Նոր սերնդի Mercedes-Benz ML կհայտնվի երկու տարի անց

Երկուշաբթի օրը ցանցային Worldcarfans պարբերականը հրապարակել է նոր սերնդի Mercedes-Benz ML-Class առաջին լրտեսական լուսանկարները: Պորտալի հաղորդմամբ, ավտոմեքենան կստանա W166 ինդեքսը եւ 2011 թվականի հոկտեմբերին հոսքագծին կկանգնի Տասկալուսա քաղաքի գործարանում (Ալաբամա նահանգ, ԱՄՆ), որի արդիականացման համար ավտոարտադրողը նախատեսում է ներդնել 290 մլն դոլար: Նշենք, որ ներկայումս այդ ձեռնարկությունում հավաքում են Mercedes-Benz ML-, GL- եւ R-Class մոդելների ներկայիս տարբերակները:

Որոշ տվյալներով, հաջորդ սերնդի ամենագնացը մի քանի սանտիմետրով կարճ կլինի իր նախորդողից, կստանա ավելի կարճ առջեւի եւ ետեւի կախվածքներ, սակայն կպահպանի նույն պլատֆորմը եւ անիվային բազան:

Ակնկալվում է, որ հաջորդ Mercedes-Benz ML-Class-ի նորամուծություններից կլինեն հիբրիդային տարբերակները` դիզել-էլեկտրական հիբրիդային ուժային համակարգով եւ “լիցքավորվող” հիբրիդներ` 80-ուժանոց էլեկտրաշարժիչով եւ 3,5 լիտրանոց V6 շարժիչով: Այդ ամենագնացը զուտ էլեկտրականությամբ կարող է երթեւեկել 30 կիլոմետր:

Բացի այդ, շարժիչների գամմայում կհայտնվի 2,2-լիտրանոց չորս մխոցանի դիզելային շարժիչը` 204 ձիաուժ հզորությամբ, դիզելային եւ բենզինային “վեցնյակներ”` 225 եւ 333 ձիաուժ հզորությամբ համապատասխանաբար, ինչպես նաեւ տարբերակներ 8-մխոցանի ագրեգատներով:

Facebook Odnoklassniki

2156 դիտում