Եթե Նորիկ Սարգսյանին նշանակեն Ճանապարհային ոստիկանության պետ, նա կենթարկվի հրամանին

ՀՀ Ճանապարհային ոստիկանության ճանապարհապարեկային ծառայության բաժնի պետ, գնդապետ Նորիկ Սարգսյանը
 
Երեւան: Մեդիամաքս: ՀՀ Ճանապարհային ոստիկանության ճանապարհապարեկային ծառայության բաժնի պետ, գնդապետ Նորիկ Սարգսյանն այսօր դժվարացել է պատասխանել այն հարցին, թե արդյո՞ք իրեն կնշանակեն նախօրեին ձերբակալված ՃՈ պետ Մարգար Օհանյանի պաշտոնին։

Ինչպես հաղորդում է Մեդիամաքս-ը, Նորիկ Սարգսյանն այսօր ասել է, որ դա կորոշի Ոստիկանության ղեկավարությունը, իսկ ինքը պարտավոր է կատարել հրամանները:

“Եթե ասեն, որ ես պիտի ծառայեմ, օրինակ, Ամասիայում, ուրեմն ես կծառայեմ Ամասիայում”,- հավելել է նա:

Մեդիամաքս-ը նշում է, որ օգոստոսի 30-ին ձերբակալվել էր ՀՀ Ոստիկանության «Ճանապարհային ոստիկանության» ծառայության պետ, ոստիկանության գնդապետ Մարգար Օհանյանը` ծառայության վարույթում քննվող քրեական գործով պաշտոնեական դիրքը չարաշահելու եւ գույքի առանձնապես խոշոր չափերով հափշտակություն կատարելու կասկածանքով։
 
Մի քանի որ առաջ ձերբակալվել էր նաեւ Ճանապարհային ոստիկանության 2-րդ սպայական գումարտակի նախկին հրամանատար, ոստիկանության գնդապետ Ստեփան Կարախանյանը։

Օգոստոսի 25-ին ՀՀ հատուկ քննչական  ծառայությունը հայտնել էր, որ Ստեփան Կարախանյանը, չարաշահելով պաշտոնեական լիազորությունները, ՀՀ մարզերում ոստիկանության աշխատանքները կազմակերպելու համար իր ենթակայության տակ գտնվող առանձին վաշտերին հասանելիք եւ իրեն վստահված շուրջ 277 000 լիտր բենզինից ըստ նպատակի հատկացրել է  121 000 լիտրը, իսկ տարբերությունը՝ յուրացրել: