Volvo XC60. նոր լիաքարշակ քրոսովերը շվեդական արտադրողից: Թեսթ-դրայվ Իսպանիայում

Հոկտեմբերի 13-15-ը Volvo ընկերությունը Իսպանիայի Վալենսիա քաղաքում կազմակերպել էր իր նոր` XC60 քրոսովերի թեսթ-դրայվը միջազգային լրատվամիջոցների համար: Հայաստանն այդ միջոցառմանը ներկայացնում էր “Մեդիամաքս” լրատվական գործակալությանը պատկանող Auto.am ավտոմոբիլային ինտերնետային պորտալը:

Մասնակցությունը թեսթ-դրայվին հնարավոր դարձավ Հայաստանում Volvo ընկերության միակ պաշտոնական դիլեր, Auto.am կայքի վաղեմի գործընկեր “Ֆորա” ընկերության շնորհիվ:

Ասեմ, որ Volvo բրենդը Հայաստանում պաշտոնապես ներկայացված է արդեն մոտ 1 տարի եւ, ինչպես նշեց մեր տարածաշրջանում Volvo-ի տնօրեն  Էկարդ Տորբեն (Eckardt Torben), ընկերությունը գոհ է Հայաստանում ընթացիկ վաճառքներից եւ հույս ունի, որ XC60 մոդելի շուկա մուտք գործելուց հետո ընդհանուր վաճառքների ծավալներն ավելի գոհացուցիչ կլինեն:

Volvo XC60 քրոսովերի համաշխարհային վաճառքի մեկնարկը նախատեսվում է 2009 թվականի գարնանը, եւ հավանական է, որ հենց այդ ժամանակ Հայաստանում նույնպես կսկսվի այդ ավտոմեքենայի վաճառքը: Ինչպես մեզ հայտնեցին “Ֆորա” ընկերությունում, մեր հանրապետությանը տրամադրված XC60-ների  նախնական քվոտան կազմում է մոտ 20 ավտոմեքենա:

Volvo XC60-ի համար Ռուսաստանի շուկայում հայտարարված է 1 696 800 ռուբլի գինը (մոտ 67 870$)` 3.0 T6 շարժիչով 285 ձիաուժանոց տարբերակի համար եւ 1 400 100 ռուբլի (մոտ 56 000$)` 2.4D5 185 ձիաուժանոց դիզելային տարբերակի համար: Կարելի է ենթադրել, որ Հայաստանի շուկայում այս քրոսովերի գները էականորեն չեն տարբերվի վերոնշյալ թվերից:

Ի դեպ, Volvo ընկերությունը նախատեսում է վաճառել ավելի քան 50000 XC60 քրոսովեր ամբողջ աշխարհում:

Volvo XC 60

Այժմ հենց ավտոմեքենայի մասին:

Առաջին անգամ XC60-ը կոնցեպտի տեսքով ի հայտ եկավ 2007 թվականին Միացյալ Նահանգներում` Դեթրոյթի միջազգային ավտոշոուի ընթացքում, իսկ 2008-ին Ժնեւյան ավտոսրահում Volvo XC60-ն արդեն ամենասպասվող պրեմիերաներից մեկն էր:

Եվ ահա, 2008-ի աշնանն արդեն պատրաստ են նախավաճառքային ավտոմեքենաները, որոնք էլ տրամադրվել էին լրագրողներին` Իսպանիայում թեսթ-դրայվ անցկացնելու համար:

Volvo-ն դուրս է բերում իր նոր մոդելն ամենաարագ զարգացող “պրեմիում” դասի քրոսովերների հատված: Volvo-ի պես ընկերությունները պատահական քայլեր չեն կատարում նոր մոդելներ արտադրելիս. մինչ այն շուկա դուրս բերելը Volvo-ն բավականին լուրջ մարքեթինգային աշխատանք է կատարել եւ, տեսնելով շուկայի արձագանքը “պրեմիում” քրոսովերների նկատմամբ, որոշում կայացրել շուկայի այս հատված մուտք գործելու վերաբերյալ:

Պարզապես լավ մեքենա արտադրելը տիպիկ չէր լինի Volvo-ի համար: XC60-ով շուկա մուտք գործելը պետք է միանշանակ հաջողված քայլ լինի: Եվ այդ արդյունքին հասնելու համար Volvo-ն նոր մակարդակի է հասցրել XC60 մոդելը` իր տեխնիկանան լուծումներով, անվտանգության աննախադեպ համակարգերով, նոր եւ վառ դիզայներական լուծումներով:

Անվտանգություն

Մինչեւ XC60-ում տեղադրված անվտանգության բոլոր համակարգերի թվարկումը կանգ առնեմ նորագույն եւ նախադեպը չունեցող City Safety համակարգի վրա: Այս եզակի տեխնոլոգիան նախագծել են Volvo-ի ինժեներները: Այն թույլ է տալիս խուսափել բախումներից ցածր արագությունների դեպքում` քաղաքային երթեւեկության պայմաններում: City Safety-ն մեկ այլ, նույնպես վերջերս մշակված բախման նախազգուշացման ավտոմատ արգելակման համակարգի` Collision Warning with Auto Brake-ի հետ միասին կարող է ավտոմատ կերպով արգելակել ավտոմեքենան գրեթե ցանկացած արագության ժամանակ:

Համակարգը մշակելուց առաջ կատարվել է լուրջ վերլուծական աշխատանք, եւ հետազոտությունների արդյունքում պարզվել է, որ ավտոմեքենաների բախումների 75%-ը տեղի է ունենում 30 կմ/ժ արագության ժամանակ, իսկ վթարների 50%-ի դեպքում վարորդները անուշադրության պատճառով ընդհանրապես չեն սեղմում արգելակը:

City Safety համակարգն արգելակում է ավտոմատ կերպով, եթե ձեր ավտոմեքենան մոտենում է դիմացից եկող մեքենային եւ վարորդը չի արձագանքում մոտեցող վտանգին: Այսպիսով, համակարգը օգնում է խուսափել բախումից, իսկ բարձր արագության դեպքում, երբ, այնուամենայնիվ, չի հաջողվում դրանից խուսափել, համակարգն օգնում է նվազագույնի հասցնել վթարի հետեւանքները եւ մարդկանց վնասվածքները:

Համակարգն առավել արդյունավետ է, երբ ձեր եւ դիմացից ընթացող ավտոմեքենայի միջեւ հարաբերական արագությունը կազմում է 15 կմ/ժ. այս դեպքում հաջողվում է ընդհանրապես խուսափել բախումից: Իսկ եթե հարաբերական արագությունը կազմում է 15-30կմ/ժ, City Safety համակարգը առավելագույնս կնվազեցնի արագությունը եւ կարգելակի` մինչ տեղի ունենա բախումը դիմացից ընթացող ավտոմեքենայի հետ:

Ինչպես նշեց City Safety համակարգը ներկայացնող մենեջեր Հենրիկ Անֆալքը (Henrik Ahnfalk), City Safety-ն ցույց է տալիս, թե ինչպիսի մեծ ուշադրություն է դարձնում Volvo ընկերությունը իրական բախումների մասին նախազգուշացնող համակարգերին: Եվ, ինչպես հայտարարել է Volvo-ի նախագահ եւ գործադիր տնօրեն Ֆրեդրիկ Արփը (Fredrik Arp), “Volvo XC60-ը մեր ընկերության ամենաանվտանգ մեքենան է. այս մոդելում մենք օգտագործել ենք 80 տարիների ընթացքում ավտոմեքենաների անվտանգության ոլորտում մեր կուտակած փորձը”: Նշեմ նաեւ, որ City Safety համակարգը ընդգրկված է XC60-ի սդանդարտ կոմպլեկտացիայում:

Բացի City Safety-ից, Volvo XC60-ում տեղադրված են անվտանգության մի շարք այլ համակարգեր, որոնք նույնպես բարձրացնում են անվտանգության մակարդակը երթեւեկության ընթացքում:

Վարորդի նախազգուշացման համակարգ (Driver Alert Control) – համակարգը հետեւում է ավտոմեքենայի ընթացքին ճանապարհային գծերը պահպանելու տեսանկյունից` վերլուծելով իրավիճակը եւ նախազգուշացնելով վարորդին: Դա սովորական երեւույթ է, երբ վարորդը հոգնած է, կորցնում է կենտրոնացումը եւ ուշադրությունը, եւ այդ դեպքերում համակարգը ձայնային ազդանշաններով զգուշացնում է, որ ժամանակն է մի փոքր հանգստանալու:

Հարմարեցվող Քրուիզ Քոնթրոլ (Adaptive Cruise Control) – համակարգը օգտագործում է հատուկ տեղորոշիչ (ռադար), որի միջոցով հետեւում է դիմացից ընթացող ավտոմեքենայի արագությանը` ավտոմատ կերպով կարգավորելով արագությունը եւ հետեւելով մինչեւ դիմացի ավտոմեքենան առաջադրված հեռավորությանը:

Մինչեւ դիմացից ընթացող ավտոմեքենան մնացած հեռավորության կրճատման նախազգուշացնող համակարգ (Distance Alert) - այս տեխնոլոգիան օգնում է վարորդին հետեւել մինչեւ դիմացից ընթացող ավտոմեքենան առաջադրված հեռավորությանը այն դեպքերում, երբ Հարմարեցված Քրուիզ Քոնթրոլ համակարգն անջատված է:

«Մեռյալ գոտում» գտնվող ավտոմեքենայի ազդանշանային համակարգ (Blind Spot Information) – օրվա ցանկացած ժամի BLIS համակարգը լուսարձակի օգնությամբ նախազգուշացնում է այն մասին, թե կան արդյոք ավտոմեքենաներ այսպես կոչված «Մեռյալ գոտում»` կողային ցանկացած հայելու կողքին:

Սրանք անվտանգության տեխնիկական այն բարդ համակարգերն են, որոնք տեղադրված են Volvo XC60-ում: Կարելի է նաեւ նշել տեխնիկապես ոչ այնքան բարդ, բայց ոչ պակաս կարեւոր համակարգեր, ինչպիսիք են.

Վարորդի Խելացի Տեղեկատվական Համակարգ (Intelligent Driver Information System) – վտանգավոր իրավիճակներում համակարգը չի թույլատրում վարորդին շեղվել հեռախոսազանգերի եւ SMS հաղորդագրությունների պատճառով:

Ակտիվ բիքսենոնային լուսարձակներ – այս լուսարձակները մեքենայի երթեւեկության ընթացքում թեքվում են համապատասխան ուղղությամբ` ապահովելով ճանապարհի առավել օպտիմալ լուսավորում:

Անվադողերի ճնշման դիտարկման համակարգ - (Tyre Pressure Monitoring System) – բոլոր անվադողերում տեղադրված են հատուկ հսկիչ ցուցիչներ, որոնք մշտապես հետեւում են անվադողերում ճնշման մակարդակին:

Ես կավելացնեի նաեւ ամենահաճախ օգտագործվող համակարգերից մեկը` ետնամասի գունավոր տեսախցիկը (Park Assist Camera): Ժամանակակից այս համակարգը ոչ միայն թույլ է տալիս տեսնել, թե ինչ է գտնվում ավտոմեքենայի ետնամասում, այլեւ հետեւել այն ուղղությանը, որը թելադրում է համակարգիչը: Հատկապես արդյունավետ է մեքենան կայանելիս:

Սա իհարկե այն ամենը չէ, ինչին ընդունակ է XC60-ը. եթե նկարագրենք անվտանգության բոլոր համակարգերը, ապա կառաջանա առանձին նյութի անհրաժեշտություն:

Տեխնիկական - Ի՞նչ կա “ներսում”

Շարժիչ. Volvo XC60-ը առաջարկում է T6 3-լիտրանոց տուրբինային 6-մխոցանի 285 ձիաուժ հզորությամբ բենզինային շարժիչով եւ D5 5-մխոցանի 2,4-լիտրանոց 163 կամ 185 ձիաուժ հզորությամբ դիզելային շարժիչով ավտոմեքենաներ` կախված մոդիֆիկացիայից:

Թեսթ-դրայվի ժամանակ անձամբ փորձարկելով երկու ավտոմեքենաները` եկա այն եզրակացության, որ ինձ անհամեմատ ավելի շատ դուր եկավ, թե ինչպես էր ճանապարհին իրեն պահում «բենզինային տարբերակը»` T6-ը: Հաշվի առնելով Հայաստանում դիզելային շարժիչներով ավտոմեքենաների վերաբերյալ կարծիքները եւ, առավել եւս, որակյալ դիզելային վառելիքի բացակայությունը, կարծում եմ, մեզ մոտ վաճառքի գերակշռող մասը կկազմի հենց բենզինային XC60-ը:
 Լիաքարշակ (All Wheel Drive) համակարգը տեղադրված է որպես ստանդարտ օպցիա: Սա առաջատար Haldex AWD համակարգն է` Instant Traction տեխնոլոգիայով, որը մշտապես հետեւում է անիվների պտտման արագությանը, եւ եթե դրանցից մեկի հպումը ճանապարհի հետ ինչ-ինչ պատճառներով ավելի քիչ է, համակարգն ակնթարթորեն նվազեցնում է այդ անիվին ուղղված ուժը:

