Like
OK
Կայացավ Renault Arkana մոդելի պաշտոնական շնորհանդեսը
Դիլերներ
Auto.am կայքին արդեն ավանդաբար հրավիրում են մասնակցելու հանրահայտ ավտոբրենդերի նոր մոդելների թեստ-դրայվներին: Այս անգամ հրավիրել էր Ford ընկերության Եվրոպական ստորաբաժանումը` ներկայացնելու նոր Fiesta մոդելը: Հայաստանում Ford-ի պաշտոնական ներկայացուցիչ “Ֆորա” ընկերության շնորհիվ մեզ հնարավորություն ընձեռնվեց ծանոթանալու նոր Ford Fiesta-ին:
Մինչ նոր Fiesta-ից ստացված տպավորությունների մասին խոսելը, երկու խոսքով նշեմ, թե ինչ նշանակություն ունի այս մոդելը Ford-ի համար:
Fiesta-ի նկատմամբ Ford ընկերությունը հատուկ վերաբերմունք ունի: «Ford Fiesta-ն մեր “հացն ու կարագն է”, - այսպես արտահայտվեց Ford-ի եվրոպական մասնաճյուղի ներկայացուցիչը: Եւ այս խոսքերը պատահական չեն. 30 տարուց ավելի այս մոդելը վաճառվում է Եվրոպայում, իսկ ընդհանուր առմամբ 1976 թվականից վաճառվել է 12 միլիոն Fiesta: Խոսքն արդեն թողարկված 5 սերունդների Fiesta-ի մասին է:
Ford ընկերությունը այս մոդելի հետ շատ մեծ հույսեր է կապում: Ընկերությունում խոստացել էին, որ փոփոխությունները կվերաբերվեն, ոչ միայն տեխնիկական մասին եւ ոճին, այլեւ անվանը: Բոլորը կարծում էին, որ Fiesta անունը կփոխարինվի նոր Fiesta-ի հիմք հանդիսացած Verve կոնցեպտի, կամ մեկ ուրիշ անվանմամբ: Սակայն հետո որոշվեց թողնել նույն անունը, քանի որ այն լավ ճանաչված եւ սիրված է Ford մակնիշի երկրպագուների կողմից:
Ինչեւէ, մեքենան արդեն արտադրվում է եւ վաճառվում որոշ երկրներում, օրինակ, Ford-ի համար մեծ կարեւորություն ներկայացնող Ռուսաստանում:
Ford Verve-ից` նոր Fiesta
Առաջին հայացք
Ford ընկերության Եվրոպական մասնաճյուղը գտնվում է գերմանական Քյոլն քաղաքում, սակայն լրագրողներին հրավիրել էին մայրաքաղաք Բեռլին, ինչպես նշեցին կազմակերպիչները` «Fiesta-ի կարեւորությունը հատուկ շեշտելու համար»:
Ավտոմեքենաները մեզ սպասում էին հենց օդանավակայանի կայանատեղիում: Ինձ մոտ մտավախություն կար. կհավանեմ արդյո՞ք առաջին հայացքից նոր Fiesta-ն, թե՞ ոչ: Բավականին դրական արձագանքներ էի կարդացել նոր Fiesta-ի մասին մինչ Բեռլին մեկնելը եւ կրկնակի հետաքրքիր էր, թե ինչպիսի՞ն կկլինեն առաջին տպավորություններս:
Ինչպես ընդունված է, թեստ-դրայվների ժամանակ արտադրողը միշտ ձգտում է ներկայացնել մոդելի ամենահարուստ կոմպլեկտացիան: Մեզ սպասում էին շարժիչի 1,6 ծավալով բենզինային եւ դիզելային Ghia եւ Titanum տարբերակները: Այս երկու տարբերակների միջեւ տեխնիկական տարբերություն չկա, պարզապես Ghia-ն ավելի մեղմ ու հանգիստ երանգներով է մշակված, իսկ Titanum տարբերակը ներկայացված է hi-tech ոճով:
Ինձ բաժին ընկավ 5-դռնանի բենզինային շարժիչով 1,6 լ. Fiesta-ի Titanum տարբերակը: Մտավախություններս անհիմն էին: Առանց չափազանցնելու ասեմ, որ Fiesta-ն միանգամից ուշադրություն է գրավում: Աչքի են ընկնում Ford-ի արդեն հայտնի կինետիկային դիզայնի մաս կազմող լուսարձակները, որոնք առաջին անգամ օգտագործվել էին նոր Mondeo-ի վրա: Ընդհանրապես, “կինետիկային դիզայն” բառակապակցությունը բավականին շատ էին նշում Ford ընկերության ներկայացուցիչները: Ford of Europe-ի գլխավոր դիզայներ Քրիս Բրեդի (Kris Brad) բացատրությամբ “կինետիկ” ենթադրում է թեթեւ, սլացիկ եւ տպավորող (expressive). նույնիսկ անշարժ վիճակում ավտոմեքենան թվում է, թե ընթացքի մեջ է:
Մի խոսքով, նոր Fiesta-ն արտաքինից ինձ դուր եկավ, որովհետեւ այն իսկապես նոր է, տպավորիչ եւ աչքի ընկնող: Համեմատելով նախկին սերնդի Fiesta-ի հետ` կարելի է ասել, որ տարբերությունն անհամեմատելի է: Իմ կարծիքով, նոր Fiesta-ն հենց դիզայնի շնորհիվ է ներգրավելու նոր գնորդներին:
Իսկ ինչպիսի՞նն է ներսում
Սա այն դեպքերից մեկն է, երբ համեմատելով արտաքին տեսքը մեքենայի ներքին հարդարանքի հետ, հիասթափություն չես ապրում: Նոր Fiesta-ն ներսում ստացվել է ոչ պակաս շքեղ, քան արտաքինից: Ներքին հարդարման գունային երանգների համար օգտագործված նյութերը իսկապես որակյալ են:
Հատուկ կցանկանայի կենտրոնանալ դիմային վահանակի դիզայնի վրա: Ford ընկերությունը դեռ նոր Mondeo-ի ստեղծման փուլում սկսել էր համագործակցել ֆիննական Nokia ընկերության հետ: Այդ համագործակցության արդյունքը միանգամից աչքի է ընկնում Fiesta-ի ներսում, երբ նայում ես կենտրոնական վահանակին: Կոճակների դասավորությունը եւ դիզայնը հիշեցնում է Nokia հեռախոսների ոճը: Վահանակի վերին մասում գտնվում է միջին չափերի LCD էկրան, որն արտացոլում է այդ րոպեին օգտագործվող ֆունկցիաները: Ներքեւում սիմետրիկ տեղավորված են մեքենայի աուդիո համակարգի կոճակները` ձախ կողմից: Ի դեպ, դինամիկների ձայնը բավականին հաճելի էր ու յուրահատուկ ֆանեռային ձայն չուներ: Վահանակի աջ կողմում ձեր բջջային հեռախոսի համար նախատեսված կոճակներն են. bluetooth համակարգով կարող եք հեռախոսը կապել ավտոմեքնայի համակարգի հետ: Իսկապես, ժամանակակից օգտակար ֆունկցիա, որն ավելի է հեշտացնում վարորդի կյանքը: Եւս մեկ ժամանակակից ապրելակերպի մաս` USB միացման կետ, գտնվում է փոխանցման տուփի վահանակի մոտ, որն օգտագործեցինք իմ գերմանացի գործընկերոջ հետ մեքենան վարելու ժամանակ:
Ինձ բավականին հաջողված թվաց եւս մեկ լուծում վահանակի կառուցվացքում: Fiesta-ի ինտերյերի դիզայներները կլիմատ կոնտրոլի ղեկավարման էլեմենտները առանձնացրել են ընդհանուր մասից` իջեցնելով փոխանցման տուփի վահանակի մակարդակին, ինչը շատ է հեշտացնում այդ համակարգի ղեկավարումը մեքենան վարելիս:
Եվ ամենագլխավորը` ղեկը եւ դիմացի վահանակը: Կաշեպատ ղեկը հարմար տեղավորվում է ձեռքերի մեջ: Դիմացի վահանակին բոլոր անհրաժեշտ տվյալները լավ կարդացվում են: Ղեկից կարելի է ղեկավարել աուդիո համակարգի եւ կրուիզ կոնտրոլի համակարգերը: Մի խոսքով, վարորդի նստատեղի էրգոնոմիկան լավ է մշակված:
Միակ բանը, որն ինձ անհարմար թվաց, դա power կոճակի տեղն էր` հենց ղեկի ետեւում, աջ կողմից: Անհարմար էր ամեն անգամ աջ ձեռքով շոշափելով գտնել կոճակը, քանի, որ երբ ղեկը քիչ թեքված էր, այն չէր երեւում:
Ամեն դեպքում, նույն դրական տպավորություններով սեղմեցի այդ կոճակը եւ շարժիչը զարթնեց. ժամանակն էր փորձարկել մեքենան ճանապարհին:
Ընթացքում
Քանի որ Հայաստանը ներկայացված էր միայն Auto.am-ով, որպես ուղեկից ինձ միացավ Ford of Europe-ի PR-մենեջեր Հանս Յուրգենը (Hans Juergen): Ինչպես արդեն նշել էի, ինձ հատկացրել էին 1.6 լ. բենզինային Titanium տարբերակը` մեխանիկական փոխանցման տուփով (Ford-ը խոստանում է շուտով ներկայացնել ավտոմատ փոխանցման տուփով տարբերակը): Կապելով անվտանգության գոտին, մենք բավականին արագ լքեցինք Բեռլինի Թեգել օդանավակայանը:
Ըստ ծրագրի, առաջին օրը պետք է վարեինք մոտ 70 կիլոմետր` մեծ մասամբ Բեռլինից դուրս: Ford-ի ներկայացուցիչները հատուկ էին այդպես կազմել ծրագիրը` ցուցադրելու համար, որ Fiesta-ն, լինելով քաղաքային ավտոմեքենա, ոչ պակաս վստահ է իրեն զգում գերմանական ավտոբաներում: Գերմանիան միակ եվրոպական երկիրն է, որտեղ դեռ կարելի է ճանապարհներին բավականին արագ վարել, ինչից եւ ես օգտվեցի: 120–150կմ/ժ արագությամբ վարելիս չկար այն զգացողությունը, որ նստած ես կոմպակտ դասի ավտոմեքենայում, որի երկարությունը 4 մետրից էլ քիչ է: Fiesta-ն վստահ հպվում էր ասֆալտին, իսկ ղեկի հետադարձ կապը թույլ էր տալիս ճիշտ զգալ ճանապարհը` մեքենաները ժամանակին շրջանցելու համար: Հատուկ նշեմ նստատեղի հարմարությունը. կողային հենակները լավ օգնում են, երբ արագ ընթացքի ժամանակ անցնում էի դիմային մեքենաներին` փոքր-ինչ թեքվելով ընթացքում: Վարելիս հատուկ ուշադրությամբ լսում էի. որքանո՞վ են արտաքին ձայները ներթափանցում սրահ: Կարդացել էի, որ նոր Fiesta-ի ձայնամեկուսացմանը Ford-ում ավելի մեծ ուշադրություն են դարձրել: Նույնիսկ 150 կմ/ժ արագության ժամանակ սրահում բավականին հարմարավետ էր, իսկ երբ միացնում էի աուդիո համակարգը, արտաքին աղմուկը գրեթե անլսելի եր դառնում:
Ծրագրի առաջին մասը բավականին արագ անցավ, ընդմիջման ժամանակ մենք այլ երկրներից ժամանած գործընկերներիս հետ պայմանավորվել էինք, որ կփոխվենք ավտոմեքենաներով, եւ այժմ ինձ հասավ 1,6 ծավալով դիզելային 5 դռնանի հեթչբեքը փորձարկելու հերթը:
Բեռլինյան եղանակը բավականին մռայլ էր, եւ ռեստորանում նստած պատուհանից դուրս նայելիս միակ վառ եւ ուրախ բանը բակում կանգնած պայծառ գույներով ներկված Fiesta-ներն էին:
Ես հատուկ չէի ներկայացրել բեզնինային շարժիչի մասին իմ տպավորությունները քանի որ դիզելային տարբերակն ինձ անսպասելիորեն ավելի շատ տպավորեց: Իհարկե, 1,6 բենզինայինը բավական հզոր էր, բայց երբ նստեցի դիզելային Fiesta-ն եւ վարեցի առաջին 5-6 կիլոմետրերը, հաճելիորեն զարմացա. որքան փափուկ ու ճկուն էր աշխատում շարժիչը փոխանցման տուփի հետ միասին: Փոխանցումները կատարվում էին մեղմ ու հաստատուն: Շարժիչը չէր “խեղճանում” նույնիսկ այն դեպքերուն, երբ հատուկ փորձում էի “խեղճացնել” այն` փոխանցման տուփի 3 դիրքերում վարելիս այնպիսի տպավորություն էր, թե վարում ես ավտոմատ տուփով մեքենա: Մի խոսքով, դիզելային տարբերակը շատ հավանեցի, նույնիսկ այն դեպքում, որ այն քիչ ավելի աղմկոտ էր բենզինայինի համեմատ, ինչը բնական է: Ցավոք, Հայաստանում դիզելային վառելիքի որակը եւ գինը դեռ չեն համապատասխանում միջազգային չափանիշներին:
Այժմ ընթացային մասի վերաբերյալ: Իհարկե, Գերմանիաում բավականին դժվար է գտնել անհարթ ճանապարհ, առավել եւս` քաղաքում: Այնուամենայնիվ, ծայրամասերում տեղ-տեղ հանդիպում էին ճանապարհներ, որոնք հիշեցնում էին Հայաստանի մայրուղիների անհարթ հատվածները: Եթե գնահատենք Fiesta-ն անհարթությունների կլանման տեսանկյունից 5 բալանոց սանդղակով, ապա ես կնշանակեի հաստատուն 4 թվանշանը, ինչը կարծում եմ բավականին լավ ցուցանիշ է քաղաքային կոմպակտ դասի ավտոմեքենայի համար: Ընդհանուր առմամբ, եթե շատ պահանջկոտ չեք, ապա ընթացային մասի փափկությունը ձեզ դուր կգա:
Մրցակիցները
Եվրոպական շուկայում նոր Fiesta-ի գլխավոր մրցակիցներն են Opel Corsa-ն, Peugeot 307-ը: Համենայնդեպս, Ford ընկերությունում այդպես են ներկայացնում: Ինչ վերաբերվում է Հայաստանում Fiesta-ի մրցակիցներին, ապա դրանք քիչ ավելի շատ են` Peugeot 307, VW Polo-ն եւ Kia Cee’d-ը, որի վաճառքները կսկսվեն գարնանը: Opel Corsa-ն Հայաստանում դեռ չի վաճառվում. պաշտոնապես գերմանական արտադրողի արտադրանքը կներկայացվի մոտ մեկ տարի անց:
Ինչ կարժենա
Իմ ուկրաինացի գործընկերների հետ բեռլինյան ռեստորաններից մեկում ընթրելիս, կիսում էինք մեր տպավորությունները նոր Ford Fiesta-ի մասին: Եկանք այն եզրակացության, որ ավտոմեքենան մի քանի լուրջ քայլեր է կատարել` դառնալով ավելի գեղեցիկ, սրահում օգտագործված նյութերը ավելի որակյալ են: Միանշանակ, նոր Fiesta-ն դուր կգա գնորդներին, նույնիսկ նրանց, որոնք մինչ այս մոդելը առանձնապես ուշադրություն չէին դարձնում Ford-ի արտադրանքին: Սակայն մնում է պարզել մեկ շատ կարեւոր հարց` գինը: “Ֆորա” ընկերությունում մեզ հայտնեցին, որ արդեն ստացել են առաջին պատվերները, իսկ մեքենաները Հայաստանում կլինեն հունվարի վերջին:
Վերջին տարիներին “Ֆորա” ընկերությունը ցուցադրում է վաճառքների կայուն աճ: Եվ դա առաջին հերթին երիտասարդ եւ պրոֆեսիոնալ մասնագետների շնորհիվ, որոնց ակտիվ եւ լավ իմաստով ագրեսիվ մարկետինգային քայլերը նպաստում են վաճառքների բավականին տպավորիչ արդյունքների արձանագրմանը:
Սպասենք եւ տեսնենք, թե ինչպես մեր հայ գնորդը կարձագանքի նոր Fiesta-ին: Մանրամասն տեղեկություններ Ford մակնիշի մասին եւ կոնկրետ նոր Fiesta-ի մասին, կարող եք ստանալ “Ֆորա” ընկերությունում (www.fora.am):
Ծանուցումներ
Ծանուցումներ ստանալու համար անհրաժեշտ է մուտք գործել Ձեր հաշիվ։
