Վերջին Mercedes SLR McLaren կցուցադրեն Դեթրոյտում

Հաջորդ տարվա հունվարին Դեթրոյտի ավտոսրահում կկայանա Mercedes-Benz SLR McLaren Stirling Moss էքսկլյուզիվ սփիդստերի պրեմիերան: Մեքենան ստեղծվել է սըր Սթիրլին Մոսսի պատվին, որը նախորդ դարի 50-ական թվականներին մասնակցում էր գերմանական մակնիշի մրցարշավներին եւ մինչ այժմ համարվում է աշխարհի ամենալավ մրցարշավորդներից մեկը: Բացառիկ սուպերավտոմեքենան կթողարկվի սահմանափակ` 75 թվաքանակով եւ կդառնա SLR ընտանիքի ամենավերջին ավտոմեքենան, որը ստեղծվել է Mercedes-ի եւ McLaren-ի համագործակցության շրջանակներում:

Նորույթը ստացել է 650-ուժանոց 5,5 լիտրանոց V8 շարժիչ, որն աշխատում է 5-աստիճան մեխանիկական փոխանցման տուփով: Արտադրողի տվյալներով, մինչեւ 100 կմ/ժ արագություն Mercedes SLR McLaren Stirling Moss-ը զարգացնում է 3,5 վայրկայնում, իսկ առավելագույն արագությունը կազմում է 350 կմ/ժ: Նշենք, որ սփիդստերի ողջ տեխնիկական հագեցվածությունը փոխառված է սովորական SLR-ից եւ հիմնական տարբերությունները վերաբերվում են թափքին, որն ամբողջությամբ պատրաստված է կարբոնից եւ չունի ոչ ծալվող առաստաղ, ոչ դիմային ապակի:
 
Հիշեցնենք, որ սովորական SLR-ների արտադրությունը կավարտվի 2009 թվականի մայիսին, սակայն Stirling Moss-ի բացառիկ տարբերակի թողարկման համար, որը կսկսվի հունիսին, Mercedes-ի եւ McLaren-ի համագործակցությունը կշարունակվի մինչեւ դեկտեմբեր: Սփիդստերի արժեքը կկազմի 750 հազար եվրո:
 

Facebook Odnoklassniki

3183 դիտում