Like
OK
Կայացավ Renault Arkana մոդելի պաշտոնական շնորհանդեսը
Դիլերներ
Համապատասխան փաստաթղթի բացակայության դեպքում տեսախցիկի կողմից արձանագրված խախտման համար պատասխանատվությունը կրում է ոչ թե վարորդը, այլ սեփականատերը:
Մեդիամաքս-ի հետ զրույցում անդրադառնալով ճանապարհային տեսախցիկների եւ արագաչափ սարքերի կիրառմամբ առաջացած մի շարք խնդիրներին՝ ՀՀ ճանապարհային ոստիկանության իրավաբանական բաժնի պետ, ոստիկանության փոխգնդապետ Արման Չիլինգարյանն ասել է, որ տեսախցիկները ֆիքսում են մեքենաների պետհամարանիշները, ոչ թե ղեկին նստած վարորդին: Դա նշանակում է, որ տուգանք է կրում ոչ թե վարորդը, այլ մեքենայի սեփականատերը, որոնք միշտ չէ, որ նույն մարդիկ են:
Արման Չիլինգարյանը ներկայացրեց խնդրի լուծման 3 տարբերակներ:
Այն դեպքում, եթե մեքենան լիազորագրով է հանձնվել այլ անձի, տուգանվելու դեպքում սեփականատերը ներկայացնում է պայմանագիրը եւ դիմում գրում: Այդ դեպքում սեփականատերն ազատվում է տուգանքից, եւ այն պետք է վճարի վարորդը:
Եթե մեքենան վաճառվել է նոտարական պայմանագրով կամ լիազորագրով, բայց նոր սեփականատերը իր անունով չի գրանցել, ապա տուգանքի մասին նամակն ուղարկվում է այն անձին, ում անունով այդ պահին գրանցված է մեքենան, այսինքն` նախկին սեփականատիրոջը: Այս դեպքում եւս վաճառողը պայմանագրի իր օրինակով եւ դիմումով պետք է ներկայանա ճանապարհային ոստիկանություն, որից հետո տուգանքը կուղղվի մեքենայի նոր տիրոջը:
Այն դեպքում, երբ մեքենան վաճառվել է առանց որեւէ փաստաթղթի՝ բանավոր համաձայնությամբ, այն անձը, ում անունով գրանցված է մեքենան, ստիպված կլինի պատասխանատվություն կրել, կամ էլ ինքնուրույն, առանց ոստիկանության միջամտության գտնել վարորդին եւ պահանջել վճարել տուգանքը:
«ՀՀ կառավարության 2010թ. հուլիսի 1-ի որոշմամբ, 15-օրյա ժամկետում քաղաքացին պարտավոր է ՃՈ-ում գրանցել իր սեփականության իրավունքը: Մեքենան համարվում է վտանգավոր գույք` զենքի նման: Անզգուշությունն էլ կարող է վթարի պատճառ դառնալ»,- ասում է Արմեն Չիլինգարյանը:
Ըստ ավտովարորդների իրավունքների պաշպանության «Աքիլես» հասարակական կազմակերպության փորձագետ Զորեն Լուս-Պարոնյանը, Ճանապարհային տեսախցիկների կիրառման կարճ ժամանակահատվածում նման դեպքեր արդեն եղել են եւ դրանք արագ լուծում են ստացել:
«Դիմել են մեզ, մենք խորհրդատվություն ենք անցկացրել: Այդ կարգի մասին նշվում է նաեւ տուգանքի մասին ծանուցման մեջ»,- նշում է «Աքիլես»-ի մասնագետը:
Նախատեսված է մինչեւ 2017թ. ՀՀ տարածքում տեղադրել ընդհանուր առմամբ 195 արագաչափ սարք` միջպետական մայրուղիներում եւ Երեւանի խաչմերուկներում, ընդ որում 30-35 տեսախցիկ կտեղադրվի մինչեւ այս տարեվերջ, որից միայն 10-12-ը՝ Երեւանում:
«Հնարավոր է շատ ավելի շուտ ավարտենք այդ աշխատանքները: Ամեն ինչ արվում է երթեւեկությունն ապահով դարձնելու համար»,- Մեդիամաքս-ի հետ զրույցում նշեց Արման Չիլինգարյանը, ավելացնելով, որ երթեւեկության կանոնները խախտելու դեպքում անպատիժ չեն մնա նաեւ արտասահմանյան պետհամարանիշերով ավտոմեքենաները:
Ծանուցումներ
Ծանուցումներ ստանալու համար անհրաժեշտ է մուտք գործել Ձեր հաշիվ։
