Cerberus Capital Management մասնավոր ներդրումային հիմնադրամը բանակցություններ է վարում ֆրանսիական ավտոարտադրող Renault-ի եւ ամերիկյան General Motors ընկերության հետ` Chrysler կոնցերնի մասնակի կամ լրիվ վաճառքի մասին: Այս մասին հաղորդում է Reuters-ը` վկայակոչելով իրավիճակին ծանոթ չնշված աղբյուրներին:

Renault ընկերությունը, առաջին հերթին, հետաքրքրվում է Jeep բրենդի ձեռքբերմամբ: Այսպիսով, Renault մտադիր է վերադարձնել վերահսկողությունը այս մակնիշի նկատմամբ, որին American Motors կորպորացիայի հետ համատեղ վաճառել էր Chrysler-ին 1987 թվականին: Իր հերթին, GM-ը Chrysler-ի լրիվ ձեռքբերման փոխարեն կարող է ձեռք բերել ամերիկյան կոնցերնի ակիվների միայն մի մասը, օրինակ, մինիվենների արտադրության ձեռնարկությունները եւ Մեքսիկայում գտնվող` բեռնատար ավտոմեքենաների արտադրության գործարանները:

Cerberus եւ GM բանակցությունների ընթացքում քննարկվում է նաեւ Կրայսլերի կողմից General Motors-ի ֆինանսական ստորաբաժանման` GMAC-ի մնացած 49 տոկոս բաժնետոմսերի ձեռքբերման հնարավորությունը: Վարկածներից մեկի համաձայն, GM կարող է փոխարինել GMAC-ում իր բաժնեմասը Chrysler-ի որոշ ակտիվներով: Բացի այդ, Cerberus-ը նախատեսում է ազատվել Mopar ընկերությունից եւ Chrysler Financial ֆինանսական բաժանմունքից: Ինչպես նշում են Reuters-ի աղբյուրները, տվյալ պահին Cerberus-ին ավելի ձեռնտու է առանձին-առանձին վաճառել իր ակտիվները: Իրացնելով դրանք իրարից առանձին, Chrysler-ի սեփականատերը կարող է շատ ավելի մեծ միջոցներ ստանալ, քան եթե վաճառի դրանք միասին:

Հարկ է ավելացնել, որ բանակցություններին եւ Chrysler-ի ակտիվների գնահատմանն այժմ խանգարում են անկայունությունը համաշխարհային ֆինանսական շուկաներում եւ վարկային գծերի անմատչելիությունը: