Mercedes-Benz-ը պաշտոնապես հրապարակել է լրիվ տեղեկատվությունը SLK նոր սերնդի մասին: Մակնիշի մոդելային շարքի ամենագեղեցիկ ավտոմեքենաներից մեկը բավականին լուրջ փոփոխությունների է ենթարկվել: Այժմ այն ավելի շատ նման է մինիի-SL-ի: Նորույթի բնորոշ գծերից է խոշոր ռադիատորային ցանցը: Ի դեպ, դիզայներական եւ ինժեներական ջանքերի շնորհիվ ավտոմեքենայի դիմադրողականության գործակիցը հաջողվել է իջեցնել 0,32-ից մինչեւ 0,30:
Ավտոմեքենան ավելի ժամանակակից է դարձել եւ համապատասխանում է նոր Mercedes-Benz-երի նորաձեւության եւ կորպորատիվ ոճի պահանջներին: Ավտոմեքենան պարզապես հագեցած է բոլորովին չլսված օպցիաներով, եւ այդ չափանիշով այն կարող է մրցել նույնիս Mercedes-ի դրոշակակրի հետ:
Բավական է նշել պանորամային Magic Sky Control առաստաղը: Թվում է, թե տեսնելով այն, իրոք կարելի է հավատալ հրաշքներին: Միայն մեկ կոճակ սեղմելով, այն ավելի մուգ եւ բաց է դառնում: Բաց ռեժիմում ապակին գործնականում թափանցիկ է: Այսպիսով, առանց առաստաղի շարժման տպավորություն է ստեղծվում նույնիսկ փակ վիճակում: Իսկ մուգ ռեժիմում լույսի շող անգամ սրահ մուտք չի գործում, եւ նշանակում է, չի տաքանում նստատեղերի կաշին: Տվյալ օպիցան, սակայն, մատչելի կլինի միայն որպես օպցիա: Բազային կոմպլեկտավորման դեպքում մեքենան ունի թափքի գույնի ծալվող առաստաղ:
Ինչ վերաբերվում է նորույթի ինտերյերին, ապա մակնիշի դիզայներներն աշխատել են, որ վարորդը եւ ուղեւորներն իրենց առավելագույնս հարմարավետ զգան եւ գործնականում “լողան” շքեղության մեջ: Շուրջ բոլոր ալյումին է եւ փայտի հազվադեպ տեսակներ: Ընկերությունում որոշել են փոփոխել կենտրոնական մուլտիմեդիական դիսփլեյի տեղը: Այժմ այն գտնվում է կենտրոնական կոնսոլի մեջտեղում, եւ դրանից հավասարապես կարող են տեղեկատվություն ստանալ ինչպես վարորդը, այնպես էլ ուղեւորները:
Այժմ ամենակարեւորի` շարժիչների մասին: Շուկայում ավտոմեքենայի հայտնվելու առաջին իսկ տարում մատչելի կլինեն երկու տարբերակներ: Առաջինը` SLK350, կունենա V6 շարժիչ` 302 ձիաուժ հզրությամբ, որը 0-ից մինչեւ 100 կմ/ժ արագություն կզարգացնի 5,4 վայրկյանում: Երկրորդը` SLK250, 4-մխոցանի շարժիչով 201 ձիաուժ հզորությամբ:
Երկու տարբերակները կոմպլեկտավորվում են սպորտային կախոցով` ավելի ամուր զսպանակներով եւ ամորտիզատորներով: Դա թույլ է տալիս ավտոմեքենային ապահովել կառավարելիության եւ կայունության բարձր մակարդակ:
SLK նոր տարբերակը կարելի է պատվիրել 2011 թվականի հունվարի 17-ից: Գինը Եվրոպայում տատանվում է 38 675-ից մինչեւ 53 000 եվրո` կախված կոմպլեկտավորումից:
Like
OK