Փոխանցման տուփ. առաջարկվում են 6-աստիճան մեխանիկական եւ 6-աստիճան ավտոմատ Geartronic փոխանցման տուփերը: Թեսթ-դրայվի ընթացքում մեզ տրամադրված բոլոր ավտոմեքենաները համալրված էին հենց Geartronic համակարգով: Անկեղծ ասած, սկզբում ինձ թվում էր, որ Volvo-ի ավտոմատ փոխանցման տուփը կարող է բավականաչափ դինամիկ ընթացք չապահովել XC60-ին, բայց առաջին իսկ կիլոմետրերը ցույց տվեցին, որ Volvo-ի ինժեներներին հաջողվել է 3.0 լիտրանոց շարժիչի հզորությունը ճիշտ հարաբերակցությամբ փոխանցել թափքին:

Էլեգանտ արտաքին

Երբ 2009 գարնանը Հայաստանի փողոցներում կտեսնեք Volvo XC60-ը, կնկատեք, թե ինչպիսի էվոլյուցիա է ապրել ժամանակակից Volvo-ի դիզայնը, իսկ կոնկրետ XC60-ի դեպքում, ես կասեի` հեղափոխություն:

Դուք արդեն չեք տեսնի Volvo-ի հին մոդելներին հատուկ անկյունագծերով անշուք մեքենաները: XC60-ի գլխավոր դիզայներ, անգլիացի Սթիվ Մաթթինին (Steve Mattin) հաջողվել է գրեթե անհնարինը. միաձուլել Volvo-ի պահպանողական ոճը եւ ավտոդիզայնի համաշխարհային վերջին թրենդերը:

“Մեր ավտոմեքենաների դիզայնը արդեն դուրս է եկել բացարձակապես նոր մակարդակի. մենք բառացիորեն փոխում ենք Volvo ավտոմեքենաների վիզուալ ընկալումը: Նոր Volvo XC60-ում օգտագործվել են ամենահամարձակ եւ էմոցիոնալ ձեւերը: Այն լիցքավորված է հատուկ էներգիայով: Հեռվից նկատելով այս մեքենան` դուք վստահորեն կասեք. սա նոր Volvo-ն է”, – սրանք Volvo Cars-ի շեֆ-դիզայների խոսքերն են, որն իր փորձը ձեռք է բերել` աշխատելով Mercedes-Benz ընկերությունում: Եվ իսկապես, հայացք գցելով XC60-ին, չես նկատի ամենագնացներին յուրահատուկ ծանր ընկալվող դիզայնը. այս ավտոմեքենան ինչ-որ թարմ եւ դրական էմոցիաներ է հաղորդում:

Երեւի հենց դրա համար էին Volvo-ի ներկայացուցիչները թեսթ-դրայվի համար ընտրել հարավային Իսպանիայի ամենաէմոցիոնալ քաղաքներից մեկը` Վալենսիան:

Ոչ պակաս էլեգանտ ներսում

Եթե ձեզ նույնպես բախտ վիճակվի երթեւեկել XC60-ի այն տարբերակով, որը մեզ էր տրամադրել Volvo ընկերությունը, ապա ձեզ սպասում են նույն դրական տպավորությունները:

Ինձ տրամադրված ավտոմեքենայի սրահը ամբողջովին կաշվեպատ էր, գույնը` սեւ, անտրացիտը` բեժ գույնի հետ: Առաջին հայացքից գույների այս համատեղումը շատ համարձակ թվաց, բայց մի քանի ժամ մեքենայի ներսում գտնվելուց հետո այդ զգացողությունը փոխվեց, եւ որեւէ անհարմարության զգացմունք չէր առաջանում: Համոզված եմ, Հայատանում XC60-ների համար կնախընտրեն հատուկ գունային գամմաներ, առավել եւս, որ գնորդներին առաջարկվելու է սրահի գունային ձեւավորման բավականին լայն ընտրություն:

