Հաջորդ շաբաթ Ֆրանկֆուրտի ավտոսրահում կկայանա Maserati-ի նորագույն սպորտային ամենագնացի համաշխարհային պրեմիերան, իսկ առայժմ մատչելի են դարձել ավտոմեքենայի «կիսապաշտոնական» լուսանկարները: Ինչպես հաղորդվում էր նախկինում, Maserati ամենագնացը կառուցվել է Jeep Grand Cherokee-ի պլատֆորմի վրա: Ընդ որում, ավտոմեքենան ունի լիովին օրիգինալ թափք եւ ինտերյեր:
Ավտոմեքենայի մասին տեղեկությունները շատ սուղ են, հայտնի չէ նույնիսկ, թե ինչ անուն նա կստանա: Փոխարենը հաստատ հայտնի է, որ ավտոմեքենան կունենա իտալական շարժիչներ. 4,7-լիտրանոց բենզինային «ութնյակ»` 450 ձիաուժ հզորությամբ, որը փոխառվել է Maserati Quattroporte Sport GT-ից եւ Maserati GranTurismo S-ից, ինչպես նաեւ VM Motori ընկերության տուրբոդիզելային շարժիչ` 241 ձիաուժ հզորությամբ: Վերջինս իր տեղն է գտել նաեւ Jeep Grand Cherokee-ի կապոտի տակ:
Հաջորդ սերնդի Maserati ամենագնացը եւ Quattroporte սեդանը, Fiat-ի ղեկավար Սերջիո Մարկկիոնեի մտահղացմամբ, պետք է ավելացնեն Maserati ավտոմեքենաների վաճառքները 10 անգամ` տարեկան 5 600-ից մինչեւ 50 000: Ընդ որում հիմնական դերն այս ծրագրերում պատկանում է ամենագնացին: Իտալացիները չեն կասկածում, որ այս ավտոմեքենան մեծ պահանջարկ կունենա ԱՄՆ-ում: Ագրեգատային բազան եւ Jeep Grand Cherokee-ի պլատֆորմը հավանաբար նպաստել են մշակման ընթացքում ծախսերի տնտեսմանը, այնպես որ կարելի է սպասել խելամիտ գնի:
Like
OK
