Chevrolet Volt հիբրիդը ծախսելու է 1 լիտր բենզին 100 կմ ճանապարհի վրա

Chevrolet Volt “միացվող հիբրիդի” վառելիքի ծախսը քաղաքային ռեժիմում կկազմի 1 լիտրից փոքր-ինչ ավելին 100 կմ ճանապարհի վրա, ինչը մոտավորապես 4 անգամ քիչ է, քան Toyota Prius ավտոմեքենայի մոտ: Այս մասին հաղորդում է Bloomberg գործակալությունը:

Նախնական տվյալներով, Chevrolet Volt-ի վառելիքային տնտեսելիության պաշտոնական տվյալները կհայտարարվեն General Motors-ի գործադիր տնօրեն Ֆրիտց Հենդերսոնի կողմից օգոստոսի 11-ին` կոնցերնի Ուորեն (Միչիգան) քաղաքում գտնվող տեխնիկական կենտրոնում նոր ավտոմեքենաների ցուցահանդեսի ժամանակ: Ակնկալվում է, որ Հենդերսոնը կխոսի խառը ցիկլում վառելիքի ծախսի մասին, որը կգտնվի 2,35 լիտրի մակարդակում` 100 կմ վազքի համար:

Chevrolet Volt գործի է դրվելու 150 ձիաուժ հզորությամբ էլեկտրաշարժիչի օգնությամբ, որը էներգիա է ստանալու լիտիյ-իոնային մարտկոցներից, որը կայանման ժամանակ կարելի է լիցքավորել սովորական վարդակից: Շարժման ժամանակ մարտկոցների լիցքավորման համար կօգտագործվի 1,4-լիտրանոց բենզինային շարժիչը: Բացառապես էլեկտրականությամբ մեքենան կարող է գնալ մոտ 64 կիլոմետր:

Ինչպես հաղորդվում էր նախկինում, օրեկան մոտ 100 կմ վազքի դեպքում նման ավտոմեքենայի սեփականատերը կարող է տնտեսել տարեկան մինչեւ 2100 լիտր բենզին: Բացի այդ, GM տվյալներով, 220 Վոլտանոց տնային վարդակից մեքենայի լիցքավորման դեպքում հիբրիդը տարեկան կծախսի ոչ ավել էլեկտրականություն, քան կեցնաղային սառնարանը:

Chevrolet Volt-ի վաճառքներն ԱՄՆ-ում կսկսվեն 2010 թվականի նոյեմբերին: Այս հիբրիդի արժեքը կկազմի մոտ 40 հազար դոլար:

Facebook Odnoklassniki

4183 դիտում