Volkswagen-ի ղեկավարն ակնկալում է, որ ավտոշուկան կվերականգնվի 2011 թվականից ոչ շուտ

Նոր ավտոմեքենաների վաճառքների աշխուժացումը գլոբալ մասշտաբներով տեղի կունենա 2011-2012 թթ. ոչ շուտ: Նման կարծիք է արտահայտել Volkswagen խմբի գործադիր տնօրեն Մարտին Վինտերկորնը` իտալական InterAutoNews ամսագրին տված հարցազրույցում:

Վինտերկորնի խոսքերով, 2010 թվականին տեղի կունենա ընդամենը շուկայի կայունացում, իսկ դրա վերականգնումը կսկսվի 2011 կամ 2012 թվականից ոչ շուտ: Ինչպես նշել է Volkswagen-ի ղեկավարը, որոշ երկրներում` Չինաստանում, Բրազիլիայում, ինչպես նաեւ եվրոպական մի շարք երկրներում, նկատվում է վաճառքների դրական դինամիկա, սակայն մյուս խոշոր շուկաներում` Հյուսիսային Ամերիկայում, Ճապոնիայում կամ Հարավային Աֆրիկայում, պահանջարկի անկումը դեռ չի հասել իր վերջնակետին: “Մենք ենթադրում ենք, որ այս տարի Չինաստանում կվաճառվի ավելի քան 6 մլն ավտոմեքենա, սակայն դա չի նշանակում, որ գլոբալ ճգնաժամն արդեն ավարտվել է”, - հայտարարել է Վինտերկորնը:

Հիշեցնենք, որ 2009 թվականի մարտին ԱՄՆ-ում ավտոմեքենաների վաճառքները նվազել են 37 տոկոսով, Ռուսաստանում` 40 տոկոսով, իսկ Եվրոպայում` 17,2%-ով: Ընդ որում, Գերմանիայում, վաճառքների խթանման կառավարական ծրագրի շնորհիվ, ավտոմեքենաների պահանջարկն ավելացել է 40 տոկոսով, իսկ Ֆրանսիայում` 8%-ով:

Facebook Odnoklassniki

1768 դիտում