ՃՈ ղեկավարը հայտարարել է ՃՏՊ նվազման մասին

Ընթացիկ տարվա սկզբից Հայաստանում արձանագրվել է 1850 ճանապարհատրանսպորտային պատահար /ՃՏՊ/, որոնց արդյունքում զոհվել է 296 մարդ,  վիրավորվել` 2576:

Ինչպես հայտնում է ՄԵԴԻԱՄԱՔՍ-ը, այդ մասին այսօր Երեւանում հայտարարել է ՀՀ Ճանապարհային ոստիկանության պետ, գնդապետ Մարգար Օհանյանը:

Նրա խոսքերով, անցյալ տարվա 11 ամիսների ընթացքում երկրում արձանագրվել էր 2033 ՃՏՊ, 376 զահ եւ 2886 վիրավոր: Ընդհանուր առմամբ 2009 թ-ի հունվար-նոյեմբեր ամիսներին ճանապարհային ոստիկանության աշխատակիցների կողմից արձանագրվել է երթեւեկության կանոնների 610 626 խախտում վարորդների եւ հետիոտների կողմից, 2008-ին նման խախտումների թիվը կազմել էր մոտ 411 հազար, 2007-ին` 209 հազար:

Մարգար Օհանյանի խոսքերով, մինչեւ ընթացիկ տարվա վերջ երեւանյան փողոցներում կտեղադրվեն մինչեւ 30 ֆոտոխցիկ-րադարներ, իսկ հաջորդ տարվա ընթացքում ամբողջ երկրով կտեղադրվի մոտ 300 նման սարք: Տեսախցիկների տեղադրման հարցը դեռեւս անորոշ է մնում սարքերի թանկության պատճառով:

Ճանապարհային ոստիկանության ղեկավարը հայտնել է, որ իր գերատեսչության կողմից տարեսկզբից կազմվել է տուգանքի 35 408 ակտ վարորդների կողմից ամրագոտիներ չօգտագործելու համար եւ 5179` հետիոտների կողմից ճանապարհն անցնելու խախտումների համար: Նրա խոսքերով, 2010 թ-ին Երեւանի ամենաաշխույժ փողոցներում վերգետնյա անցումներ կտեղադրվեն: