Պարտադիր ավտոապահովագրությունը կբացի մեծ շուկա

Պարտադիր ավտոապահովագրությունը կբացի մեծ շուկա, այս մասին Մեդիամաքս գործակալությանն ու Banks.am պորտալին տված հարցազրույցում ասել է «Բի Էս Սի» Բիզնեսի Աջակցման Կենտրոնի խորհրդատվական-ուսուցողական ընկերության բաժնետեր-տնօրեն Սամվել Գեւորգյանը:

Մեկնաբանելով ՀՀ ԱԺ կողմից «Ավտոտրանսպորտային միջոցների օգտագործումից բխող պատասխանատվության պարտադիր ապահովագրության մասին» օրենքի ընդունումը, Սամվել Գեւորգյանն ասել է, որ այն լուրջ մրցակցություն կստեղծի ինչպես մայրաքաղաքում, այնպես էլ մարզերում:

“Մենք բավականին օպերատիվ արձագանքեցինք այդ հարցին, քանի որ պարտադիր ավտոապահովագրության մասին օրենքի ընդունմամբ մեզ համար բացվում է բավականին մեծ շուկա: Մեր ունեցած տեղեկությունների համաձայն, այսօր ՀՀ ավտոտրանսպորտային պարկը հաշվարկում է շուրջ 400 հազար ավտոմեքենա, որից ապահովագրված է միայն մի քանի հազարը: Այսինքն, ավտոտրանսպորտային միջոցների 400 հազար սեփականատերերը` ֆիզիկական ու իրավաբանական անձինք, պետք է կողմնորոշվեն այս կամ այն ապահովագրական ընկերության ընտրության հարցում: Այս առումով պետք է սպասել լուրջ մրցակցության, ընդ որում` ինչպես մայրաքաղաքում, այնպես էլ մարզերում: Անկասկած, այն ապահովագրական ընկերությունները, որոնք ունեն մարզային մասնաճյուղային ցանց, կլինեն ավելի շահեկան վիճակում”:

“Պարտադիր ապահովագրության ներդրմանը զուգահեռ, ծագում են նաեւ խնդիրներ` կապված սպասարկման որակի, շուկայի հետազոտության, արդյունավետ ապրանքատեսակների ներդրման, ապահովագրողի հետ հետադարձ կապի ապահովման եւ այլնի հետ: Մի խոսքով, առաջանում է գրագետ գործարար մոտեցման անհրաժեշտություն` սպասարկման որակի շեշտադրմամբ: Այդ կապակցությամբ մենք մշակել ենք թրենինգային դասընթացներ, որոնք ուղղված կլինեն կոնկրետ ապահովագրական ընկերություններին, որոնց ներդրումը նախատեսվում է արդեն այս տարվա հոկտեմբերին: Մասնավորապես, նախատեսում ենք ներդնել այնպիսի թրենինգային ապրանքատեսակներ, ինչպիսիք են` «Գրագետ վաճառք ապահովագրական գործակալների համար», «Վաճառքի ավելացում նվազագույն ծախսերով», «Բրենդի ձեւավորում», «Հաճախորդների հեռախոսային սպասարկում», «Հաճախորդների սպասարկման արվեստ», «Արդյունավետ բիզնես-հաղորդակցություն», «Ստեղծագործական գաղափարների մշակում”, - Banks.am-ին տված հարցազրույցում ասել է Սամվել Գրիգորյանը:

Խոսելով տվյալ ոլորտում “Բի Էս Սի” կենտրոնի կողմից նախատեսվող միջոցառումների մասին, Սամվել Գեւորգյանը հայտնել է, որ նախատեսվում է նշված թեմաներով անցկացնել ինչպես բաց, այնպես էլ կորպորատիվ դասընթացներ: “Մեր կանխատեսումներով, դասընթացները պահանջված կլինեն ինչպես արդեն գործող ապահովագրական գործակալների, այնպես էլ ապահովագրական ընկերությունների մարզային մասնաճյուղերի պոտենցիալ աշխատակիցների կողմից: Այդ կապակցությամբ կարելի է վստահ արձանագրել, որ պարտադիր ավտոապահովագրությունը կբացի մեծ շուկա, այդ թվում նաեւ մեր ընկերության համար”, - ասել է Սամվել Գեւորգյանը:

Facebook Odnoklassniki

2646 դիտում