Aston Martin բրիտանական լյուքսային մակնիշը կթողարկի իր պատմության մեջ առաջին ամենագնացը` Lagonda կոնցեպտի պլատֆորմի վրա: Ինչպես Ամստերդամում կայացած մամլո ասուլիսում ասել է ընկերության գլխավոր կառավարիչ-տնօրեն Ուլրիխ Բեզը, Aston Martin-ին հաջողվել է լուծել ինչպես ֆինանսական, այնպես էլ դիզայներական խնդիրները, որոնք խանգարում էին այդ նախագծի կենսագործմանը: Նրա խոսքերով, հանրահայտ բրենդի վերածնունդի նախագիծը “գործնականում պատրաստ” է, հաղորդում է Autoblog-ը: Ու. Բեզը նշել է, որ լիաքարշակ ամենագնաց ավտոմեքենան առաջին հերթին նախատեսված կլինի Ռուսաստանի, Չինաստանի եւ Մերձավոր Արեւելքի երկրների համար: Այն կառուցվելու է Mercedes-Benz GL-Class-ի բազայի վրա, այնպես որ հավանական է, որ Aston Martin-ը կհամագործակցի Daimler-ի հետ:
Հիշեցնենք, որ 4-տեղանի Aston Martin Lagonda ամենագնացը, որ վերածնում է պատմական անունը (այսպես էր կոչվում 1906 թվականին հիմնադրված բրիտանական ավտոմոբիլային ընկերությունը, որը հետագայում կլանվեց Aston Martin-ի կողմից), մեկնարկել է Ժնեւի ավտոսրահում 2009 թվականին: Նրա դիզայնը, որը համադրում է մարդատար ավտոմեքենայի եւ քրոսովերի գծերը, բացասական արձագանք առաջացրեց քննադատների մոտ: Ավելի վաղ հայտարարվել էր, որ բոլոր աշխատանքներն այս նախագծի շուրջ դադարեցվել են:
Like
OK
