Ամանորյա տոներին ՃՈ-ն աշխատելու է ուժեղացված ռեժիմով

Այս տարվա սկզբից Հայաստանում գրանցվել է 1978 ճանապարհատրանսպորտային պատահար /ՃՏՊ/, որոնց արդյունքում մահացել է 324 մարդ, մարմնական վնասվածքներ ստացել 2724-ը:

Ինչպես հաղորդում է ՄԵԴԻԱՄԱՔՍ-ը, այդ մասին այսօր Երեւանում լրագրողներին ասել է ՀՀ Ճանապարհային ոստիկանության /ՃՈ/ պետ Մարգար Օհանյանը: Նրա խոսքերով, նախորդ տարվա նույն ժամանակահատվածում արձանագրվել էր 2178 ՃՏՊ, 406 զոհ եւ 3082 վիրավոր:

2009թ. հունվար-նոյեմբերին Ճանապարհային ոստիկանության աշխատակիցների կողմից արձանագրվել է վարորդների եւ հետիոտների կողմից ճանապարհային երթեւեկության կանոնների խախտման ավելի քան 650 հազար դեպք: Մարգար Օհանյանի խոսքերով, առաջիկայում Երեւանի փոքր կենտրոնում կտեղադրվեն 30 տեսախցիկ-ռադարներ, իսկ 5 տարվա ընթացքում` մինչեւ 300 այդպիսի սարքավորումներ, որոնք կլինեն ինչպես ստացիոնար, այնպես էլ շարժական:

Մարգար Օհանյանը տեղեկացրել է, որ Ճանապարհային ոստիկանության 385 պարեկային ավտոմեքենաներ հագեցված են GPS համակարգով, որի շնորհիվ օպերատիվ կենտրոնում կարելի է իմանալ նրանց գտնվելու վայրը:

Ճանապարհային ոստիկանության ղեկավարը հայտնել է, որ դեկտեմբերի 25-ից հունվարի 14-ը իր գերատեսչությունը ծառայություն է անցկացնելու ուժեղացված ռեժիմով: Օհանյանի խոսքերով, տոնական օրերին եւս ոչ սթափ վիճակում ավտոմեքենա վարելը կպատժվի օրենքի ողջ խստությամբ: “Ոչ սթափ վարորդը պետք է նստի տանը` ռիսկի չենթարկելով այլ մարդկանց առողջությունը”,- ասել է նա:

Facebook Odnoklassniki

3009 դիտում