Հայաստանի ավտոշուկան արդեն բավականին բազմազան է. այստեղ ներկայացված են ամենահայտնի եւ մասայական մակնիշները: Այստեղ արդեն կարելի է գտնել ինչպես բյուջետային մոդելներ` չինական, կորեական եւ ճապոնական ավտոարտադրողների կողմից, այնպես էլ պրեմիում դասի ավտոմեքենաներ գերմանական, շվեդական եւ ճապոնական մակնիշների կողմից:

Այսօր մենք ցանկացել ենք անդրադառնալ բյուջետային դասի ավտոմեքենաներին, որոնք ներկայացված են Հայաստանում գործող ավտոդիլերների սրահներում: Եթե իհարկե հնարավոր է 6.500.000 դրամ արժողությամբ ավտոմեքենան բյուջետային համարել Հայաստանում: Այնուամենայնիվ, մենք որոշեցինք պարզել, եթե ավտոսիրողը, որոշել է գնել նոր ավտոմեքենա ավտոսրահից, ապա ինչ առաջարկներ են սպասում նրան:

Ձեզ ենք ներկայացնում մեր էքսպրես-հետազոտության արդյունքները: Հետազոտության պայմանները հետեւյալն են. ավտոմեքենան պետք է լինի նոր, պաշտոնական դիլերի ավտոսրահից, գինը չգերազանցի 10.000.000 դրամը եւ ունենա ապառիկ գնման հնարավորություն:

Սկսենք եվրոպական մակնիշներից:

Ֆրանսիական Renault-ի ավտոսրահում դուք կարող եք գնել Logan մոդելը (որի մասին մենք գրել էինք մեր թեսթ-դրայվում http://www.auto.am/am/news/17406/)` 1.2 լիտր ծավալով բենզինային շարժիչով, 73 ձիաուժ հզորությամբ, մեխանիկական փոխանցման տուփով, եւ նույնիսկ կոնդիցիոներով: Ավտոմեքենան կարժենա 5.700.000 դրամ (ցանկացած բանկի միջոցով կարելի է գնել 5-7 տարի մարման ժամկետով, 15% կանխավճարով եւ 15% տարեկան տոկոսադրույքով): Renault-ն Հայաստանում ներկայացնում է «Մեգնա» ընկերությունը` http://www.renault.am/:

Եթե դուք նախընտրում եք մեկ այլ ֆրանսիական մակնիշ Peugeot-ն, ապա ամենամատչելի մոդելը` 107-ը, ավտոսրահում ձեզ կառաջարկեն 5.850.000 դրամով, որի դիմաց դուք կստանաք 1.0 լիտր ծավալով բենզինային շարժիչ, 68 ձիաուժ հզորություն, մեխանիկական փոխանցման տուփ եւ կոնդիցիոներ: Ավտոմեքենան հնարավոր է գնել ապառիկ ցանկացած բանկի միջոցով` 5-7 տարի մարման ժամկետով, 15% կանխավճարով, 15% տարեկան տոկոսադրուքով: Peugeot-ն Հայաստանում ներկայացնում է «Կարկոմավտո» ընկերությունը` http://www.peugeot.am:

Skoda մակնիշը, որը պատկանում է Volkswagen Group-ին, Հայաստանում ձեզ կառաջարկի իր ամենաբյուջետային մոդելը` Fabia-ն, 1.2 լիտր ծավալով բենզինային շարժիչով, 60 ձիաուժ հզորությամբ, մեխանիկական փոխանցման տուփով եւ կոնդիցիոներով: Գինը` 6.119.000 դրամ (ՎՏԲ-Հայաստան Բանկի, Յունիբանկի, Կոնվերս Բանկի կամ հաճախորդի ներկայացված բանկի միջոցով կարելի է գնել 5-7 տարի մարման ժամկետով, 10% կանխավճարով եւ 15% տարեկան տոկոսադրուքով): Skoda-ն Հայաստանում ներկայացնում է «Վալթի Մոթորս» ընկերությունը` http://www.skoda.am:

Գերմանական մակնիշների երկրպագուները կարող են դիմել Volkswagen-ի ավտոսրահ, որտեղ նրանց կառաջարկեն VW Polo` 1.2 լիտր ծավալով բենզինային շարժիչով, 60 ձիաուժ հզորությամբ, մեխանիկական փոխանցման տուփով, առանց կոնդիցիոների: Գինը` 6.650.000 դրամ (բանկի միջոցով կարելի է գնել 5-7 տարի մարման ժամկետով, 10% կանխավճարով եւ 15% տարեկան տոկոսադրույքով): Volkswagen-ը Հայաստանում ներկայացնում է «Եվրովագեն» ընկերությունը` http://www.eurowagen.am/:

