Վարչապետը բոլոր պաշտոնյաներին կոչ է արել ավտոմեքենաներում անվտանգության ամրագոտիներ օգտագործել

ՀՀ կառավարությունն այսօր հաստատել է ճանապարհատրանսպորտային երթեւեկության անվտանգության ռազմավարական ծրագիրն ու գործողությունների հնգամյա ծրագիրը:

Ինչպես այսօր կայացած ճեպազրույցում ասել է ՀՀ տրանսպորտի եւ կապի նախարար Գուրգեն Սարգսյանը, 2008 թվականին Հայաստանում ճանապարհատրանսպորտային պատահարների /ՃՏՊ/  թիվը կազմել է 2202, որոնց արդյունքում զոհվել են 407, վնասվածքներ են ստացել 3125 քաղաքացիներ: Բոլոր ՃՏՊ-ների 25 տոկոսը բաժին է ընկնում Երեւանին:

Գուրգեն Սարգսյանն ասել է, որ ամեն տարի պետությունը ՃՏՊ-ների հետեւանքների հաղթահարման նպատակով ծախսում է շուրջ 35 մլրդ դրամ: Նախարարի խոսքերով, ռազմավարական ծրագիրն ուղղված է լինելու ճանապարհատրանսպորտային երթեւեկության անվտանգության կանոններին հետեւելու վերահսկման մակարդակի բարձրացմանը:

Գործողությունների ծրագիրը ֆինանսավորվելու է ( մլն) Համաշխարհային բանկի միջոցներից:

ՀՀ վարչապետ Տիգրան Սարգսյանը հայտարարել է բնակչության շրջանում մինչեւ սեպտեմբերի 1-ը ծրագրի լայնածավալ լուսաբանման անհրաժեշտության մասին: Կառավարության ղեկավարը առանց բացառության բոլոր պաշտոնյաներին կոչ է արել ավտոմեքենաներում օգտագործել անվտանգության ամրագոտիներ եւ օրինակ ծառայել մյուս վարորդների համար: Տրանսպորտի եւ կապի նախարարը նշել է, որ ամրագոտիների օգտագործումը 40-ից 60 կմ/ժ արագությամբ ընթանալիս ՃՏՊ-ների ժամանակ անվտանգության 100-տոկոսանոց արդյունք է ապահովում:

Facebook Odnoklassniki

2994 դիտում