Բացվել է Ճանապարհային ոստիկանության նոր հաշվառման-քննական բաժինը

Երեւան: Մեդիամաքս: ՀՀ նախագահ Սերժ Սարգսյանն այսօր ներկա է գտնվել ՀՀ ճանապարհային ոստիկանության Երեւանի նոր հաշվառման-քննական բաժնի բացման արարողությանը:

Նախագահը ծանոթացել է ստորաբաժանման գործունեությանն ու տրանսպորտային միջոցների գրանցման, հաշվառման, վարորդական վկայականների հատկացման գործընթացի բարեփոխումների ուղղությամբ իրականացված աշխատանքներին, քաղաքացիներին մատուցվող ծառայությունների որակին:

Երեւանի հաշվառման-քննական բաժինը միավորում է Ճանապարհային ոստիկանության Երեւանի թիվ 1, թիվ 2 եւ թիվ 3 հաշվառման-քննական բաժանմունքները՝ կազմելով մեկ ստորաբաժանում:

Նորակառույց վարչական շենքում գործող բաժինը քաղաքացիներին կսպասարկի վաղվանից:

Նախագահին զեկուցել են, որ տրանսպորտային միջոցների գրանցման, հաշվառման եւ վարորդական վկայականների հատկացման պարզեցված նոր ընթացակարգերի գործարկմամբ զգալիորեն կկրճատվի այդ աշխատանքների իրականացման համար պահանջվող ժամանակը: Մասնավորապես, հաշվառման եւ գրանցման համար ներկայիս 1-2 ժամվա փոխարեն այն կտեւի 30-35 րոպե:

Վերոնշյալ բարեփոխումների իրականացման համար ընդհանուր առմամբ ներդրվել է շուրջ 1 մլրդ 400 մլն դրամ՝ ՀՀ ոստիկանության արտաբյուջետային միջոցների հաշվին:

Facebook Odnoklassniki

16705 դիտում