Տեսախցիկներին եւ արագաչափերին «խաբել» հնարավոր չէ

Հունվարի 16-ից Երեւանում սկսեց գործել տեսախցիկների եւ արագաչափ սարքերի համակարգը, որը վերահսկում է երթեւեկության կանոնների խախտումները եւ արձանագրում դրանց: Համակարգի աշխատանքի մասին Մեդիամաքս-ին պատմել է նախագծի ղեկավար Ալեքսան Զաքարյանը:

Նա նշել է, որ վիճակագրության համաձայն, հունվարի 15-ին, համակարգի պաշտոնական գործարկումից մեկ օր առաջ, արագաչափը մեկ օրվա ընթացքում ֆիքսել էր 860 խախտում, իսկ հետագա 4 օրերի ընթացքում ընդհանուր առմամբ` 748 խախտում, այսինքն` օրական միջինը 187 խախտում:

Համակարգը բաժանված է 2 մասի` մայրուղիներում տեղադրված արագաչափ սարքեր եւ խաչմերուկներում տեղադրված տեսախցիկներ: Յուրաքանչյուր խաչմերուկում տեղադրված է 4-5 տեսախցիկ: 

Խախտումը արձանագրելու գործընթացը բաղկացած է 3 քայլերից: 

Առաջին քայլի ժամանակ օպերատորները համակարգչի օգնությամբ հետեւում են երթեւեկությանը եւ ֆիքսում խախտումը: “Այս փուլում օպերատորը չի տեսնում մեքենայի պետհամարանիշները: Երբ օպերատորը ֆիքսում է խախտումը, նա սեղմում է կոճակը, եւ դրանից հետո 40 վայրկյան տեւողություն ունեցող տեսանյութը ուղարկում է սերվերի վրա եւ պահպանվում է այնտեղ: Ինչու՞ հենց 40 վայրկյան. որպեսզի ստանանք ամբողջական պատկերը”, - ասել է Ալեքսան Զաքարյանը:

Կա նաեւ մերժման մեխանիզմ, երբ խոսքը գնում է անընթեռնելի պետհամարանիշի, խոտանի կամ հատուկ մեքենաների մասին, օրինակ` շտապ օգնության: Այդ մեքենաների համար սահմանված են հատուկ «զամբյուղներ» եւ բոլոր այդ մեքենաները ստուգվում են` որն ինչ պատճառով է մերժված: Օրինակ` եթե պարզվի, որ օպերատորը այնտեղ տեղադրել է իր ծանոթի մեքենան, նա կենթարկվի պատասխանատվության: Եթե առաջ տեսուչը կարող էր գումար վերցնել փողոցում, եւ դա ոչ մի տեղ չեր ֆիքսվելու, ապա հիմա ողջ պատմությունը եւ պատկերը մնում են համակարգի հիշողության մեջ:

Ալեքսան Զաքարյանի խոսքով, երկրորդ քայլը “պրոցեսինգն” է, այլ կերպ ասաց` արձանագրված խախտման մշակումը: Օպերատորը մուտքագրում է իր ծածկագիրն եւ դրանից հետո պատասխանատվություն է կրում իր ամեն քայլի համար: Այս փուլում խախտման տեսանյութը եւ այն կատարած ավտոմեքենաների պետհամարամանիշները ուղարկվում են ՃՈ տեսուչներին:

Երրորդ քայլը արձանագրությունների կազմումն է տեսուչների կողմից: Երբ տեսուչը տալիս է իր հավանությունը, որոշման նախագիծը ստանում է իր հերթական համարը եւ ծածկագիրը: Ստանալով արձանագրությունը իր կատարած խախտման մասին, վարորդը կարող է այդ ծածկագիրը ներմուծել ոստիկանության կայքի հատուկ բաժնում եւ տեսնել իր խախտումը:

Ալեքսան Զաքարյանը Մեդիամաքս-ին ասել է, որ համակարգը ներդնելուց առաջ լրջորեն ուսումնասիրվել է միջազգային փորձը, եւ իրենք տեղերում ծանոթացել են Ռուսաստանի եւ Վրաստանի փորձին:

Միաժամանակ, ասել է նա, որ նման կատարելագործված համակարգ, ինչպիսին տեղադրվել է Հայաստանում, որեւէ տեղ չկա: Համակարգի յուրահատկությունների ցանկում նա նշել է 15 Մպ տեսախցիկները:

Պատասխանելով այն հարցին, թե որո՞նք են լինելու ընկերության անելիքները մոտ ապագայում, Ալեքսան Զաքարյանն ասել է, որ ցանկություն կա ավտոմացման էլեմենտներ մտցնել խաչմերուկներում, ավելի կատարելագործել համակարգն եւ 6 տարվա ընթացքում մայրաքաղաքի 80 խաչմերուկներում տեղադրել 195 արագաչափեր:

Հնարավոր է արդյո՞ք խաբել այս համակարգն. արդեն խոսում են տարբեր հնարքների մասին: Ալեքսան Զաքարյանի պատասխանը հակիրճ էր. “ցանկացողները թող փորձեն եւ տեսնեն` կհաջողվի դա իրենց, թե` ոչ: Ինչքան շատ փորձ են, այնքան շատ արձանագրություններ կկազմենք”:

Արամ Արարատյան

Facebook Odnoklassniki

5583 դիտում