Bugatti-ն Ժնեում ներկայացրեց 4-դռնանի 16C Galibier կոնցեպտուալ սուպերսեդանը: Նրա սերիական տարբերակը, որը թողարկվելու է սահմանափակ քանակությամբ (մոտ 150 օրինակ), լինելու է աշխարհի ամենաարագ եւ ամենաթանկ սեդանը: 16C Galibier-ի առավելագույն արագությունը կազմում է 350 կմ/ժ: Առաջին հաշվարկներով 16C-ի գները սկսվելու են 1,5 մլն եվրոյից:
Կոնցեպտուալ Galibier-ը ստացել է 800 ուժանոց 8-լիտրանոց W-աձեւ 16-մխոցանի շարժիչ Veyron-ից: Այստեղ չորս տուրբոկոմպրեսորների փոխարեն կիրառված են մեխանիկական ուժեղացուցիչներ:
Ավտոմեքենայի ինտերյերը շքեղության գագաթնակետն է: Կարամելագույն նուրբ կաշի, խրոմ, փայտի արժեքավոր սորտեր: Զարգացած մուլտիմեդիա… Իսկ թագը շվեյցարական Parmigiani Fleurier ժամացույցն է տուրբիյոնով եւ ավտոմատ լարման համակարգով: Ցանկացած պահին մեխանիզմը կարելի է հանել դիմային պանելից, տեղադրել հատուկ կորպուսում եւ կրել ձեռքի վրա: Այսպիսով, 16C Galibier-ը ապագայում հավակնելու է ոչ միայն ամենաթանկարժեք սեդանի դերին, այլեւ ժամացույցի համար ամենաթանկ տուփի դերին:
