Like
OK
Կայացավ Renault Arkana մոդելի պաշտոնական շնորհանդեսը
Դիլերներ
35 D 01 ARM դիվանագիտական պետհամարանիշերով սեւ գույնի Toyota Fortuner մեքենան մի քանի օր շարունակ կայանում է կատարում Երեւանի Թումանյան-Տերյան փողոցների հատման այն հատվածում, որտեղ երթեւեկությունը միակողմանի է, իսկ կայանումը՝ արգելված:
Հավաստի աղբյուրներից մեզ հայտնի դարձավ, որ այդ մեքենան սպասարկում է Միջազգային Ֆինանսական Կորպորացիայի (IFC) երեւանյան գրասենյակը:
Ինչպես Մեդիամաքս-ի հետ զրույցում նշեց Ճանապարհային ոստիկանության պետի տեղակալ, ոստիկանության փոխգնդապետ Եգոր Կարապետյանը, ՀՀ-ում շահագործվող բոլոր տրանսպորտային միջոցների վարորդները պարտավոր են պահպանել ՀՀ ճանապարհային երթեւեկության կանոնները:
«Այն դեպքում, երբ իրավախախտում կատարած անձն օգտվում է դիվանագիտական անձեռնմխելիության իրավունքից, նրա վարչական պատասխանատվության հարցը լուծվում է դիվանագիտական ճանապարհով: Այլ կերպ ասած, եթե իրավախախտում կատարած տրանսպորտային միջոցը կրում է «D» տառ պարունակող կարմիր հիմնագույնի համարանիշեր, ապա իրավախախտման վերաբերյալ նյութերն ուղարկվում են ՀՀ արտաքին գործերի նախարարություն` վարչական պատասխանատվության հարցը լուծելու համար: Իսկ եթե իրավախախտում կատարած տրանսպորտային միջոցը կրում է «T» տառ պարունակող կարմիր հիմնագույնի համարանիշեր, այդ տրանսպորտային միջոցի վերաբերյալ հարցում է ուղարկվում ՀՀ ԱԳՆ, եւ եթե պարզվում է, որ իրավախախտում կատարած անձը չունի դիվանագիտական անձեռնմխելիության իրավունք, ապա նրա նկատմամբ վարչական պատասխանատվություն է կիրառվում ընդհանուր հիմունքներով: Եթե պարզվում է, որ իրավախախտում կատարած անձն ունի դիվանագիտական անձեռնմխելիության իրավունք, ապա այդ դեպքում եւս իրավախախտման վերաբերյալ նյութերն ուղարկվում են ՀՀ ԱԳՆ` վարչական պատասխանատվության հարցը լուծելու համար», - ասել է Եգոր Կարապետյանը:
ՀՀ ԱԳՆ մամուլի քարտուղար Տիգրան Բալայանը Մեդիամաքս-ի հետ զրույցում հայտնել է, որ դիվանագիտական պետհամարանիշներով մեքենայի կողմից երթեւեկության կանոնների խախտման մասին արձանագրությունը, ընդունված կարգի համաձայն, ուղարկվում է համապատասխան դիվանագիտական ներկայացուցչություն: “Վիեննայի կոնվենցիայի համաձայն, դիվանագետը պարտավոր է հարգել ընդունող երկրի օրենսդրությունը”,- նշել է Տիգրան Բալայանը:
Մեդիամաքս-ին չհաջողվեց պարզել, թե հետագա ինչպիսի ընթացք են ստանում կազմված արձանագրությունները, քանզի դիվանագիտական անձեռնմխելիություն ունեցող անձանց խախտման համար պատասխանատվության ենթարկելու իրավական մեխանիզմներ գոյություն չունեն, ինչը փաստացի նշանակում է, որ տվյալ տրանսպորտային միջոցները կարող են շարունակել արհամարհել ՀՀ երթեւեկության կանոնները:
Ծանուցումներ
Ծանուցումներ ստանալու համար անհրաժեշտ է մուտք գործել Ձեր հաշիվ։
