b x a .

Գարնան ընթացքում, հավանաբար, մայիս ամսին կսկսվեն Renault մակնիշի ամենավաճառվող մոդելներից մեկի` Նոր Renault Logan-ի հայաստանյան վաճառքները:

Եվ այսպես, ի՞նչ է փոխվել այս մի գուցե ոչ շատ գեղեցիկ, բայց պրակտիկ ու մատչելի ավտոմեքենայում, որը շատ հաճախ ենք տեսնում Երեւանի փողոցներում: Մինչ օրս այս մոդելի գնորդների գերակշիռ մասը կազմում էին տարբեր տաքսի ծառայությունները եւ կազմակերպությունները, քանի որ սովորական գնորդի համար, որը գնում է մեքենան իր անձնական օգտագործման համար, բացի էժան գնից, որեւէ այլ հրապուրող հանգամանք դժվար է գտնել:



Սակայն Renault-ում հասկացել են, որ բացի իսկապես էժան գնից ու համեմատաբար լավ որակից, գնորդին կարելի է առաջարկել նաեւ մեքենա, որը կունենա նաեւ հրապուրիչ արտաքին տեսք, հարմարավետ ինտերյեր եւ անհրաժեշտ օպցիաներ, ինչը շատ կարեւոր է հատկապես Հայաստանի նման երկրներում, որտեղ ավտոմեքենան ավելին է, քան պարզապես փոխադրամիջոց:

Եվ կարծես, Renault-ին դա հաջողվել է: Եթե նոր Renault Logan-ն այլ անուն ունենար, ես երբեք չէի մտածի, թե ներկայացվող ավտոմեքենան հենց մեզ քաջ ծանոթ Logan-ի հետեւորդն է:

Եվ այսպես, սկսենք մեր պատմությունը նոր Logan-ի մասին… Auto.am-ը հերթական անգամ առաջարկ ստացավ Renault-ից` փորձարկել իր մոդելներից մեկը, եւ այս անգամ դա նոր Logan-ն էր: Renault-ի ներկայացուցիչները փորձարկման համար ընտրել էին Ուկրաինան, ավելի կոնկրետ` Ղրիմյան թերաակղզին: Նշեմ, որ Ուկրաինայում մի քանի տարի շարունակ Logan-ը ամենավաճառվող մեքենաների թոփ հնգյակում է:

Նոր Logan-ների գույնային գամման ավելի գեղեցիկ է. ժամանակակից ու բազմազան



Մինչ փորձարկման հետ կապված իմ տպավորություններով կիսվելը, նշեմ ամենակարեւոր փոփոխությունները, որոնք կատարվել են նոր Renault Logan-ում:

Արտաքին տեսք

Ստեղծված է Renault-ի նոր ոճով. սլացիկ առաջնամաս, ավելի մեծ լուսարձակներ, մեծ տարբերանշան, որն անմիջապես աչքի է ընկնում:
Չափսերը քիչ են ավելացել,  գույները ավելի գեղեցիկ են ու ժամանակակից, եւ հայաստանյան ավտոգնորդները ընտրության լայն հնարավորություն կունենան:

Ներքին տեսքը եւ սարքավորումները

Եթե Renault Logan-ի արտաքինում դեռ կարելի է հին մոդելից հետքեր նկատել, ապա ինտերյերը ամբողջովին զրոյից է մշակված: Առաջին անգամ ավտոմեքենան նստելիս տպավորությունը միանշանակ այնպիսին է, որ նստած ես ավելի թանկարժեք եւ դասով բարձր ավտոմեքենայում, իսկ երբ շոշափում ես սրահի նյութերը, հասկանում ես, որ դրանք պատրաստված են բավականին կոշտ պլաստմասից, բայց այնուամենայնիվ, կրկնվեմ, ոչ մի համեմատություն չի կարող լինել հին Logan-ի հետ.  սա միանաշանակ շատ մեծ որակական քայլ է առաջ: Նույնիսկ ամենապարզ կոմպլեկտավորմամբ Renault Logan-ն ունի կոնդիցիոներ եւ աուդիոհամակարգ` USB մուտքով, Bluetooth կապով, ինչպես նաեւ երկու անվտանգության բարձիկներ, մանկական նստատեղի հատուկ ֆիքսելու տեղ եւ իմոբիլայզեր: Ցանկության դեպքում նույնիսկ բազային տարբերակում կարելի է ավելացնել կողային անվտանգության բարձիկներ, կրուիզ-կոնտրոլ եւ մուլտիմեդիա համակարգ` նավիգացիայով: Ցավոք, մեզ տեղեկացրեցին, որ Հայաստանում նման նավիգացիոն համակարգով կոմպլեկտավորված ավտոմեքենաներ չեն վաճառվելու, բացատրելով, որ դեռ պատրաստ չեն նավիգացիաի համար անհրաժեշտ հայաստանյան քարտեզները:

Կազմակերպիչները ավտոմեքենաների փորձարկման համար ընտրել էին Ղրիմյան թերակղզու ամենագեղատեսիլ վայրերը



Երվանդ Ղարիբյանի հետ միասին մենք ընտրեցինք “թոփ” կոմպլեկտավորմամբ Renault Logan-ը, որը կոչվում է Expression` հասկանալու համար, թե ի՞նչ առավելագույն հնարավորություններ ունի  նոր Renault Logan-ը: Expression տարբերակում ավտոմեքենան ունի 1.6 լիտրանոց եւ 80 ձիաուժանոց շարժիչ, 5 աստիճան (դեռ) մեխանիկական փոխանցման տուփ, ղեկի հիդրոուժեղացուցիչ, բորտ համակարգիչ` արտաքին ջերմաստիճանի ցուցիչով, կրուիզ կոնտրոլ, ղեկի կաշեպատում, ABS համակարգ, տախոմետր եւ հետեւի փարքինգային համակարգ:

Ղեկը եւ վարորդի նստատեղը հնարավոր է կարգավորել միայն բարձրությամբ, կոնդիցիոները` սրահի ֆիլտրային համակարգով: Նոր Logan Expression-ն ունի  երկգոտանի կլիմատ կոնտրոլ, CD/MP3 աուդիոհամակարգ, բոլոր ապակիները էլեկտրակառավարվող են: Կան եւս մի քանի օգտակար մանրուքներ. կենտրոնական փական հեռակառավարմամբ, կողպեքով բենզինի բաք եւ շարժիչի ներքեւի մասի հատուկ պաշտպանիչ:

Հետեւի նստատեղերում բավականին հարմարավետ կտեղավորվեն 3 միջին հասակի ուղեւորներ:

Բեռնախցիկը միշտ եղել է Renault Logan-ի ամենակարեւոր առավելություններից մեկը` 510 լիտր… ահա այսպիսի ահռելի բեռնախցիկ: Նշենք մի շատ կարեւոր առանձնահատկություն. բեռնախցիկը բացելիս պետք է շատ զգույշ լինել, կոճակը սեղմելիս, բեռնախցիկի դուռը պարզապես վերեւ է կրակում եւ ուշադիր չլինելու դեպքում նույնիսկ կարելի է վնասվածք ստանալ: Դա նշում էին գրեթե բոլոր փորձարկողները, հուսով  ենք Renault-ում արագ հաշվի կառնեն այս նկատողությունը:

Ինչպես տեսնում եք, ֆրանսիացիները այս անգամ լավ են պատրաստել իրենց ամենաբյուջետային ավտոմեքենան: Մամլո հաղորդագրությունում նշվում էր, որ այս լավ կոմպլեկտավորված Expression-ը արժենալու է 10.250 եվրոյին համարժեք դրամ,  այսօրվա փոխարժեքով` մոտ 5.586.250 դրամ, սակայն հաշվի առնելով մեր երկրի շուկայական գնագոյացման առանձնահատկությունը, կարծում ենք, այս գինը կփոփոխվի, իհարկե, դեպի վերեւ: Թե որքա՞ն, կտեսնենք, երբ ավտոմեքենան արդեն վաճառքում կլինի:

Տպավորությունները վարելիս

Ղրիմի Սիմֆերոպոլ քաղաքի օդանավակայան ժամանելուց ամիջապես հետո մեզ տրամադրեցին փորձարկման համար նախատեսված ավտոմեքենաները: Ինչպես նշել էի, մենք ընտրեցինք ամենաթանկարժեք կոմպլեկտավորմամբ Expression-ը` նավիգացիոն համակարգով: Բավականին արագ կողմնորոշվելով համակարգում, նախանշեցինք ուղղությունը եւ շարժվեցինք: Ուզում եմ շնորհակալություն հայտնել կազմակերպիչներին ավտոմեքենաների փորձարկման համար Ղրիմի գեղատեսիլ թերակղզին ընտրելու համար:

Նոր Logan-ի ներքին հարդարման նյութերն անհամեմատ որակյալ են նախորդ սերնդի Logan-ի հետ



Առաջին տպավորությունը, որ Երվանդ Ղարիբյանի հետ ստացանք Renault Logan-ը վարելուց, թափքի բավականին փափուկ աշխատանքն էր: Ղրիմի ճանապարհները իդեալական չես անվանի, շատ տեղերում անհարթություններ կային: Իհարկե, չես համեմատի մեր Երեւան-Սեւան մայրուղու հետ, բայց այնուամենայնիվ եղած անհարթությունները ավտոմեքենան զարմանալիորեն փափուկ էր կլանում:

Գեղատեսիլ ճանապարհահատվածի զիգզագներում նկարահանումների ժամանակ, Logan-ը բավականին վստահ էր իրեն զգում բարձր արագությամբ շրջադարձեր կատարելիս: Իհարկե, սա նկարահանումների համար արված փորձարկումներ էին, բայց ամեն անգամ պատկերացնում էի Դիլիջանի ոլորան ճանապարհները, որտեղ, համոզված եմ, մեքենան նույնապես վստահ կդրսեւորեր իրեն:

Շարժիչի մասին: 80 ձիաուժանոց շարժիչը քաղաքից դուրս ճանապարհներին բավականեցնում էր հատկապես, երբ պտույտները գերազանցում էին 3000-ը: Ավտոմեքենան փոքր-ինչ «նեղվում» էր, երբ նեղ փողոցներով փորձում էի շրջանցում կատարել, զգացվում էր, որ եւս մոտ 20 ձիաուժ չէր խանգարի:

Նման դեպքերում ես միշտ հիշում եմ Renault Logan-ի գնի մասին եւ փորձում ավելի քիչ քննադատությամբ մոտենալ ավտոմեքենային: Պետք չէ մոռանալ, որ այնուամենայնիվ, սա քաղաքային բյուջետային մեքենա է:

Տարօրինակ սուլոցի մասին. երբ մեքենան զարգացնում էր 70-80 կմ/ժ արագություն, սկսում էր լսվել ականջ կտրող սուլոց: Երկար ուսումնասիրելուց հետո, մենք սկսեցինք կասկածել կողային հայելիների աերոդինամիկայի վրա: Դրանք բավականին մեծ էին, ինչն ուներ իր դրական կողմը եւ լավ տեսադաշտ էին ապահովում, բայց մեր կարծիքով միաժամանակ այդ սուլոցի պատճառն էր, ինչի մասին մենք կիսվեցինք Renault-իներկայացուցիչների հետ եւ նրանք խոստացան ուսումնասիրել եւ ուղղել:

Renault Logan եւ Renault Sandero



Եվս մի նկատողություն. բոլորս սովոր ենք, որ կլակսոնի ազդանշանի կոճակը գտնվում է ղեկի վրա եւ ինտուիտիվ ձեռքդ գնում է դեպի ղեկը, բայց Renault -ն ունի հատուկ կարծիք. Logan-ում այդ կոճակը գտնվում է ոչ թե ղեկին, այլ  ղեկի ձախ կողմում՝ լուսարձակների լծակի վրա: Ասում են, սովորության հարց է, բայց այնուամենայնիվ, հարմար չէ:

Հերթական կանգառներում, որոնք, ինչպես կանոն, լինում էին ռեստորաններում, որտեղ մեզ հյուրասիրում էին ուկրաինական-թաթարական համեղ ուտեսներով, մենք կիսվում էինք մեր ուկրանիական կոլեգաների հետ մեր տպավորություններով, բոլորը միանշանակ նշում էին, որ նման գնի սահմաններում Renault-ին հաջողվել է ստեղծել շատ հրապուրիչ արտաքինով պոտենցիալ ավտովաճառքի հիթ: Մեր կարծիքով, նոր Լogan-ը նվազագույնը պետք է կրկնի իր նախորդ տարվա վաճառքի հաջողությունները:

Առաջին օրն ավարտվեց Ալուշտա քաղաքում, հաջորդ օրը մեզ սպասում էր Renault Sandero Stepway-ը, որի մասին տպավորությունները մյուս մասում` Հայաստանում վաճառքները սկսելու ժամանակ:

Ընդհանուր տպավորությունները.