Առաջին անգամ նստելով ավտոմեքենայի ղեկին` միանշանակ զգում ես, որ նստած ես 21-րդ դարի ավտոմեքենայում. նստատեղը շատ հարմար է, եւ երկար ճանապարհներ անցնելիս` չես հոգնում ղեկի մոտ գտնվելուց: Կենտրոնական կոնսոլը ասիմետրիկ է եւ փոքր-ինչ թեքված դեպի վարորդը, վերին մասում ներդրված է LCD էկրան, որը նախատեսված է աուդիո-համակարգի, օդափոխիչի եւ նավիգացիոն համակարգի աշխատանքի տվյալներն արտացոլելու համար:  Բոլոր անհրաժեշտ կոճակներն իրենց տեղերում են, եւ վարելու ընթացքում բավականին հարմար է բոլոր համակարգերից օգտվելը:

«Վարորդը պետք է զգա իրեն ինչպես ժամանակակից ռեակտիվ ինքնաթիռում»,- ասում է Ջոնաթան Դիզլին (Jonathan Disley)` Volvo XC60-ի սրահի աշխատանքային խմբի ղեկավարը:
Եթե դուք սիրում եք հայ-թեք ոճը, վստահորեն կարելի է ասել, որ այս մեքենան ձեզ չի հիասթափեցնի:

Մրցակիցները

Այս ավտոմեքենան տարբեր շուկաներում ունի տարբեր մրցակիցներ: Եթե նայենք եվրոպական շուկային, դրանք են, իհարկե, Mercedes-Benz GLK, Audi Q5, VW Tiguan, BMW X3 /վերջինս երկար ժամանակ չի թարմացվել/ եւ, իհարկե, Land Rover Freelander-ը: Հյուսիսամերիկյան շուկայում նշված ավտոմեքենաներին պետք է ավելացնել նաեւ Infiniti EX-ը: Հայաստանում, եթե հաշվի առնենք պաշտոնական դիլերների առաջարկները, մրցակիցները գրեթե նույնն են:

Վալենսիա, Իսպանիա. Volvo XC60 – թեսթ-դրայվ

Հակառակ մեր սպասումների, Վալենսիան դիմավորեց անձրեւային եւ մառախլապատ եղանակով: Ես հատուկ թեսթ-դրայվից երկու օր շուտ էի մեկնել Վալենսիա, որպեսզի ժամանակ ունենամ ծանոթանալու քաղաքին, քանի որ թեսթ-դրայվը տեւելու էր ընդամենը երկու օր, իսկ ծրագիրը բավականին հագեցած էր: Սակայն երբ Վալենսիայի օդանավակայանից մտնում ես քաղաք, “մառախլապատ” տրամադրությունից նշույլ անգամ չի մնում, եւ իսկույն հասկանում ես, թե ինչու են շվեդները ընտրել հենց այս քաղաքը XC60-ի թեսթ-դրայվն անցկացնելու համար:

Ես Իսպանիայում առաջին անգամ էի, բայց ընկերներիս պատմածից գիտեի, որ իսպանական քաղաքներն յուրահատուկ ճարտարապետություն ունեն: Նույն քաղաքում գտնվելով` կարելի է տեսնել երկու տարբեր քաղաք` հին միջնադարյան ամրոցներով, եկեղեցիներով` կենտրոնում, եւ ֆանտաստիկ նոր Վալենսիան, որը գտնվում է նավահանգստին ավելի մոտ` Իսպանիային հատուկ ժամանակակից ֆուտուրիստական շենքերով եւ ճարտարապետությամբ:
Քաղաքի հետ ծանոթությանս օրերը շատ արագ անցան, եւ եկավ Volvo XC60-ին ծանոթանալու ժամանակը:

Միանգամից նշեմ, որ ամբողջ միջոցառումը կազմակերպված էր սկանդինավներին հատուկ ճշգրտությամբ: Ուղիղ նշանակված ժամին ինձ հասցրին միջոցառման առաջին կետ` Վալենսիա քաղաքից դեպի հյուսիս գտնվող գեղեցիկ Վալեսա դե Մանդոր (Vallesa de Mandor) առանձնատուն` շրջապատված արդեն հասունացող նարնջի պլանտացիաներով: Ինչպես ասաց Volvo ընկերության PR բաժնի ներկայացուցիչ Սարա Էհինգերը (Sara Ehinger), այս կալվածքը 2 ամսով վարձակալվել է ընկերության կողմից` Volvo ավտոմեքենաների թեսթ-դրայվերի համար:

