«Աքիլես» ավտովարորդների իրավունքների պաշտպանության կենտրոնի նախագահ Էդուարդ Հովհաննիսյանն այսօր ասել է, որ ավտոտեխզննման գործընթացը ձեւական բնույթ է կրում:
Ինչպես հաղորդում է Մեդիամաքսը, նշելով, որ ներկայումս մայրաքաղաքում գործում է ավտոտեխզննման 9 կայան, իսկ մարզերում` շուրջ 30 կայան, Էդուարդ Հովհաննիսյանը հայտնել է, որ բոլոր այդ կայանները վարորդների ցանկության դեպքում ձեւակերպում են ձեւական ավտոտեխզննում:
«Ավտոտեխզննումը պետք է անցկացվի 64 չափորոշիչներով, սակայն լավագույն դեպքում կատարվում է երկուսով»,- նկատել է նա:
Էդուարդ Հովհաննիսյանը նշել է, որ տարածված են դեպքերը, երբ ավտոմեքենաների վարորդներին տրամադրվում են կտրոններ, սակայն ավտոմեքենաները տեխնիկական զննման չեն ենթարկվում:
«Նման խախտումների դեպքում սահմանված է 500 հազար դրամ տուգանք: Այդ հարցով պատասխանատու է ՀՀ տրանսպորտի եւ կապի նախարարությունը, որը, սակայն, այսօրվա դրությամբ որեւէ ընկերության չի տուգանել»,- հայտնել է «Աքիլեսի» նախագահը:
«Մեզ հարկավոր չէ այսօր գործող տեխզննման համակարգը: Կամ թող լինի որակյալ համակարգ, կամ թող ընդհանրապես չլինի»,- հայտարարել է Էդուարդ Հովհաննիսյանը:
Like
OK
