Հայաստանում Chevrolet ընկերության ներկայացուցիչ “Վեկար” ընկերությունը հայտարարել է նորացված Chevrolet Niva ավտոմեքենաների վաճառքի մեկնարկի մասին:

Ինչպես Auto.am-ին հայտնեցին “Վեկար" ընկերության մամուլի ծառայությունում, փոփոխությունների են ենթարկվել ինչպես ավտոմեքենայի ինտերյերը, այնպես էլ արտաքինը:  Նորացված Chevrolet Niva-ի ոճի եւ պլաստիկ էլեմենտների կառուցվածքի մշակմամբ զբաղվել է իտալական Bertone ընկերությունը, իսկ ինտերյերի եւ էքստերյերի պլաստիկ էլեմենտների համար սարքավորումները պատրաստվել են նույնպես իտալական Tecno ISA եւ HCM ընկերությունների կողմից: Ավտոմեքենան առաջարկվում է L, GLS եւ GLC (կոնդիցիոներով) տարբերակներով:

Իսկ այժմ ավելի մանրամասն պատմենք մեքենայի արտաքինում տեղի ունեցած փոփոխությունների մասին: Ռադիատորի ցանցը` խոշորացված Chevrolet նշանով, ինտեգրված է առջեւի բամպերի հետ, որի հետեւանքով բացակայում է անցքը ցանցի եւ բամպերի միջեւ, ինչը ամբողջականություն է հաղորդում մեքենայի արտաքինին դիմացից, համապատասխանելով Chevrolet ավտոմեքենաների ոճին: Հայտնվել են անիվային կամարների կողային մասեր, որոնք հնարավորինս պաշտպանում են երթեւեկության այլ մասնակիցներին քարերից, կեղտից, սառույցից եւ այլն: GLS կոմպլեկտացիայում դրանք ներկված են թափքի գույնով: Պլաստիկ էլեմենտները դռների վրա ավելի մեծ մակերեսով պաշտպանում են դռների մետաղը վնասվածքներից: GLS կոմպլեկտացիայում դրանք կրկին ներկված են թափքի գույնով եւ բարելավում են մեքենայի արտաքինը:

Ետեւի բամպերն ունի երկու օդափոխիչ ցանցեր աջից եւ ձախից, որոնք ունեն հետադարձ կլապաններ եւ նպաստում են օդի մղմանը սրահից: Արդյունքում բարելավվում է օդափոխանակությունը ավտոմեքենայի սրահում եւ նվազում է ապակիների քրտնելը: Էքստերյերի բոլոր պլաստիկ էլեմենտները պատրաստված են ռեզինի բարձր պարունակությամբ պոլիպրոպիլենից, որն ապահովում է ավելի մեծ պաշտպանվածություն հատկապես ցածր ջերմաստիճանի ժամանակ: Automotive Lighting ընկերության արտադրության լուսարձակները ունեն բարելավված լուսատեխնիկական բնութագրեր:

GLS կոմպլեկտացիայում առկա են հետեւյալ տարբերությունները. թափքի գույնով ներկված դռան բռնակներ, ետեւի տեսքի արտաքին հայելիներ` նույնպես թափքի գույնի: Ավտոմեքենայի 16-դյույմանի անիվային սկավառակները ստացել են նոր դիզայն, որի մեջտեղում առկա է Chevrolet նշանը: 

Այժմ ավտոմեքենայի ներսում տեղի ունեցած փոփոխությունների մասին: GLS կոմպլեկտացիայում կենտրոնական սյունին տեղադրված է լրացուցիչ ռեզինե բաղադրիչ, որը բարձրացնում է ձայնամեկուսացումը եւ պաշտպանում է սրահը, կողպեքների եւ դռների մեխանիզմները կեղտից, փոշուց եւ խոնավությունից: Պորտուգալական TRW ընկերության եռաշուղ ղեկը նույնացված է OPEL ընկերության արտադրանքին եւ թույլատրում է հետագայում վարորդի անվտանգության բարձիկի ներդրումը: Ետեւի տեսադաշտի ներսրահային հայելին եւս նույնացված է OPEL ընկերության արտադրանքի հետ եւ ամրացվում է ապակուն, ինչը վերացնում է վիբրացիան ավտոմեքենայի շարժման ժամանակ: Փոխանցման տուփի եւ բաշխման տուփի բռնակոթերն ավելի էրգոնոմիկ են դարձել, իսկ GLS կոմպլեկտացիայում ունեն նաեւ ալյումինին նմանվող էլեմենտներ: Կոնսոլն ունի նոր ձեւ, նրա վրա են տեղափոխված արտաքին հայելիների եւ նստատեղերի տաքացման կառավարման բլոկները: Հատակի խալին, որն ինտեգրված է ձայնամեկուսացման հետ, թույլ է տալիս նվազեցնել աղմուկը առջեւի շարքի նստարաններում 12%-ով, իսկ ետեւի շարքի նստարաններին` 26%-ով:

Ինչպես երեւում է վերը նշվածից, Chevrolet Niva-ն շատ ավելի գրավիչ եւ հարմարավետ է դարձել, եւ անկասկած հետաքրքրություն կառաջացնի մեր ավտոսիրողների մոտ: “Վեկար” ընկերությունը տեղեկություններ է տրամադրել Auto.am-ին նաեւ ավտոմեքենայի գների մասին. Chevrolet Niva-ն L կոմպլեկտացիայում հայ ավտոսիրողներին առաջարկվում է 6 450 000 դրամով, GLS կոմպլեկտացիայում` 6 950 000 դրամով, իսկ կոնդիցիոներով GLC կոմպլեկտացիայի գինը կազմում է 7 400 000 դրամ: