Porsche եւ VW հրաժարվեցին փոխադարձ կլանումներից` հօգուտ միաձուլման

Porsche եւ Volkswagen ընկերությունները հրաժարվել են փոխադարձ կլանման ծրագրերից եւ որոշել են ստեղծել նոր ավտոկոնցերն, որի կազմում, բացի VW խմբի 9 մակնիշներից, կընդգրկվի նաեւ Porsche-ն: Ինչպես գրում է գերմանական Handelsblatt թերթը, համապատասխան համաձայնություն է ձեռք բերվել Պորշե ընտանիքի եւ երկու ընկերությունների ներկայացուցիչների, արհմիությունների եւ Ներքին Սաքսոնիայի կառավարություն ներկայացուցիչների հանդիպման ժամանակ, որին պատկանում է VW-ի բաժնետոմսերի 20 տոկոսը:

Համաձայնության մանրամասները դեռեւս չեն հաղորդվում. Ինչպես ակնկալվում է, նոր ընկերության կառուցվածքը, ինչպես նաեւ VW եւ Porsche միաձուլման բուն ընթացակարգը կմշակվեն առաջիկա ամսվա ընթացքում` բոլոր շահագրգիռ կողմերի մասնակցությամբ: Հայտնի է միայն, որ նոր ավտոկոնցերնում Porsche-ն նախկինի պես կահպանի անկախությունը իր բիզնեսի վարման հարցերում: Սակայն, ինչպես համարում են փորձագետները, գլխավոր թեման, որը քննարկվելու է միաձուլման սխեմայի մշակման ժամանակ, լինելու է այն, թե ո՞վ է ավելի շատ ազդեցություն ստանալու նոր ընկերության կառավարման գործում` VW, թե՞ Porsche ներկայացուցիչները: 

Հիշեցնենք, որ դեռեւս նախորդ տարի Porsche ընկերությունը նախատեսում էր վերահսկողություն հաստատել VW նկատմամբ` իր ձեռքում հավաքելով գերմանական ավտոկոնցերնի բաժնետոմսերի  75 տոկոսը: Սակայն ճգնաժամի պատճառով սպորտային ավտոարտադրողը ստիպված էր հրաժարվել այդ գաղափարից. գնելով բաժնետոմսերի 51 տոկոսը եւ ծախսելով 23 մլրդ եվրո, Porsche-ն հավաքեց գրեթե 9 մլրդ փոխառություններ, իսկ ընկերության մնացած 24 տոկոսի համար ընկերությունը պետք է վճարեր եւս 13 մլրդ եվրո:

Արդյունքում, 2009 թվականի ապրիլին Volkswagen հանդես եկավ առաջարկով գնել Porsche-ն իր պարտքերի հետ միասին, եւ դրանով իսկ կանխել իր սեփական կլանումը: Այդ հարցը քննարկվում էր Պորշե ընտանիքի հետ վերջին հանդիպման ժամանակ, սակայն արդյունքում ընկերությունները գտան փոխգործակցության այլ տարբերակ` երկու ընկերությունների միաձուլումը:

Facebook Odnoklassniki

1633 դիտում