Ինչը՞ դուր չեկավ

- Expression-ը տարբերակը Հայաստանում չի վաճառվելու
- Բեռնախցիկի դուռը բացվում է անյպիսի արագությամբ, որ անզգույշ լինելու դեպքում կարելի է վնասվել
- Անհասկանալի սուլոց մեքենայի առաջնամասից, կասկած կա, որ պատճառը հայելիների աերոդինամիկայում է:
- Կոնկրետ պարզ չեն հայաստանյան գները, չնայած, որ Renault-ի ուղարկված ռելիզում գները ներառված են:
- ազդանշանի կոճակը գտնվում է ոչ թե ղեկին, այլ  ղեկի ձախ կողմում լուսարձակների լծակի վրա:

Ինչը՞ դուր եկավ

- Արտաքին դիզայնը անհամեմատելի ներդաշնակ է նախկինի հետ համեմատելիս:
- Սրահը ժամանակակից է, հագեցած ամենաանհրաժեշտ սարքավորումներով, նույնիսկ բազային կոմպլեկտավորումն ունի կոնդիցիոնոր, ինչը Հայաստանի համար անհրաժէշտ է:
- Բեռնախցիկի ծավալը հարմար է եւ իր դասի համար շատ մեծ:
- Թափքի փափուկ աշխատանքը:
- Եվ շատ տնտեսող է:

Եզրակացությունը

Եթե դուք նախատեսում եք գնել նոր ավտոմեքենա ավտոսրահից ու ձեր միջոցները սահմանափակ են, ապա մինշանակ պետք է ուշադրություն դարձնել Renault Logan-ի վրա: Եթե մեր դիլերին հաջողվի պահպանել, կամ քիչ գնային փոփոխություններով վաճառել Renault Logan-ը, ապա միանշանակ այս մեքենան կգնեն ոչ միայն տաքսի ծառայությունները եւ կորպորատիվ հաճախորդները, այլեւ սովորական ավտոսիրողները: Renault Logan-ով արդեն նույնիսկ ամոթ չի լինի ընկերուհու հետ միասին թատրոն գնալ:

Սպասենք հայաստանյան վաճառքների մեկնարկին, որի մասին մենք լրացուցիչ կտեղեկացնենք:

Հայաստանում սպասվելիք Նոր Renault Logan-ի տեխնիկական բնութագիրները, Ինչպես նշեցինք, վաճառքների սկիզբը նախատեսված է գարնան վերջին:

Նոր Renault Logan 1.2 լ
- շարժիչ` 1.2 լ.
- հզորությունը` 75 ձիաուժ

Դինամիկ ցուցանիշները
- առավելագույն արագությունը` 156 կմ/ժ
- 0-100կմ/ժ` 14.5 վ.

Վառելիքի ծախսը
- քաղաքում`7.8 լ
- քաղաքից դուրս` 5.2լ
- խառը ցիկլում` 6.1լ
- վառելիքի բաքի ծավալը` 50լ

Չափերը
- բեռնախցիկի ծավալը` 510 լ
- հետեւի նստատեղերը ծալված` 1257 լ
- անիվային հիմքը` 2634 սմ.
- ընդհանուր երկարությունը` 4348 սմ.
- ընդանուր լայնքը` 1733 սմ
- լուսաճեպք` 16,4 սմ

Նոր Renault Logan 1.6 լ
- շարժիչ` 1.6 լ.
- հզորությունը`80 ձիաուժ

Դինամիկ ցուցանիշները
- առավելագույն արագությունը – 156 կմ/ժ
- 0-100կմ/ժ` 12.8 վ.

Վառելիքի ծախսը
- քաղաքում` 9. 5լ
- քաղաքից դուրս` 5.9լ
- խառը ցիկլում`  7.2լ
- վառելիքի բաքի ծավալը`  50լ

Չափերը
- բեռնախցիկի ծավալը` 510 լ
- հետեւի նստատեղերը ծալված` 1257 սմ
- անիվային հիմքը  - 2634 սմ.
- ընդանուր երկարությունը – 4348 սմ.
- ընդանուր լայնքը -1733 սմ
- լուսաճեպք` 16,4 սմ