Գլխավոր շենքի մոտ մեզ սպասում էին 18 նոր Volvo XC60-ներ, որոնց կեսը դիզելային, իսկ մյուս կեսը` բենզինային շարժիչներով: Ես նախընտրեցի բենզինային T6-ը եւ ստացա ինձ համար նախատեսված մեքենայի բանալին: Մինչ ճանապարհային թեսթ-դրայվը ինձ ուղեկցեցին City Safety համակարգի համար նախատեսված հատուկ փորձադաշտ, որտեղ հնարավորություն էր տրված ինքնուրույն փորձարկել եւ հասկանալ, թե ինչպես է աշխատում City Safety-ն: XC60 մոդելի անվտանգության համակարգի պատասխանատու մենեջերները մանրամասն բացատրեցին, թե ինչպես է աշխատում համակարգը, ինչ մեխանիզմներ են ընգդրկված, եւ այլն: Մեքենաներից մոտ 60-70 մետր հեռավորության վրա տեղադրված էին ավտոմեքենաների փչովի մուլյաժներ, որոնք պետք է օգնեին մեզ ականատես լինել City Safety-ի իրական աշխատանքին:

Ես արդեն նշել էի, թե որ արագությունների դեպքում է City Safety-ն առավել արդյունավետ գործում: Մենք սկսեցինք 15 կմ/ժ–ից: Զարգացնելով եւ պահելով անհրաժեշտ արագությունը` մեքենան մոտեցավ արհեստական խոչընդոտին: Բնազդաբար ոտքս ուղղեցի դեպի արգելակը, սակայն դեռ չէի հասցրել սեղմել այն, երբ մեքենան մոտ 50 սմ չհասնելով մուլյաժին` կանգ առավ: Նկատելով իմ զարմանքը` Volvo-ի մենեջերները ժպտացին, կարծես ասելով. “Ահա մեր նոու-հաուն”, եւ առաջարկեցին կրկնել փորձարկումը` հետզհետե ավելացնելով արագությունը: Երկրորդ անգամ ես ավելացրեցի արագությունը մինչեվ 20կմ/ժ: Այս անգամ, մոտենալով դիմացի “մեքենային”, ոտքերս պարզապես հանեցի արգելակից: Քիչ անց մեքենան նույն կտրուկ կերպով կանգ առավ. այս անգամ հեռավորությունը մինչեւ մուլյաժ մոտ 20-30 սմ էր: Ես չէի կարողանում համակերպվել այն մտքի հետ, որ մեքենան ինքնուրույն արգելակում է այդ իրավիճակում: Այնպիսի զգացողություն էր, որ ես վարորդական դպրոցում եմ, եւ վտանգավոր իրավիճակում ուսուցիչը կողքից օգնեց կատարել արագ արգելակումը: Ամեն դեպքում, կար ապահովության զգացողություն, պարզապես հրահանգչի փոխարեն օգնեց City Safety-ն: Երրորդ փորձը պետք է ավելի դժվարին լիներ: Մասնագետներն առաջարկեցին ավելացնել արագությունը մինչեւ 25-30կմ/ժ: Արդյունքը գրեթե նույնն էր: Գրեթե, քանի որ այս դեպքում մենք, այնուամենայնիվ, թեթեւ բախվեցինք մուլյաժին: Այդպես էլ պետք է լիներ. այս արագության դեպքում համակարգը օգնում է ոչ թե խուսափել բախումից, այլ նվազագույնի հասցնել վնասները: Իրական քաղաքային երթեւեկության պայմաններում ամենաշատը կվնասվեին մեքենայի բամպերները: Այս ամենը տեսնելով` իսկույն պատկերացրեցի, թե որքան օգտակար կլիներ այս համակարգը երեւանյան խցանված փողոցներում, ուր նման իրավիճակների կարելի է հանդիպել գրեթե ամեն օր, երբ անփորձ վարորդները, կանայք (թող ներեն ինձ գեղեցիկ սեռի ներկայացուցիչները, որոնք շատ դեպքերում ճանապարհին հետեւելու փոխարեն շեղում են իրենց ուշադրությունը) եւ, իհարկե, փորձառու վարորդները, երկար ժամանակ ղեկին գտնվելով, կորցնում են զգոնությունը: Ցավոք, մեր ավտոմեքենաներում City Safety դեռեւս չկա, այն միայն Volvo XC60-ի օպցիան է:

Մինչ ես ավարտեցի փորձարկումը, փորձադաշտին մոտեցան տարբեր երկրներից ժամանած լրագրողական մի քանի խմբեր: Ասեմ, որ երկու ամսվա ընթացում այնտեղ ժամանել են լրագրողներ գրեթե բոլոր մայրցամաքներից: Ես հասկանում եմ Volvo-ի մասնագետների ցանկությունը` զարմացնել իրենց աշխատանքի արդյունքներով:

