Վոլգա՞, թե BMW՞

Հայաստանում գրեթե չկան ավտոարհեստանոցներ կամ ատելյեներ, որոնք կարող են  բարձր մակարդակի թյունինգային աշխատանքներ իրականացնել: “Աբսեռ-Արտ” ընկերությունը երեւի թե միակն է Հայաստանում, որը կարող է ավտոմեքենան կերպարանափոխել ձեր ցանկությունների համաձայն:

“Աբսեռ-Արտ”-ի հերթական աշխատանքներից է ահա այս ավտոմեքենան: Առաջին հայացքից սա “Վոլգա” է, բայց դա միայն առաջին հայացքից: “Աբսեռ-Արտ”-ի այս աշխատանքը “Վոլգա 21”-ի  եւ BMW-ի յուրահատուկ հիբրիդ է: Հենց սկզբից աչքի է ընկնում,  որ ավտոմեքենան ոչ թե 4-դռնանի է, այլ իրենից ներկայացնում է կուպե. այդպես է ցանկացել պատվիրատուն: Սակայն ամենակարեւոր փոփոխությունները ներսում են. ընթացային մասն ամբողջովին վերցված է 7-րդ դասի BMW-ից, հզորացված շարժիչը` 4.4 լիտրանոց եւ, իհարկե, ավոմեքենայի ինտերյերը, որն ամբողջովին նախագծված եւ իրականացված է “Աբսեռ-Արտ” ընկերության կողմից:

Ինպես նշեց ընկերության մենեջեր Լեւոն Թոփալյանը, պատվիրատուն, որը ցանկացել էր ստանալ այսպիսի օրիգինալ ավտոմեքենա, ընթացային եւ թափքային մասի աշխատանքները կատարել էր ինքնուրույն` ծախսելով մոտ 8-9 ամիս ժամանակ: Իսկ ահա ինտերյերի հետ կապված թյունինգային աշխատանքներն իրականացրել է “Աբսեռ-Արտ” ընկերությունը մոտ 2 ամսում:

Ներսում օգտագործվել են միայն ամենաորակյալ եւ թանկարժեք նյութերը` կաշի, ալկանտարա, որով պատված է ողջ առաստաղը, ինտերյերում “Վոլգա” մակնիշն է հիշեցնում դիմացի  ռետրո ոճի ժամացույցը եւ “Վոլգա” գրվածքը:

“Աբսեռ-Արտ” ընկերությունն իրագործել է բազմաթիվ նմանատիպ նախագծեր: Ինչպես նշեց Լեվոն Թոփալյանը, ընկերության աշխատանքների թվում են “Պոբեդա”, Լինկոլն Մարկ III, Mercedes-Benz 560 ավտոմեքենաների թյունինգը:

Մեր այն հարցին, թե որքա՞ն գումար է հարկավոր նմանատիպ նախագիծ իրագործելու համար, Լեւոն Թոփալյանն ասաց, որ չի կարող բացահայտել այդ տեղեկությունը պատվիրատուի խնդրանքով: “Ամեն ինչ կախված է պատվիրատուի ֆանտազիաից եւ գրպանից, սակայն ամեն դեպքում դա էժան հաճույք չէ”, - ասաց “Աբսեռ-Արտ”-ի մենեջերը:

Մեր սեփական հաշվարկներով, այս “Վոլգա”-յի թյունինգի արժեքը կարող է մոտ լինել  պրեմիում դասի նոր ավտոմեքենայի գնին:

Facebook Odnoklassniki

36139 դիտում