Acura ընկերությունը ներկայացրել է BMW X6-ի եւ Porsche Cayenne-ի մրցակցին

Honda ընկերության լյուքսային բրենդը հանդիսացող Acura մակնիշը պաշտոնապես ներկայացրել է ZDX անվանումը ստացած սպորտային քրոսովերը: Այս նորույթն առանձնանում է թեք տանիքով թափքի անսովոր դիզայնով` “կուպե” թափքով ավտոմեքենաների ոճով, իսկ նրա մրցակիցները կդառնան BMW X6-ը եւ Porsche Cayenne-ը:

Acura-ի նոր մոդելը կունենա 3,7 լիտրանոց բենզինային V6 շարժիչ` 300 ձիաուժ հզորությամբ եւ 6-աստիճան “ավտոմատով”: Բացի այդ, սպորտային քրոսովերը ստացել է SH-AWD լիաքարշակ համակարգ (օգտագործվում է Honda Legend մեծ սեդանի համար): Նորույթի դինամիկ բնութագրերը դեռեւս չեն հաղորդվում: Հայտնի չէ նաեւ, թե Acura ZDX-ի մոդելային շարքում կլինեն այլ ուժային համակարգերով տարբերակներ, թե ոչ:

Նոր քրոսովերը կունենա ձայնային կառավարմամբ նավիգացիոն համակարգ, “շրջաձեւային” տեսադաշտի համակարգ (կայանման համար)` “մեռյալ գոտիներին” հետեւելու ֆունկցիայով, ինչպես նաեւ ադապտիվ կռուիզ-կոնտրոլ:

Նորույթի գները եւ դրա հայտնվելու ժամկետները դեռեւս չեն հաղորդվում:

Facebook Odnoklassniki

1941 դիտում