ՃՏՊ-ների թվի աճը պայմանավորված է ԱՊՊԱ-ով եւ ներկրվող մեքենանների թվի աճով, ասել է Նորիկ Սարգսյանը

2011թ. հունվար-հուլիս ամիսներին Հայաստանում գրանցվել է ճանապարհա-տրանսպորտային 1135 պատահար, որոնց հետեւանքով զոհվել է 150 մարդ:

Ինչպես հաղորդում է Մեդիամաքս-ը, այս տվյալներն այսօր ներկայացրել է ՀՀ Ճանապարհային ոստիկանության ճանապարհապարեկային ծառայության բաժնի պետ Նորիկ Սարգսյանը:

Նրա խոսքով, նախորդ տարվա համեմատ ՃՏՊ-ների թիվը աճել է 143-ով: Նորիկ Սարգսյանի գնահատմամբ, սա պայմանավորված է ԱՊՊԱ-ի ներդրմամբ եւ արտերկրից ներմուծվող ավտոտրանսպորտային միջոցների քանակի կտրուկ աճով:

Հետիոտների մասնակցությամբ ՃՏՊ-ների թիվը այս տարվա առաջին 7 ամիսներին կազմել է 380:

Նորիկ Սարգսյանը հաղորդել է, որ մինչեւ այս տարվա վերջ Երեւանի բանուկ վայրերում կտեղադրվեն 10 նկարահանող սարքեր, ինչպես նաեւ արագաչափիչներ: