Volkswagen-ն ավարտում է նոր առջեւի քարշակային պլատֆորմի մշակումները, որն առայժմ կրում է MQB - Modularen QuerBaukasten կամ “մոդուլային պլատֆորմ` շարժիչի լայնակի տեղադրմամբ” կոդային անվանումը: Ինչպես հաղորդում է բրիտանական Autocar ամսագիրը, պլատֆորմի բազայի վրա գերմանական կոնցերնը նախատեսում է կառուցել մոտ 60 ավտոմեքենա` VW, Skoda, Seat եւ Audi մակնիշենրի համար:.

Նախատեսվում է, որ նոր պլատֆորմը կփոխարինի VW-ի կողմից օգտագործվող միանգամից 3 բազային համակարգերը` PQ2, PQ3 եւ PQ4: VW-ի դիզայնի եւ մշակումների դեպարտամենտի ղեկավար Ուլրիխ Հակենբերգի խոսքերով, դրա հիմքի վրա հնարավոր կլինի արտադրել ավտոմեքենաներ անիվային բազայի տարբեր երկարություններով, ներառյալ կաբրիոլետներ, ամենագնացներ, մինիվեններ եւ հիբրիդային ավտոմեքենաներ:

Autocar ամսագրի տվյալներով, նոր պլատֆորմի մեկնարկը կկայանա հաջորդ սերնդի Audi A3-ի մոդելի վրա, որը շուկայում կհայտնվի 2011 թվականին: Այլ տվյալներով, առաջինը նոր պլատֆորմը կարող է ստանալ միջին չափի Volkswagen սեդանը, որը մշակվում է հատուկ Հյուսիսային Ամերիկայի շուկայի համար` որպես  VW Passat մոդելի փոխարինող: