Nissan Leaf էլեկտրոմոբիլը ճանաչվել է 2011 թվականի ավտոմեքենա Եվրոպայում. մոդելն արժանացել է European Car of the Year մրցանակին: Պետք է նշել, որ առաջին անգամ այս մրցանակը շնորհվում է լիովին էլեկտրական ավտոմեքենային: Nissan Leaf-ը գերազանցել է 40 հավակնորդների: Հիշեցնենք, որ մրցույթին կարող են մասնակցել այն մոդելները, որոնք Եվրոպայի շուկայում են հայտնվել այ տարի, կամ նախորդ տարվա վերջին, եւ վաճառվում են տարեկան առնվազն 5 000 քանակությամբ: Ժյուրին բաղկացած էր 59 առաջատար ավտոլրագրողներից 23 եվրոպական երկրներից:
Nissan Leaf էլեկտրամոբիլին հաջողվեց առաջ անցնել այնպիսի մրցակիցների, ինչպիսիք են Alfa Romeo Giulietta-ն, Citroen C3/DS3-ը, Dacia Duster-ը, Ford C-MAX/Grand C-MAX-ը, Opel/Vauxhall Meriva-ն, Volvo S60/V60-ը, որոնք դուրս էին եկել մրցույթի եզրափակիչ: Հետաքրքիր է, որ եզրափակչի յոթ ներկայացուցիչներից 6-ը եվրոպական մոդելներ են, չնայած որ 41 հավակնորդներից ավելի քան մեկ երրորդը ասիական ավտոմեքենաներ են:
«Այսօր “Տարվա ավտոմեքենա” մրցանակի է արժանանում հեղափոխական Nissan Leaf էլեկտրամոբիլը: Սա առաջին էլեկտրամոբիլն է, որը կարող է լիարժեք մրցակից դառնալ ավանդական բենզինային շարժիչներով ավտոմեքենաներին”, - ասել է “Տարվա ավտոմեքենա” մրցույթի ժյուրիի նախագահ Հեքեն Մեթսոնը:
Ներկայացնում ենք եզրափակիչ անցած մոդելներին իրենց հավաքած միավորներով.
1. Nissan Leaf (257)
2. Alfa Romeo Giulietta (248)
3. Opel Meriva (244)
4. Ford C-Max (224)
5. Citroën C3/DS3 (175)
6. Volvo S60/V60 (145)
7. Dacia Duster (132)
Like
OK