Փորձարկմանը հաջորդեց City Safety համակարգի մասին ֆիլմի ցուցադրումը: Քիչ անց մենք արդեն մեզ տրամադրված ավտոմեքենաներով մեկնեցինք առաջին ճանապարհային թեսթ-դրայվի: Քանի որ ես միակ լրագրողն էի Հայաստանից, ինձ միացավ շվեդական ընկերության տեխնիկական նախագծերի ղեկավար Հական Իվառսոն-ը (Hakan Ivarsson): Ասեմ, որ Հականը ողջ թեսթ-դրայվի ընթացքում օգնում էր ինձ “զգալ” նոր մեքենան եւ համբերատար պատասխանում էր բոլոր իմ հարցերին: Գիտակցելով, որ կողքիս նստած է Volvo-ի այն մասնագետներից մեկը, ով նույնպես մասնակցել է XC60-ի ստեղծման գործին, ես ինձ կրկնակի ապահով էի զգում` անծանոթ մեքենան անծանոթ վայրում վարելիս: Բացի այն բազմաթիվ էլեկտրոնային համակարգերից, որոնք օգնում էին հարմարավետ եւ ապահով վարել մեքենան, ինձ շատ էր օգնում նաեւ նավիգացիոն համակարգը, որը կանացի մեղմ ձայնով հուշում էր, թե քանի մետրից է պետք շրջադարջ կատարել, որ ուղղությունը պահել, իսկ հյուրանոցին մոտենալիս հուշեց, որ մենք արդեն տեղում ենք: Նա, ով մեքենա է վարել Եվրոպայում եւ օգտվել է նավիգացիոն համակարգից, կարող է հավաստել, որ այն շատ օգտակար օպցիա է անծանոթ վայրում, առավել եւս, երբ այն լավ մշակված է, վարելու ընթացքում հեշտ նկատելի եւ չի շեղում ճանապարհից: Volvo XC60-ի դեպքում նավիգացիոն համակարգից իսկապես շատ հարմար է օգտվել. հատուկ շնորհակալություն ինտերյերի դիզայներներին:

Հաջորդ օրը մեզ սպասում էր թեսթ-դրայվի ավելի հագեցած երկրորդ փուլը: Իսկ մինչ այդ երեկոյան հյուրանոցում անցկացվեց Volvo XC60-ի հնարավորությունների ավելի ծավալուն ներկայացումը, որից հետո առավել անմիջական պայմաններում` ընթրիքի ժամանակ, լրագրողները եւ Volvo ընկերության աշխատակիցները քննարկում էին մեր տպավորությունները, կարծիքներ փոխանակում տարբեր երկրներում Volvo մակնիշի հաջողությունների եւ հետագա առաջխաղացման հնարավորություների մասին: Volvo-ում նշեցին, որ շատ ուրախ են, որ Հայաստանում, ի դեմս “Ֆորա” ընկերության, վստահելի գործընկեր են գտել, որը պատշաճ մակարդակով կարողանում է ներկայացնել Volvo-ն մեր երկրում:

Հաջորդ օրն առավոտյան ես եւ Հականը արդեն ճանապարհին էինք` իմ նախընտրած բենզինային Volvo XC60 T6-ով: Այս անգամ ճանապարհը ավելի երկար էր եւ հետաքրքիր: Մենք պետք է վարեինք մոտ 300 կմ` Վալենսիայից տարբեր հեռավորությունների վրա գտնվող գեղատեսիլ վայրերով եւ լեռնային ճանապարհներով: Այս երթուղին հատուկ մշակված էր լրագրողներին XC60-ի արտաճանապարհային հնարավորությունները ցուցադրելու համար: Իհարկե, այդպիսի հնարավորությունների XC60-ը լավ է տիրապետում, նշեմ, որ միայն լուսածերպը կազմում է 23 սմ. դա իր դասում ամենալավ ցուցանիշն է: Իսպանիայում ճանապարհներն այնքան լավն են եւ հարթ, որ մեր  երթուղում դժվար էր անանցանելի հատվածներ գտնել եւ տպավորություն կազմել XC60-ի արտաճանապարհային հնարավորությունների մասին: Մի քանի անգամ փորձեցի շեղվել ասֆալտից եւ որոշ ժամանակ քշել հողային ճանապարհով. մեքենան այդ շեղումներին շատ հանգիստ էր արձագանքում:

