Վերջին տարվա ընթացքում Հայաստանում 20%-ով կրճատվել է ճանապարհատրանսպորտային պատահարների /ՃՏՊ/ զոհերի թիվը:
Ինչպես հաղորդում է Մեդիամաքս-ը, այդ մասին այսօր հայտնել է ՀՀ վարչապետ Տիգրան Սարգսյանը` հանդես գալով ՀՀ Ճանապարհային երթեւեկության անվտանգության ազգային խորհրդի կողմից կազմակերպված միջազգային ֆորումում:
Վարչապետի խոսքերով, դա ՀՀ Ոստիկանության, հասարակության, կառավարության եւ քաղաքացիական ինստիտուտների համատեղ աշխատանքի արդյունքն է:
Տիգրան Սարգսյանը նշել է, որ վերջին ժամանակներս աշխարհում մեծացել է ուշադրությունը ճանապարհային անվտանգության խնդիրների նկատմամբ: Նրա խոսքերով, ամեն տարի ՃՏՊ արդյունքում աշխարհում զոհվում է 1.2 մլն մարդ, իսկ 20 մլն-ը ստանում են մարմնական վնասվածքներ:
ՀՀ կառավարության ղեկավարը նշել է, որ Խորհուրդը նախատեսել է մի շարք միջոցառումներ, որոնք թույլ կտան բարձրացնել քաղաքացիների գիտակցությունն ու տեղեկացվածության մակարդակը ճանապարհային անվտանգության վերաբերյալ: Նախեւառաջ, նշել է վարչապետը, կանցկացվեն ճանապարհային անվտանգության կանոնների հանրային քննարկումներ, կկազմակերպվեն ՃԵԿ վերաբերյալ դասընթացներ երկրի բոլոր ուսումնական հաստատություններում: Դա թույլ կտա հասարակության գիտակցության մեջ սերմանել, որ կանոնների իմացությունը ձեւավորում է ավելի անվտանգ միջավայր, ասել է Տիգրան Սարգսյանը:
Վարչապետը տեղեկացրել է, որ ճանապարհային անվտանգության ապահովմանն ուղղված հաջորդ քայլը լինելու է ճանապարհների աուդիտը, ինչը թույլ կտա բացահայտել ճանապարհների խնդրահարույց հատվածները, որոնք ի սկզբանե կառուցվել են համապատասխան միջազգային նորմերի խախտմամբ եւ վտանգավոր են երթեւեկության համար:
Նրա խոսքերով, այսուհետ ճանապարհային շինարարության ողջ նախագիծը ենթարկվելու է փորձաքննություն: «Դա անցումների կառուցումն է, դպրոցամերձ տարածքների համապատասխան վերանայումը եւ ճանապարհային անվտանգության բարձրացման այլ միջոցառումները, որոնք կանցկացվեն ճանապարհային աուդիտի կիրառմամբ»,- նշել է Տիգրան Սարգսյանը:
Ֆորումին ներկա է եղել նաեւ Միջազգային ավտոմոբիլային ֆեդերացիայի (FIA) գլխավոր տնօրեն Դեւիդ Ուորդը, ով ներկայացրել է «Գործողությունների տասնամյակ» ճանապարհային անվտանգության միջազգային ծրագրի մանրամասները:
Նրա խոսքերով, ճանապարհային անվտանգության ապահովման միջոցառումների շարքում կարեւոր տեղ է զբաղեցնում նաեւ ճանապարհատրանսպորտային վնասվածքների եւ հետվնասվածքային բուժման խնդիրը: «Առողջապահության համաշխարհային կազմակերպության եվրոպական տարածաշրջանի անդամ-երկրներում ամեն տարի ՃՏՊ արդյունքում զոհվում է 120 հազար մարդ: Շուրջ 50 հազարը հետիոտներն են, մոտոցիկլետ վարողները եւ հեծանվորդները»,- ասել է Դեւիդ Ուորդը:
Նրա խոսքերով, պատճառներից մեկը ոչ ժամանակին հետվնասվածքային օգնությունն է: Դեւիդ Ուորդը նշել է, որ կանխատեսումների համաձայն, 2020թ. ճանապարհատրանսպորտային վնասվածքներն աշխարհում կգրավեն առողջական խնդիրների երրորդ տեղը` զիջելով միայն սիրտանոթային հիվանդություններին եւ ծանր դեպրեսիաներին:
Like
OK
