Մինչև մարտի վերջ Երևանում հասարակական տրանսպորտային միջոցների` կանգառներում կայանման հարցը կկանոնակարգվի: Ինչպես հաղորդում է
Tert.am կայքը, այս մասին այսօրվա ասուլիսին ասաց ՀՀ ճանապարհային ոստիկանության պետ Մարգար Օհանյանը` միաժամանակ նշելով, որ խնդիրը միանգամից հնարավոր չէ կարգավորել:
Մամուլի հրապարակումներին հետևելով` երեկվանից ճանապարհային ոստիկանությունն ուժեղացրել է հսկողությունը «Այրարատ» կինոթատրոնի հարակից, մասնավորպես` Խ. Աբովյանի անվան մանկավարժական համալսարանի տարածքում: Առաջիկայում ճանապարհային ոստիկաններն անելիքներ ունեն «Մալաթիա» տոնավաճառի հարակից տարածքում, որտեղ հասարակական տրանսպորտն ու ավտոմեքենաներն անկանոն են կայանում:
«Չկա մի երկիր, որտեղ մեկ տարվա ընթացքում ճանապարհատրանսպորտային ոլորտի խնդիրները հնարավոր է վերացնել»,- ասաց Օհանյանը` նշելով, որ ոլորտում կարգուկանոն հաստատելը մեծ ծախսերի հետ է կապված:
Այս տարվա երկրորդ կիսամյակից ճանապարհային ոստիկանների ուշադրության կենտրոնում կլինեն նաև ղեկին բջջային հեռախոսով խոսող, ծխող և ավտոմեքենայի պատուհանից աղբ նետող վարորդները, որոնք կտուգանվեն: Նրանց նկատմամբ հսկողություն կսահմանվի նաև մարզերի ավտոմայրուղիներին:
Like
OK
