2011թ. 9 ամիսների ընթացքում Հայաստանում գրանցվել է 1593 ճանապարհատրանսպորտային պատահար (ՃՏՊ), որոնցից 538-ը հետիոտնի մասնակցությամբ:
Ինչպես հաղորդում է Մեդիամաքս-ը, այս մասին այսօր Երեւանում կայացած “Ճանապարահային անվտանգության կրթությունը Հայսատանում” կլոր սեղան-քննարկման ժամանակ ասել է Ճանապարհային ոստիկանության ճանապարհապարեկային ծառայության բաժնի պետ Նորիկ Սարգսյանը։
Նրա փոխանցմամբ, նախորդ տարվա 9 ամիսների ընթացքում հանրապետությունում գրանցվել էր 1974 ՃՏՊ, որոնցից 752-ը հետիոտնի մասնակցությամբ:
Նորիկ Սարգսյանի խոսքով, 2010 թ. 9 ամիսներին արձանագրվել էր 96 մանկական վրաերթ, 8 զոհ, իսկ այս տարվա 9 ամիսների ընթացքում վրաերթի զոհ է դարձել 4 երեխա:
Նա նաեւ տեղեկացրել է, որ միայն այս տարվա ընթացքում ՃՈ կազմել է 510 հազար վարչական արձանագրություն կարգազանց վարորդների նկատմամբ:
Նորիկ Սարգսյանն ասել է, որ ՃՏՊ-ների քանակը նվազեցնելու համար բավարար չէ միայն ՃՈ կողմից խիստ վարչարարության իրականացումը։ Նրա խոսքով, անհրաժեշտ է շարունակել անվտանգ ու կանոնավոր երթեւեկության մասին քարոզչությունը ուսումնական հաստատություններում եւ ԶԼՄ-ներով:
Like
OK
