Վաղարշ Սահակյանը

 

Auto.am-ը սկսում է հարցազրույցների շարք ծագումով հայ ավտոմոբոլիային դիզայներների հետ:

Մեզ շատ էր հետաքրքրում, արդյոք խոշոր ավտոմոբիլային ընկերությունում աշխատում են մեր հայրենակիցները, թե ոչ: Պարզվեց, այդպիսի մարդիկ կան եւ բավականին մեծ հաջողությունների են հասել:

Մենք ընտրել ենք ավտոմոբիլային դիզայներների թեման, քանի որ այս ոլորտում ամենամեծ մրցակցությունն է աշխարհում, եւ այդ պատճառով այն հաջողությունները, որոնց հասել են մեր հայրենակիցները, էլ ավելի արժեքավոր են դառնում:

Մեր առաջին հարցազրույցը Վաղարշ Սահակյանի հետ է, ով աշխատում է Volskwagen-ում եւ զբաղվում է ինտերյեր-դիզայնով:

Նախագծերից մեկը, որի վրա աշխատել է Վաղարշը, Volkswagen Phideon մոդելն է, որը վերջերս ներկայացրել են Պեկինի ավտոսրահում:

- Վաղարշ, մինչեւ մեր զրույցի հիմնական թեմային անցնելը, խնդրում եմ, պատմեք Ձեր մասին: Որտե՞ղ եք ծնվել, մեծացել, սովորել, որքանո՞վ եք Ձեզ հայ զգում, արդյոք եղել եք Հայաստանում:

- Ես 28 տարեկան եմ, ծնվել եմ Ռուսաստանում՝ Ուրալում: 12 տարեկանում ընտանիքով տեղափոխվել ենք Եկատերինբուրգ:

Այնտեղ ես ընդունվեցի գեղարվեստական ուսումնարան՝ գրաֆիկական դիզայնի բաժին: 17 տարեկանում ընդունվել եմ ֆրանսիական Strate College-ի 2-րդ կուրս, իսկ 2009 թվականից աշխատում եմ Վոլսֆբուրգում՝ Volkswagen ընկերությունում:

Հայաստանում հաճախ եմ լինում, ընտանիքի անդամների մեծ մասն այստեղ է ապրում:

- Ե՞րբ Ձեզ մոտ առաջացավ արվեստով, նկարչությամբ զբաղվելու ցանկությունը եւ ե՞րբ զգացիք, որ ուզում եք զբաղվել ավտոմոբիլային դիզայնով:

- Որքան ինձ հիշում եմ, ես միշտ նկարել եմ: 15 տարեկան հասակում ես համոզված էի, որ ավտոդիզայնն իմ ապագան է: Դա տեւեց երկու տարի, եւ ես ընդունվեցի համալսարան՝ դրանով արդեն պորֆեսիոնալ զբաղվելու համար:

- Ինչու՞ ընտրեցիք ինտերյեր-դիզայնը:

- Ուսումնառության տարիներին մեզ սովորեցնում էին գլոբալ մոտենալ դիզայնի մշակմանը. Էքստերյեր, ինտերյեր, ինտերֆեյս եւ այլն: Դա ֆրանսիական դպրոցի ամենամեծ առավելություններից է: Վերջնական որոշումը ես կայացրեցի, երբ աշխատում էի իմ դիպլոմային աշխատանքի վրա VW-ում: Ես աշխատում էի ինտերյերի դիզայնի թմում եւ զուգահեռաբար մասնակցում էի ներքին նախագծերին: Այստեղ ես գործնականում հասկացա, թե որքան բազմակողմ է ինտերյերների ստեղծման աշխատանքը: Հենց այդ դժվարությունն էլ հրապուրեց ինձ:

C Coupe GTE


- Առաջին հայտնի ընկերությունը, որտեղ դուք սկսեցիք աշխատել, եթե չեմ սխալվում, PSA Centre Style Peugeot-ն էր: Ինչպե՞ս հայտնվեցիք այնտեղ:

- Այո, դա իմ առաջին ստաժավորման դասընթացն էր: Այն տեւեց չորս ամիս, իսկ վերջնական արդյունքը ներկայացվեց մակնիշի դիզայներների թմին:

- Ո՞ր նախագծի վրա էիք աշխատում PSA Centre-ում?