Ճապոնական մակնիշներն ավելի լայն են ներկայացված Հայաստանում, նրանց շուկայական բաժինն ամենամեծն է եւ նրանք ամենամասայականն են ներկա պահին:

Ճապոնական ամենահայտնի մակնիշը Toyota-ն ձեզ կառաջակի իր ամենահայտնի եւ մասայական մոդելը` Corolla-ն, հետեւյալ կոմպլեկտավորմամբ. 1.4 լիտր ծավալով բենզինային շարժիչ, 101 ձիաուժ հզորություն, մեխանիկական փոխանցման տուփ, կոնդիցիոներ, գինը` 8.750.000 դրամ (բանկի միջոցով կարելի է գնել 5-7 տարի մարման ժամկետով, 20% կանխավճարով եւ 15% տարեկան տոկոսադրույքով): Հատուկ ակցիա Ամերիաբանկի հետ` 10% կանխավճարով: Toyota-ն Հայաստանում ներկայացնում է «Տոյոտա Երեւան» ընկերությունը` http://www.toyota.am/:

 


Toyota Corolla

 

Հայկական շուկայում երեւի թե ամենաակտիվ եւ մասայական ավտոմակնիշը` Nissan-ը, իր ավտոսրահում առաջարկում է 2012 թվականի արտադրության Micra մոդելը` 1.2 լիտր ծավալով բենզինային շարժիչով, 79 ձիաուժ հզորությամբ, մեխանիկական փոխանցման տուփով, կոնդիցիոներով: Գինը` 5.700.000 դրամ (բանկի միջոցով կարելի է գնել 5-7 տարի մարման պայմանով, 15% կանխավճարով եւ 15% տարեկան տոկոսադրույքով): Nissan-ը Հայաստանում ներկայացնում է «Մուրան» ընկերությունը` http://www.nissan.am:

Հայաստան վերջերս եկած ճապոնական եռյակի վերջին մակնիշը` Honda-ն, կարող է ձեզ առաջակել իր ամենահայտնի քաղաքային ավտոմեքենաներից մեկը` Jazz-ը, 1.5 լիտր ծավալով բենզինային շարժիչով, 118 ձիաուժ հզորությամբ, ավտոմատ փոխանցման տուփով, կոնդիցիոներով: Գինը` 9.744.000 դրամ (բանկի միջոցով կարելի է գնել 5-7 տարի մարման պայմանով, 10% կանխավճարով եւ 15% տարեկան տոկոսադրույքով): Honda-ն Հայաստանում ներկայացնում է «Գրանդ Մոթորս» ընկերությունը` http://www.honda.am:

 


Honda Jazz

 

Եվս մեկ հայտնի «ճապոնացի» Suzuki մակնիշն առաջարկում է իր սուպերհիթը` Swift մոդելը, 1.2 լիտրանոց ծավալով բենզինային շարժիչով, ամենաբարձր կոմպլետավորմամբ, 94 ձիաուժ հզորությամբ, ավտոմատ փոխանցման տուփով, կոնդիցիոներով: Գինը` 8.500.000 դրամ (բանկի միջոցով կարելի է գնել 7 տարի մարման ժամկետով, 10% կանխավճարով եւ 15% տարեկան տոկոսադրույքով): Suzuki-ն Հայաստանում ներկայացնում է «Ռոյալ Մոթորս» ընկերությունը` http://www.suzuki.am/:

Հիմա անցնենք ագրեսիվ “կորեացիներին”` վերջին տարիների հայկական շուկայի ամենադինամիկ վաճառվող մակնիշներին, որոնք ավտոսիրողներին գրավել են իրենց ագրեսիվ գնային քաղաքականությամբ, սլացիկ դիզայնով եւ ճապոնացիներին գրեթե չզիջող որակով:

Հարավկորեական ավտոարդյունաբերությունը Հայաստանում ներկայացված է Kia եւ Hyundai մակնիշներով: Կարելի է ասել, որ դրանք գրեթե նույն ավտոմեքենաներն են, ստեղծված են նույն հարթակի վրա, նույն տեխնոլոգիաներով եւ գրեթե նույն գնային սեգմենտում են: Hyundai-ն ավելի մոտ է պրեմիում դասին, զարմանալի չէ քանի որ այս երկու մակնիշները պատկանում են նույն ընտանիքի անդամներին:

Kia մակնիշի երկերպագուները կարող են գնել փոքրիկ Picanto-ն` 1.0 լիտր ծավալով բենզինային շարժիչով, 69 ձիաուժ, մեխանիկական փոխանցման տուփով, առանց կոնդիցիոների: Գինը` 5.000.000 դրամ (բանկի միջոցով կարելի է գնել 5-7 տարի մարման ժամկետով, 10% կանխավճարով եւ 15% տարեկան տոկոսադրույքով): Kia-ն Հայաստանում ներկայացնում է «Կիա Մոթորս Արմենիա» ընկերությունը` http://www.kia.am/ :

