Ինտերնետում հայտնվել են MINI Countryman քրոսովերի առաջին պաշտոնական լուսանկարները, որոնք միանգամից հայտնվել էին արեւմտյան ԶԼՄ-ներում բրիտանական ավտոարտադրողի կողմից այ ավտոմեքենային նվիրված տեսահոլովակի տարածումից հետո: Ավտոմեքենայի համաշխարհային պրեմիերան կկայանա մեկ ու կես ամիս Ժնեւի միջազգային ավտոսրահում: Այս մասին հաղորդում է Worldcarfans պարբերականը:
Առաջին լուսանկարներում ներկայացված է քրոսովերը "S" տարբերակում` սեւ գույնի անիվային դիսկերով, սեւ տանիքով եւ նոր` All4 լիաքարշակ համակարգով, որը մշակվել է BMW ընկերության կողմից հատուկ կոմպակտ ավտոմեքենաների համար: Նախկինում ենթադրվում էր, որ նորույթը կմշակվի Beachcomber կոնցեպտուալ ավտոմեքենայի ոճով, սակայն սերիական ավտոմեքենան ստացավ բոլորովին այլ ռադիատորի ցանց եւ առջեւի բամպեր: Երկու ավտոմեքենաները նման են միայն դիմային լուսատեխնիկայի ձեւով եւ հակամառախուղային լուսարձակների դասավորությամբ:
Ինչպես հաղորդվում էր նախկինում, MINI Countryman-ի համար առաջարկվելու է 1,6-լիտրանոց շարժիչների շարք, ներառյալ մթնոլորտային տարբերակը, եւ տարբերակ տուրբոուժեղացուցիչով: Բացի լիաքարշակ մոդիֆիկացիայից, բրիտանական ընկերությունը նախատեսում է թողարկել նաեւ առջեւի քարշակ ավտոմեքենա:
Եվրոպայում MINI քրոսովերը դիլերների մոտ կհայտնվի ընթացիկ տարվա վերջին: Ավտոմեքենայի գները կսկսվեն 25 հազար եվրոյից: Լրացուցիչ վճարումը "S" տարբերակի համար կկազմի 4 հազար եվրո:
Like
OK