- Այստեղ ես աշխատում էի անձնական նախագծի վրա՝ Peugeot-ի նոր մոդել, որը մշակված էր ապագայի քաղաքների համար: Կոնցեպցիան կայանում էր առավելգույն բաց ավտոմեքենայում՝ թափքի ճկուն կառուցվածքով:

- Peugeot-ի եւ Citroen-ի շատ մոդելների դիզայնը համարվում է ավտոմոբիլային դիզայնի կատարյալ նմուշ: Նշենք, օրինակ, Citroen DS եւ Peugeot 406 Coupe-ն: Ո՞ր մոդելները դուք կառանձնացնեիք, հատկապես ինտերյերի տեսանկյունից:

- Եթե խոսենք ընդհանուր, ապա 60-70-ական թվականների բոլոր ինտերյերները, հատկապես վիզուալ հետաքրքրիր էին ամերիկյան ավտոարդյունաբերության օրինակները: Բայց անվտանգության եւ էրգոնոմիկայի կանոնների ի հայտ գալով շատ ինտերյերներ սկսեցին նմանվել իրար: Ճիշտ է, այսօր որոշակի է փոփոխություն է նկատվում, շատ մակնիշներ պայքարում են տեխնոլոգիաների մրցավազքում: Իսկ ինտերյերների կառուցվածքը փոխվում է այդ տեխնոլոգիաներին համահունչ:

- Ինչպե՞ս տեղափոխվեցիք VW:

- 2009 թվականին, համալասարանի վերջին կուրսում, ես հայտ ներկայացրի դիպլոմային գործնական դասընթացը Volkswagen-ում անցնելու համար եւ հրավեր ստացա: Պրակտիկայի ավարտից հետո ինձ աշխատանք առաջարկեցին նույն թմում:

- 2011 թվականից Դուք աշխատում եք Volkswagen Cross Coupe GTE եւ  C Coupe GTE կոնցեպտների վրա: Կոնկրետ ինչու՞մ է կայանում Ձեր աշխատանքը:

- Փոքրիկ ճշտում. վերը նշված կոնցեպտները ցուցադրվել են հանդիսատեսին 2015 թվականին, իսկ նրանց մշակման աշխատանքները մեկնարկել էին 2014թ.: Երկու կոնցեպտներն արտացոլում են VW-ի պոտենցիալ մոդելների տեսլականը: Cross Blue GTE-ն ցուցադրում է SUV-ի “էքստրեմալ” տարբերակը, ձեւաչափ, որը մենք ցուցադրել էինք Volkswagen Cross Blue եւ Volkswagen Cross Blue Coupe կոնցեպտներում: C Coupe GTE-ն, իր հերթին, թիզեր էր, որը պատկերում էր լյուքս դասի մոդելը: Ապրիլ ամսին Պեկինի ավտոսրահում ցուցադրվեց նրա սերիական մոդելը՝ Phideon-ը:



- Ինչպիսի՞ն է VW բրենդի փիլիսոփայությունը, ինչո՞վ է այն տարբերվում մյուս գերմանական ավտոարտադրողներից:


- Գերմաներենում կա սահմանում՝ zeitlos, որը հստակ արտահայտում է Volskwagen-ի դիզայնի փիլիսոփայությունը: Չհնացող, ժամանակից դուրս՝ դիզայն, որն արդիական կլինի, մինչեւ մրցակիցները նորացնում են մոդելների գրեթե 2 սերունդ, փորձելով ետ չմնալ տրենդերից:) Իկոնիկ դիզայնի լավ օրինակ է Golf MK 4. այն ոչ միայն առաջադեմ էր արտադրության մեկնարկի ժամանակ, այլեւ շատ լավ «ծերանում» էր: Իմ կարծիքով, նա այսօր էլ իսկական Volskwagen-ի տեսք ունի:

- Կարծիք կա, որ VW որոշ ավտոմեքենաների դիզայնը չափազանց կոնսերվատիվ է. այն շատ պրակտիկ է եւ հարմար, բայց փոքր-ինչ ձանձրալի: Ի՞նչ կասեք այդ կապակցությամբ:

- Իրականում, Vokswagen-ը լայն պորտֆոլիով մակնիշ է, եւ հետեւաբար ունի միմյանցից շատ տարբերվող հաճախորդներ եւ պետք է բավարարի դրանցից յուրաքանչյուրի նախասիրությունները: Առաջին անգամ նստելիս VW-ի ցանկացած ավտոմեքենան, մարդը պետք է ինտուտիվ հասկանա, թե ինչն ինչպես է աշխատում: «Ուսուցումը» պետք է սահմանափակվի մի քանի շարուժմներով եւ գործողություններով, ինչպես Apple-ի արտադրանքի դեպքում:

- Որքանո՞վ եք Դուք ազատ աշխատանքում: Ես նկատի ունեմ երեւակայությունը, կրեատիվը: Կա՞ն շրջանակներ, որոնցից չի կարելի դուրս գալ:

- Նախագծի աշխատանքը սկսելիս, մենք նախանշում ենք խնդիրները. ո՞ր շուկայի համար, ո՞ր հաճախորդի, եւ այլն: Բայց, ամեն դեպքում, ինչպես արդեն ասացի՝ դա պետք է լինի իսկական Volkswagen:

Cross Coupe GTE

Cross Coupe GTE

Cross Coupe GTE

Cross Coupe GTE

Cross Coupe GTE

Cross Coupe GTE

Cross Coupe GTE

Cross Coupe GTE

Cross Coupe GTE

Cross Coupe GTE


- Եթե ունենայիք գործելու լիակատար ազատություն, ի՞նչն արմատապես կփոխեիք VW ավտոմեքենաների ինտերյերի դիզայնում:

- Արմատական փոփոխությունների մասին խոսք չի գնում: Մակնիշի փիլիսոփայունն էր, որ ստիպեց ինձ մնալ այստեղ, եւ ես կրկին կվերադառնայի VW-ի ակունքներին:

- Նոր տեխնոլոգիաների ի հայտ գալով, կառավարման շատ էլեմենտներ կամ վերանում են, կամ վերափոխվում: Ցայտուն օրինակ են թաչ-դիսփլեյները, օրինակ, Tesla-ի կամ Volvo-ի ինտերյերներում: Ի՞նչ եք կարծում, դա հեշտացնում է կառավարումը, թե պարզապես ժամանակի տրենդ է:

- Դա տրենդ չէ, ավելի շուտ՝ իրականություն: Մարդն ակնկալում է ավտոմեքենայում ունենալ այն, ինչ օգտագործում է առօրյա կյանքում: Քանի դեռ մեր աշխատանքը, ուսուցումը, ժամանցը կապված են touch-ի հետ, նույնը մենք կգտնենք նաեւ մեր ավտոմեքենաներում, պարզապես, այլ չափսերով եւ ձեւաչափերով: Իսկ հաշվի առնելով virtual reality-ի, augmented reality-ի, հոլոգրաֆիկ պրոյեկցիաների զարգացումը՝ ամենահետաքրքիրը դեռ առջեում է:

- Ավտոմեքենայի ինտերյերի դիզայնի ո՞ր էլեմենտն է ամենադժվարը մշակել՝ էրգոնոմիայի տեսանկյունից:

- Ես կասեի՝ վարորդի աշխատատեղն ընդհանուր առմամբ: Այստեղ խաչվում են ամեն ինչ. էրգոնոմիկան, տեխնոլոգիաները, նյութերի որակը…

- Ավտոմեքենաների դիզայնի մշակումն ամենադժվարն է համարվում արդյունաբերական դիզայնի աշխարհում: Կարելի է մատների վրա հաշվել մարդկանց, որոնք ավտոմեքենաների դիզայնի ապագայի տեսլական ունեն: Ի՞նչ եք կարծում, ինչպիսի՞ն կլինի ավտոմեքենաների դիզայնը ապագայում:

- Պատկերացրեք, մոտ ապագայի ավտոմեքենաներից օգտվելու են նրանք, ովքեր այսօր 10-15 տարեկան են: Նրանք ամենաճիշտ պատասխանը կտան Ձեր հարցին:

- Ավտոմեքենաների դիզայներներից ո՞վ է Ձեզ ոգեշնչում:

- Ես հետեում եմ շատ մարդկանց աշխատանքին: Ոմանց հետ պատիվ ունեմ աշխատել ամեն օր: Առանց անունների:

- Ի՞նչ ավտոմեքենա եք վարում: Դա Volkswage՞n է:

- Իհարկե, VW.

- Իսկ ձեզ թույլատրվու՞մ է այլ մեքենա վարել (իհարկե, ոչ ուղիղ մրցակցի արտադրության):

- Կարելի է ցանկացած մեքենա վարել, այս հարցում այստեղ լիբերալ մոտեցում է:

- Ի՞նչ խորհուրդ կտաք սկսնակներին, ովքեր որոշել են ավտոմոբիլային դիզայներ դառնալ: Գուցե, խորհուրդներ ձեր փորձից, կամ դիզայնի հայտնի դպրոցներ:

- Ավտոդիզայնի աշխարհը ծայրաստիճան փոքր է: Ավելորդ մարդիկ այստեղ երկար չեն մնում: Ջանասիրություն, իրազեկվածություն, լեզուների իմացություն՝ ահա հաջողակ ուսանողի նվազագույն զինանոցը: Այսօրվա հսկայական առավելություններից մեկն այն է, որ դպրոցների, դասընթացների, դիզայներների մասին ողջ տեղեկատվությունը ստանալու համար պետք է ընդամենը 2-3 click անել: Ով փնտրում է, միշտ կգտնի:)

 

Վաղարշ Սահակյանի հետ զրուցել է Կարեն Անտոնյանը: