուցահանդեսում ներկայացված էին եւս մի քանի համաշխարհային հանրահայտ ավտոմոբիլային բրենդեր, այդ թվում շվեդական Volvo-ն` իր XC60 եւ S80 մոդելներով, անգլիական Land Rover-ը` իր Range Rover-ով: Ցուցահանդեսում ներկա էր նաեւ գերմանական Porsche-ը` Cayenne ամենագնացով եւ Հայաստանում առաջին անգամ պաշտոնապես ներկայացված հանրահայտ 911 մոդելով: