ՀՀ վարչապետ Տիգրան Սարգսյանն այսօր ասել է, որ «պարտավոր ենք օպերատիվ միջոցառումներ իրականացնել, որպեսզի պետական ծառայությունների որակը լինի բարձր, եւ կոռուպցիոն ռիսկերը հասցնենք նվազագույնի»։
Ինչպես հաղորդում է Մեդիամաքս-ը, հանդես գալով այսօրվա կառավարության նիստում, վարչապետը տրանսպորտի եւ կապի նախարարին առաջարկել է ավելի լայն լուսաբանել կառավարության որոշումը տեխնիկական զննման գործընթացի կանոնակարգման մասին, «որպեսզի մեր քաղաքացիները հասկանան, որ այս որոշման արդյունքում այն 5000 դրամ շորթումը, որ տեղի էր ունենում, այլեւս չպետք է տեղի ունենա»։
«Հաջորդ քայլերը նվիրված են լինելու ՀՀ Նախագահի կողմից ոստիկանության հետ հանդիպման ժամանակ բարձրացրած խնդիրներին եւ ոստիկանության կողմից տրամադրվող ծառայությունների որակը նույնպես պետք է բարձրացվի։ Մասնավորապես, նախագահի հանձնարարականով մոտակա շաբաթների ընթացքում ձեզ հետ միասին անդրադառնալու ենք մեքենաների գրանցման եւ վարորդական իրավունքների տրամադրման գործընթացներին, որտեղ առկա են լուրջ կոռուպցիոն ռիսկեր, եւ պարտավոր ենք այստեղ թափանցիկություն ապահովել, եւ պետական այն գործառույթները, որոնք այդ կոռուպցիոն ռիսկերն ստեղծում են, պետք է վերացնենք», - ասել է վարչապետը:
«Մենք անդրադարձել էինք անձնագրերի տրամադրման գործառույթներին, որտեղ առկա էին լուրջ կոռուպցիոն ռիսկեր։ Մեր վերջին մոնիտորինգի արդյունքները վկայում են այն մասին, որ այսօր կոռուպցիան այդ բնագավառում իսպառ բացակայում է։ Նշանակում է` երբ կառավարությունը համապատասխան որոշումներ է ընդունում, կարգերը պարզեցնում է, դարձնում է թափանցիկ, մենք կարողանում ենք հասնել հաջողության, եւ իմ կողմից թվարկված ոլորտներում նույնպես մենք կարճ ժամանակահատվածում պետք է հասնենք նույն արդյունքներին, ինչին մենք հասանք անձնագրերի տրամադրման գործընթացը կանոնակարգելու պարագայում», - շեշտել է վարչապետը:
Like
OK
