Lexus-ը կվերանվանի LF-A սուպերավտոմեքենան

Lexus-ը նախատեսում է վերանվանել LF-A սուպերավտոմեքենան` փոխարինելով վերջին “A” տառը “L”-ով: Այս տառը կնշանակի այս ավտոմեքենայի հատուկ պատրաստված տարբերակի մասնակցությունը “24 ժամ Լե Մանում” մառաթոնին: Ինչպես հաղորդում է 7Tune կայքը` վկայակոչելով ճապոնական Holiday Auto պարբերականը, մինչ այդ ճապոնական ԶԼՄ-ներում տեղեկություններ կային այն մասին, որ մոդելի անվանումը կդառնա "SS550", որտեղ թվերը կնշանակեն շարժիչի հզորությունը:

Նախնական տեղեկություններով, նորույթը կստանա 4,8-լիտրանոց 10-մխոցանի շարժիչ` 550 ձիաուժ հզորությամբ, որը կաշխատի 6-աստիճան ռոբոտացված փոխանցման տուփի հետ միասին: Ինչպես պարզաբանում է 7Tune-ը, տրանսմիսիան կունենա աշխատանքային չորս ռեժիմ, ներառյալ լրիվ ավտոմատ եւ սպորտային, որտեղ մակարդակները կարելի է ընտրել ղեկի թերթիկների օգնությամբ, իսկ փոխանցումների փոփոխության ժամանակը կտեւի 0,2 վայրկյան:

Ակնկալվում է, որ նորույթը կթողարկվի սահմանափակ թվաքանակով` 500 օրինակ, որոնցից 120-150 նախատեսվում է իրացնել Ճապոնիայում: Սուպերավտոմեքենայի արժեքը շուկայում կկազմի մոտ 22 մլն յեն, իսկ Եվրոպայում` 290 հազար եվրո: LF-L-ի համաշխարհային պրեմիերան կկայանա Տոկիոյի մոտորշուոին ընթացիկ տարվա հոկտեմբերին:

Facebook Odnoklassniki

2113 դիտում