Տեսագրող եւ արագաչափ սարքերն արդեն արձանագրել են 10 000-ից ավելի խախտումներ

Մայրաքաղաքի 10 բանուկ խաչմերուկներում տեղադրված տեսագրող սարքերը եւ 15 արագընթաց ճանապարհներին տեղադրված արագաչափերը 2012թ. հունվար ամսվա ընթացքում արձանագրել են ճանապարհային երթեւեկության 10 000-ից ավելի խախտումներ:

Ինչպես հաղորդում է Մեդիամաքս-ը, Ճանապարհային ոստիկանության ճանապարհապարեկային ծառայության բաժնի պետ Նորիկ Սարգսյանն այսօր տեղեկացրել է, որ այս տարվա ընթացքում Երեւանի 15 խաչմերուկներում եւ 50 արագընթաց ճանապարհներին եւս տեղադրվելու են տեսագրող եւ արագաչափ սարքեր:

Նրա խոսքերով, խնդիրներ են առաջացել խախտում կատարած վարորդների ինքնության եւ բնակության հասցեների հետ կապված:

“Այս օրերին Ճանապարհային ոստիկանությունում վարորդների մեծ հոսք կա, որոնք տեղեկացնում են, որ վաղուց վաճառել են իրենց տրանսպորտային միջոցները եւ դրանք օգտագործող վարորդների վերաբերյալ տեղեկություններ չունեն: Այդ դեպքում մենք փորձում ենք ճշտել տվյալ տրանսպորտային միջոցով խախտում կատարած վարորդի ինքնությունը”,-ասել է նա:

Ճանապարհապարեկային ծառայության բաժնի պետն ասել է, որ խախտումների դիմաց վարչարարական տույժերի 70%-ը հատկացվում է սարքերը ներդնող կազմակերպությանը, իսկ 30%-ը` ճանապարհային ոստիկանությանը:

Facebook Odnoklassniki

12510 դիտում