Rolls-Royce-ը կպատժի Geely-ին իր սեդանը “նմանակելու” համար

Rolls-Royce ընկերությունը պատրաստվում է հայց ներկայացնել չինական Geely ընկերությանը Շանհայի ավտոսրահում ներկայացված Geely GE սեդանի եւ բրիտանական մակնիշի ֆլագմանային մակնիշի` Phantom-ի միջեւ խիստ նմանության համար: Ինչպես գրում է Autocar պարբերականը` վկայակոչելով Rolls-Royce-ի ներկայացուցիչներին, այժմ այդ ընկերությունը խորհրդակցություններ է վարում իրավաբանների հետ, որոնց արդյունքներով որոշում կկայացվի դատաքննություն սկսելու մասին:

Հարկ է հիշեցնել, որ Geely GE սեդանն իրոք շատ նման է ստացվել Phantom-ին. չինական ավտոմեքենան ունի ռադիատորի գրեթե նույն ցանցը եւ ցերեկային լույսի երկու լուսարձակներ առջեւի բամպերում, դիմային պանելի նման դասավորվածությունը սրահում, իսկ կողքից նույնպես ավտոմեքենաները գրեթե նույն տեսքն ունեն: Ընդ որում, GE-ն կարճ է “Ֆանտոմից”, եւ փոքր-ինչ նեղ, ինչպես նաեւ ունի 3,5 լիտրանոց բենզինային V6 շարժիչ, մինչդեռ ֆլագմանային Ռոլս-Ռոյսը կոմպլեկտավորվում է 12-մխոցանի շարժիչով:

Բացի այդ, Geely GE-ն եւս մեկ էական տարբերություն ունի իր “մրցակցից”. Phantom-ն ունի երկու առանձին բազկաթոռ ետեւում, իսկ չինական ավտոմեքենան` մեկ, եւ այն տեղադրված է սրահի մեջտեղում:

Նախատեսվում է, որ Geely GE-ն վաճառքում կհայտնվի միայն երեք տարի անց եւ կարժենա մոտ 140 հազար դոլար, այսինքն` 6 անգամ քիչ, քան Rolls-Royce Phantom-ին բազային տարբերակը Չինաստանում: Բացի այդ, ինչպես նշում են չինական ընկերության ներկայացուցիչները, իրենց նորույթը “բացարձակ նման չէ” “Ֆանտոմին”, եւ այդ պատճառով իրենք լուրջ չեն ընկալում դատաքննություն սկսելու մասին բրիտանացիների հայտարարությունները:

Facebook Odnoklassniki

2251 դիտում