Գովասանքի այսքան խոսքերից հետո, որոնք իրոք անկեղծ են, ես, այնուամենայնիվ, կհիշատակեի կախոցի փոքր-ինչ չորության մասին: Մոտ 100 կմ/ժ արագությամբ վարելիս, հանդիպելով ասֆալտի որոշ անհարթությունների, այդ հանգամանքը բավականին զգացնել էր տալիս: Սակայն եթե դուք շատ փափուկ, ես կասեի, “մերսեդեսային” ոճի կախոցի երկրպագու չեք, ապա այդ թեթեւ չորությունը ձեզ չի անհանգստացնի:

Ուղիղ ասֆալտով վարելիս` փորձեցի ստուգել եւս մի համակարգ, որի մասին հպարտորեն պատմում էին Volvo-ի տեխնիկական անձնակազմի մասնագետները:

Վարորդին Նախազգուշացնող LDW համակարգ: Մոտ 70 կմ/ժ արագությամբ ընթանալիս` Հականի խորհրդով փորձեցի խախտել ճանապարհի աջ կողմի հոծ գիծը. LDW համակարգը ակնթարթորեն արձագանքեց` ձայնային ազդանշանով զգուշացնելով ճանապարհից շեղվելու մասին: LDW-ն աշխատում է 65կմ/ժ-ից բարձր արագությամբ ընթանալու դեպքում, երբ ինչ-ինչ պատճառով վարորդը, կորցնելով ուշադրությունը, չի կարողանում պահպանել ուղիղ ընթացքը: Այս դեպքում ճանապարհի այդ հատվածներին հետեւում է թվային հատուկ տեսախցիկը: Եվ ես կրկին պատկերացրեցի, թե որքան արդյունավետ կլիներ այս համակարգը Հայաստանում, որտեղ ոչ միայն գծերը վատ են գծված, այլ որոշ դեպքերում ընդհանրապես չեն երեւում: Ամեն դեպքում, պետք է հիշել, որ սրանք ընդամենը ժամանակակից լավ համակարգեր են, որոնք օգնում են անվտանգ երթեւեկել, եւ գիտակցելով, որ ձեր ավտոմեքենան համալրված է այսպիսի համակարգերով, պետք է պարզապես ուշադիր լինել:

Ճանապարհի այն հատվածներում, որտեղ թույլատրվում էր արագ ընթանալ, ես փորձարկեցի արգելակները. մոտ 150 կմ/ժ արագությամբ ընթանալով` բավականին ուժգին սեղմեցի արգելակը: Արձագանքն ակնթարթային էր` մեքենան առանց ցնցումների եւ շեղումների կանգնեց:

Ժամանակը արագ անցավ, XC60-ն իր յուրահատուկ մուգ տերրակոտային գույնով շատ ներդաշնակ էր դիտվում իսպանական փոքրիկ քաղաքների փողոցներռւմ եւ լեռնային լանդշաֆտներում: Լեռնային ոլորապտույտ ճանապարհներով հասանք Մաս դե Կանիսատի (Mas de Canicatti) վիլլան, իսկ ճաշելուց հետո վերադարձանք փորձադաշտ:

Ամփոփում

Եզրափակելով տպավորություններս, ասեմ, որ իմ կողմից փորձարկված ավտոմեքենաներից Volvo XC60-ը տեխնոլոգիապես ամենահագեցած, ամենաանվտանգն է: Կարծում եմ, այս քրոսովերը ոչ պակաս ուշադրություն կգրավի Հայաստանում. մեզ մոտ եւս քրոսովերների սիրահարները գնալով շատանում են: Երբ ինձ հարցնում են Volvo XC60-ից ստացված տպավորությունների մասին, առաջինը, ինչ ես ասում եմ, հետեւյալն է. “Խելացի մեքենա է եւ միաժամանակ գեղեցիկ”, ինչին, համաձայնեք, մեր ժամանակներում բավականին դժվար է հանդիպել:

Volvo-ն Հայաստանում` “Ֆորա” ընկերություն
Հեռ/Ֆաքս: +37410 61-03-44
http://www.fora.am/

Կարեն Անտոնյան
Mediamax - Auto.am
Վալենսիա – Երեւան

Լուսանկարները` Auto.am

Facebook Odnoklassniki

8896 դիտում