Like
OK
Կայացավ Renault Arkana մոդելի պաշտոնական շնորհանդեսը
Դիլերներ
Գիտեմ, որ ներքաղաքական, նախընտրական, միջազգային իրադարձությունների ֆոնին գրածս կարող է առաջին հայացքից աննշան կամ նույնիսկ զվարճալի թվալ, բայց իրականում խոսքը մարդկանց կյանքի մասին է, եւ այն, որ մինչ օրս որեւէ մեծ դժբախտություն չի պատահել (կամ գուցե եւ պատահել է, պարզապես ես տեղյակ չեմ), ավելի շուտ պատահականություն է, քան օրինաչափություն:
Եվ այսպես, շատ երթուղային տաքսիներն Երեւանում երեկոյան ժամերին երթեւեկում են անջատված լուսարձակներով (ֆառերով): Առաջին անգամ նկատեցի դա մոտ մեկ շաբաթ առաջ, սկզբում մտածեցի, թե աչքիս է թվացել, բայց հետո, երբ ուշադիր հետեւեցի երթեւեկությանը, նկատեցի, որ հատկապես համեմատաբար լուսավոր փողոցներում երթուղային տաքսիները լուսարձակներ չեն միացնում, լավագույն դեպքում` ենթալուսարձակներ /подфарники/:
Ճանապարհային երթեւեկության կանոններն արգելում են օրվա մութ ժամանակ վարել մեքենան առանց լուսարձակների, անկախ նրանից, թե ինչպիսի փողոցային լուսավորությունը: Դրան կա շատ պարզ բացատրություն. նույնիսկ եթե փողոցը լավ լուսավորված է, եւ երթուղայինի վարորդը լավ է տեսնում շուրջբոլորը, դա չի նշանակում, թե նրա մեքենան լավ տեսանելի է մյուս մեքենաների համար: Ամենեւին:
Հատկապես մգեցված ապակիներով մեքենաների համար (իսկ դրանք մեր իրականության մեջ քիչ չեն) անջատված լուսարձակներով մեքենան բազմաթիվ տհաճ անակնկալներ է պարունակում, էլ չասած հետիոտնի մասին, ում համար երթուղայինի անսպասելի մոտեցումը կարող է ճակատագրական լինել: Ասեմ նաեւ, որ մի շարք երկրներում, այդ թվում ԱՄՆ-ի բազմաթիվ նահանգներում, լուսարձակները պարտադիր միացված պետք է լինեն նաեւ ցերեկային ժամերին: Ապացուցված է, որ դա զգալիորեն նվազեցնում է վթարների թիվը, քանզի միացված լուսարձակներով մեքենան շատ ավելի տեսանելի է թե մյուս մեքենաների, եւ թե հետիոտնի համար:
Փորձեցի պարզել պատճառը ծանոթ վարորդից: Այն պրիմիտիվ էր` երթուղայինների վարորդները վառելիք են տնտեսում: Ինչ-որ մեկը նրանց ասել է, որ անջատված լուսարձակներն ահավոր շատ գազ են խնայում:
Այս պարագայում հետաքրքիր է ճանապարհային ոստիկանության վերաբերմունքը: Այն բացակայում է: Հերթապահող ճանապարհային ոստիկանները բացարձակ անտարբերության են մատնում երթուղայինների “չարաճճիությունը”: Ենթադրում եմ, որ անտարբեր են նաեւ ոստիկանական տեսախցիկները, որոնք վերջին շրջանում առատորեն տեղադրվել են մայրաքաղաքի խաչմերուկներում: Ինչո՞ւ եմ այդպես կարծում: Պարզապես երթուղայինների եւ տաքսիների վարորդները շփվող մարդիկ են /երբեմն` չափից ավել/, եւ եթե նրանցից մի քանիսին տուգանեին իրենց արարքի համար, ապա մյուսներն անմիջապես կտարածեին այդ լուրը:
Չեմ կարծում, թե ճանապարհային ոստիկանները չեն նկատում այս անօրինականությունը: Գուցե պարզապես թերագնահատում են դրա վտանգավորությունը: Կամ հարմար առիթի են սպասում, որ սկսեն ճնշել “մարշրուտկեքին”: Նույնիսկ վախենում եմ պատկերացնել, թե ինչը կարող է նման առիթ դառնալ…
Դավիթ Ալավերդյան
Մեդիամաքսի գլխավոր խմբագիր
Ծանուցումներ
Ծանուցումներ ստանալու համար անհրաժեշտ է մուտք գործել Ձեր հաշիվ։
