Հունիսի 8-ին լրատվամիջոցներին ներկայացվեց FORD-ի առաջին քրոսովերը` KUGA ավտոմեքենան:
Ինչպես Auto.am-ին հայտնեցին “Ֆորա” ընկերությունում, որը հանդիսանում է աշխարհահռչակ FORD, LAND ROVER և VOLVO մակնիշների պաշտոնական ներկայացուցիչը Հայաստանում, Աճառյան 42 հասցեում կազմակերպվել էր հատուկ թեստ-դրայվ զանգվածային լրատվամիջոցների ներկայացուցիչների համար, որոնց առաջարկվել էր փորձարկել FORD KUGA-ն:
“Ֆորա” ավտոսրահում հավաքվել էին մի քանի տասնյակ թերթերի, ամսագրերի, ռադիոկայանների և հեռուստաընկերությունների ներկայցուցիչներ, որոնց ողջույնի խոսքով դիմեց ընկերության վաճառքների բաժնի պետ Լիլիթ Ներսիսյանը: Այնուհետ վաճառքի մենեջեր Միքայել Հարությունյանը հավաքված լրագրողներին հրավիրեց ավելի մանրամասն ծանոթանալ KUGA ամենագնացի հետ: Այդ ընթացքում ներկայացվեց ավտոմեքենայի սրահն` իր բոլոր առանձնահատկություններով, ամենագնացի հզոր շարժիչը, որը թույլ է տալիս մինչև 100 կմ/ժ արագություն զարգացնել ընդամենը 8.5 վայրկյանում: Առանձնակի շեշտվեց FORD ընկերության նոր գաղափարախոսությունը` “Կինետիկ դիզայնը”, որն իր կատարյալ արտահայտությունն է գտել ներկայացվող ավտոմեքենայի արտաքինում:
Մ. Հարությունյանի զեկույցից հետո լրագրողները հերթով հնարավորություն ստացան փորձարկել առաջարկվող երեք KUGA ավտոմեքենաները` սեփական փորձառությամբ գնահատելով դրա առաջարկած հարմարավետությունն ու հուսալիությունը:
Միջոցառմանը ներկա էին նաև արդեն իսկ KUGA ավտոմեքենա ձեռք բերած հաճախորդներ, որոնք իրենց տպավորություններով կիսվեցին լրագրողների հետ:
Հարկ է նշել, որ չնայած KUGA-ն բոլորովին վերջերս է հայտնվել հայաստանյան շուկայում, սակայն արդեն իսկ կարողացել է գրավել ոչ միայն եվրոպացիների, այլև հայ հաճախորդների սրտերը: Մինչ օրս արդեն վաճառվել է 19 ավտոմեքենա, և “Ֆորա” ընկերությունում վստահ են, որ վաճառքների թիվը կշարունակի ցուցադրել աճի միտում:
Միջոցառման ավարտին բոլոր հյուրերն ու հրավիրված լրագրողները ստացան խորհրդանշական հուշանվերներ “Ֆորա” ընկերության կողմից:
Like
OK
