Like
OK
Կայացավ Renault Arkana մոդելի պաշտոնական շնորհանդեսը
Դիլերներ
Երեւան: Մեդիամաքս: ՀՀ ճանապարհային ոստիկանության կողմից Երեւանում էվակուացիայի են ենթարկվում այն մեքենաները, որոնք կանգ են առնում արգելված վայրում եւ խոչընդոտում են երթեւեկությանը:
Այդ մասին Մեդիամաքս-ի հետ զրույցում ասել է ՀՀ Ճանապարհային ոստիկանության առաջին սպայական գումարտակի հրամանատարի տեղակալ Աշոտ Կիրակոսյանը:
“Այս գործընթացը մենք սկսել ենք ընդամենը մի քանի օր առաջ: Այս պահին մեր տրամադրության տակ ունենք նոր վերանորոգված մեկ էվակուատոր, որը աշխատում է օրական մի քանի ժամ: Այդ մեքենան էվակուացնում է այն ավտոմեքենաները, որոնք կոպիտ խախտումներ են թույլ տալիս` կանգ են առել խաչմերուկից առաջ, երկրորդ շարքում, արգելված տեղերում եւ խոչընդոտ են հանդիսանում երթեւեկության համար,”- Մեդիամաքս-ին ասել է Աշոտ Կիրակոսյանը:
Նրա խոսքով, եթե մինչեւ մեքենան տուգանային հրապարակ տանելը վարորդը հասցնում է մոտենալ, տեղում կազմվում է խախտման արձանագրություն եւ ավտոմեքենան չի էվակուացվում: Հակառակ դեպքում, մեքենան էվակուատորով տարվում է տուգանային հրապարակ, եւ արձանագրությունն այնտեղ է կազմվում, սահմանվում է տուգանքի չափը, որից հետո վարորդը կարող է վերցնել իր մեքենան:
Ոստիկանը նշել է, որ էվակուատորն առայժմ գործում է միայն Երեւանի կենտրոնական փողոցներում, բայց ամանորյա տոներից հետո նախատեսվում է ավելացնել էվակուատորների քանակը եւ ընդլայնել աշխատանքի աշխարհագրությունը:
«Երբ խախտում կատարած մեքենան բերում ենք տուգանային հրապարակ, անմիջապես տեղյակ ենք պահում տվյալ շրջանի ոստիկանության բաժինը, թե ինչ պետհամարանիշներով ինչ մեքենա է բերվել այստեղ, որ իրենք գրանցեն այդ փաստը: Բնականաբար, երբ մեքենայի տերը գալիս է եւ տեսնում, որ իր մեքենան չկա, դիմում է ոստիկանություն, եւ նրան ասում են, որ իր մեքենան չեն գողացել, այլ այն սխալ կանգառման համար տեղափոխվել է ճանապարհային ոստիկանության հատուկ պահպանման տարածք, եւ նրան անհրաժեշտ է գալ մեզ մոտ»,- պարզաբանել է ոստիկանության աշխատակիցը:
Աշոտ Կիրակոսյանը նաեւ նշել է, որ տուգանքի չափը կախված է խախտումից` 3.000 դրամից մինչեւ 20 000 դրամ:
Ծանուցումներ
Ծանուցումներ ստանալու համար անհրաժեշտ է մուտք գործել Ձեր հաշիվ։
