Ապահովագրական ընկերությունները մեկնաբանել են կառավարության ծրագրերը` ավտոտեխզննման գործընթացում իրենց ներգրավելու մասին:
«Ապահովագրության ոլորտում ավտոտրանսպորտային միջոցի տեխզննումը կարեւոր նախապայման է ԱՊՊԱ եւ Կասկո պայմանագրեր կնքելու համար, եւ տրանսպորտային միջոցի սարքին լինելու հանգամանքը նշվում է ապահովագրական պայմանգրում, որպես առանձին կետ», - Մեդիամաքսի-ն ասել է «ԻՆԳՈ Արմենիա» ապահովագրական ընկերության գլխավոր տնօրեն Լեւոն Ալթունյանը:
Նա նշել է, որ ավտոտրանսպորտային միջոցի բարեխիղճ տեխզննումը շատ կարեւոր է ապահովագրական ընկերությունների համար, քանի որ ավտովթարից հետո իրենց իրավունք է վերապահվում եւս մեկ անգամ անցկացնել տեխզննում`վթարի հնարավոր տեխնիկական պատճառները հայտնաբերելու նպատակով:
«Նաիրի Ինշուրանս» ապահովագրական ընկերության գլխավոր տնօրեն Գոռ Խաչատրյանը Մեդիամաքսի հետ հարցազրույցում ասաց, որ տեխզննման արդյունավետության բարձրացման գործընթացում ապահովագրական ընկերությունների դերը պատկերացնում է տեխզննման կայանների հանդեպ անուղղակի վերահսկողության մեջ:
«ԱՊՊԱ-ն ենթադրում է ապահովագրական ընկերության կողմից հատուցված գումարի հետ պահանջի իրավունք, երբ մեքենայի կողմից պատճառված վնասը տեխնիկական անսարքության հետեւանք է, որը պետք է բացահայտված լիներ տեխզննման ժամանակ», - ասաց Գոռ Խաչատրյանը:
Like
OK
