“Ավտոակումբ 911”՝ մեքենաների շտապ օգնություն ճանապարհներին

Մայիս ամսից Երեւանում սկսել է գործել “Ավտոակումբ 911” ընկերությունը, որը Հայաստանի համար աննախադեպ ծառայություններ է մատուցում ավտոսիրողների համար: Դառնալով ակումբի անդամ եւ վճարելով ամսական ընդամենը 5 000 դրամ, ավտոսիրողներիը կարող են մեկ ամսվա ընթացքում անվճար օգտվել մի շարք ծառայություններից, օրինակ, էվակուատորի, ճանապարհային շտապ օգնության, ավտոլվացման եւ այլ ծառայություններից:

Auto.am-ը խնդրեց «Ավտոակումբ 911»-ի նախաձեռնողներին ավելի մանրամասն պատմել ընկերության կողմից տրամադրվող ծառայությունների, ավտոսիրողների արձագանքի, ինչպես նաեւ ընկերության հետագա պլանների մասին:

Ընկերությունում մեզ հայտնեցին, որ Հայաստանում նման ծառայությունների ներդրման գաղափարն առաջացել է մի քանի տարի առաջ, եւ հիմնականում որպես օրինակ ծառայել է ողջ աշխարհում գործող նմանատիպ կազմակերպությունների փորձը: Համապատասխան ուսումնասիրություններից հետո մշակվել է 5 ծառայություններից բաղկացած փաթեթը, որն առավել հարմարեցված է Հայաստանի պայմաններին: Ամսական 5000 դրամի դիմաց, ընկերությունը տրամադրում է 5 տիպի անվճար ծառայություններ Երեւանի տարածքում. էվակուատորի ծառայություն, որից ամսվա ընթացքում կարելի է օգտվել անսահմանափակ քանակությամբ, երկրորդ` շտապ տեխօգնություն ճանապարհներին` կրկին անսահմանափակ քանակությամբ: Երրորդը ծառայությունը անգործունակ վարորդ ծառայությունն է (ամսական 3 անգամ, հիմնականում կհետաքրքրի ոչ սթափ վիճակում գտնվող վարորդներին), չորրորդը՝ ավտոլվացման ծառայությունն է՝ ամսական 1 անգամ, եւ վերջապես, իրավաբանական անվճար խորհրդատվություն հեռախոսով, որի օգնությամբ քարտատերերը կարող են ստանալ իրենց հուզող տարբերի հարցերի պատասխանները:

Ընկերությունն աշխատում է շուրջօրյա ռեժիմով: Ճանապարհներին խնդիրների առաջացման դեպքում ակումբի քարտատերերը կարող են զանգահարել «Ավտոակումբ 911», եւ ընկերության մասնագետները հատուկ սարքավորված մեքենաներով կարճ ժամանակում կհասնեն դեպքի վայր, հնարավորության դեպքում տեղում կլուծեն խնդիրը, կամ, եթե անհրաժեշտ է, կտեղափոխեն ավտոմեքենան վարորդի նախընտրած տեխսպասարկման կետը: Ցանկության դեպքում, նրանք կարող են օգտվել նաեւ «Ավտոակումբ 911» տեխսպասարկման կենտրոնից, որտեղ քարտատերերը կօգտվեն նաեւ հավելյալ զեղչերից՝ մինչեւ 50%:

Ի դեպ, քարտատերերը կտրամադրվեն նաեւ «Ավտոակումբ 911»-ի հետ համագործակցող մի շարք կազմակերպությունների զեղչերը: Դրանց թվում են պահեստամասերի խանութներ, տաքսի ծառայություններ, օծանելիքի, հագուստի խանութներ, տուրիստական գործակալություններ եւ այլն:



Ակտիվ գովազդային արշավը «Ավտոակումբ 911»-ը սկսել է հունիսի սկզբին, եւ ընկերությունում ընդհանուր առմամբ գոհ են ավտոսիրողների արձագանքից: Քարտատերերի թիվն արդեն կազմում է մի քանի տասնյակ, եւ ունի ավելանալու միտում: Արդեն եղել են առաջին կանչերը. ամենապահանջված ծառայութններն են շտապ տեխօգնությունը ճանապարհներին եւ «անգործունակ վարորդը»: Շատ են նաեւ ավտոլվացման ծառայությունից օգտվողները:

Ակումբի քարտը տրամադրվում է մեկ տարի ժամկետով: Այն կարելի է ձեռք բերել, պատվիրելով այն հեռախոսազանգով` 010 500 911, կամ www.avtoakumb911.am կայքի միջոցով, եւ այն կառաքվի ձեր նշված վայրը:

Ընկերությունում նշեցին, որ ծառայության զարգացման եւ քարտատերերի ավելացմանը զուգահեռ նախատեսվում է ընդլայնել ինչպես մատուցվող ծառայությունների շրջանակը, այնպես էլ աշխարհագրությունը: Մասնավորապես, նախատեսվում է մշակել այլ փաթեթներ, ինչպես օրինակ, Ընտանեկան փաթեթենր, որոնք ձեռնտու կլինեն մեկից ավելի ավտոմեքենա ունեցող ընտանիքների համար, կամ հատուկ փաթեթներ կանանց համար: Բացի այդ, «Ավտոակումբ 911»-ը մտադիր է ժամանակի ընթացքում դուրս գալ Երեւանի սահմաններից եւ սկսել ծառայություններ մատուցել Հայաստանի ողջ տարածքում՝ գործակալական կետեր բացելով տարբեր մարզկենտրոններում եւ քաղաքներում: