Այսօր ավտոքաղաքացիական պատասխանատվության պարտադիր ապահովագրության /ԱՊՊԱ/ ենթակա շուրջ 430 հազար ավտոտրանսպորտային միջոցներից ապահովագրված է միայն 10%-ը:
Ինչպես հաղորդում է Մեդիամաքս-ը, այդ մասին այսօր Երեւանում Հայաստանի ավտոապահովագրողների բյուրոյի տնօրեն Վահան Ավետիսյանի հետ համատեղ մամուլի ասուլիսում ասել է ՀՀ Կենտրոնական բանկի /ԿԲ/ փոխնախագահ Վաչե Գաբրիելյանը:
Նրա խոսքերով, ապահովագրական ընկերությունները լավ են նախապատրաստված ԱՊՊԱ պոլիսների վաճառքին եւ չունեն ռեսուրսների անբավարարություն, սակայն վարորդները չեն շտապում ապահովագրել իրենց ավտոմեքենաները, «չնայած մինչեւ հունվարի 1-ը մնացել է շատ քիչ ժամանակ»:
Վաչե Գաբրիելյանը զգուշացրել է, որ հունվարի 1-ից սկսած ոստիկանությունը տուգանելու է ԱՊՊԱ պոլիս չունեցող վարորդներին, եւ տուգանքի գումարը (50 հազ. դրամ) շատ դեպքերում գերազանցում է ԱՊՊԱ պայմանագրի արժեքը:
«Ապահովագրական ընկերություններն աշխատում են նաեւ շաբաթ, իսկ որոշները` նաեւ կիրակի օրերին»,- ասել է Վաչե Գաբրիելյանը` հավելելով, որ երկրի բոլոր մարզերում ներկայումս աշխատում են հազարավոր ապահովագրական գործակալներ, իսկ ապահովագրական ընկերությունների կողմից առաջարկվող սակագները գրեթե չեն տարբերվում միմյանցից:
Like
OK