Hyundai-ի սիրահարները կարող են գնել i10 մոդելը, որը հավաքված է Kia Picanto-ի հետ նույն հարթակի վրա, 1.1 լիտրանոց ծավալով բենզինային շարժիչով, 66 ձիաուժ հզորությամբ, առանց կոնդիցիոների, մեխանիկական, փոխանցման տուփով: Մոդելը կարժենա 5.200.000 դրամ (բանկի միջոցով կարելի է գնել 5-7 տարի մարման ժամկետով, 10% կանխավճարով եւ 15% տարեկան տոկոսադրույքով): Hyundai-ն Հայաստանում ներկայացնում է «Մագաս Ինվեսթ» ընկերությունը` http://www.hyundai-motor.am/:

Պայմանականորեն ամերիկյան Chevrolet-ն եւ Ford-ը նույպես առաջարկելու բան ունեն հայ ավտոսիրողներին: Պայմանականորեն, քանի որ Chevrolet մակնիշի Aveo մոդելն արտադրվում է Հարավային Կորեայում, իսկ Ford-ի ամբողջ մոդելային շարքը, որ ներկայացված է Հայաստանում, արտադրվում է եւ ներմուծվում Գերմանիայից:

Կորեական արտադրության Chevrolet ամենաէժան մոդելը Aveo-ն է, ավտոսրահում այն կառաջարկեն ձեզ 6.300.000 դրամով, կոմպլեկտավորումը հետեւյալն է. 1.2 լիտր ծավալով բենզինային շարժիչ, 70 ձիաուժ հզորություն, առանց կոնդիցիոների, մեխանիկական փոխանցման տուփ (բանկի միջոցով կարելի է գնել 5-7 տարի մարման ժամկետով, 15% կանխավճարով եւ 15% տարեկան տոկոսադրույքով): Chevrolet-ն Հայաստանում ներկայացնում է «Վեկար» ընկերությունը` http://www.chevrolet-am.com/:

Ford մակնիշը Հայաստանում առաջարկում է իր եվրոպական հիթը` Fiesta մոդելը, 1.6 լիտր ծավալով բենզինային շարժիչով, 105 ձիաուժ հզորությամբ, կոնդիցիոներով եւ կլիմատ կոնտրոլով, ավտոմատ փոխանցման տուփով, գինը` 8.950.000 դրամ (բանկի միջոցով կարելի է գնել 5-7 տարի մարման ժամկետով, 15% կանխավճարով եւ 15% տարեկան տոկոսադրույքով): Հատուկ երաշխիքաին պայմաններ, ամեն 6000 կմ անվճար փոխվում են յուղը եւ ֆիլտրը: Ford-ը Հայաստանում ներկայացնում է «Ֆորա» ընկերությունը` http://www.fora.am/:

Չինական ավտոարտադրող BYD մակնիշը իր A դասի փոքրիկ 1.0 լիտրանոց F0 մոդելը առաջարկում է 67 ձիաուժով, մեխանիկական փոխանցման տուփով եւ կոնդիցիոներով, ընդամենը 3.900.000 դրամով (բանկի միջոցով կարելի է գնել 5 տարի մարման ժամկետով, 10% կանխավճարով եւ 15% տարեկան տոկոսադրույքով BYD -ն Հայաստանում ներկայացնում է «Քեթրին Գրուպը»` http://www.byd.am/:

 


BYD F0

 

Իսկ եթե դուք նախըտրեք ռուսաստանյան արտադրության ավտոմեքենա, ապա ամենաէժան տարբերակը կլինի Vaz 2114 մոդելը` 1,5 լիտր ծավալի բենզինային շարժիչով, 76 ձիաուժ հզորությամբ, առանց կոնդիցիոների: Գինը` 4.350.000 դրամ: Vaz-ը Հայաստանում ներկայացնում է «Գլոբալ Մոթորս» ընկերությունը` http://www.lada.am/:

Ամփոփելով մեր էքսպրես-հետազոտության արդյուքները կարող ենք նշել` ամենաէժան ավտոմեքենան ավտոսրահից կարժենա 3.9000,000 դրամ` չինական BYD մակնիշի F0 մոդելը, ամենաթանկը մեր ցուցակում Honda Jazz-ն է` 9.744.000 դրամ: Եթե վերցնենք միջին գները, ապա Հայաստանում ավտոսրահից նոր ավտոմեքենա գնելու համար պետք է պատրաստ լինեք վճարել 6.500.000 դրամ (մոտ 16.000 ԱՄՆ դոլար):