Like
OK
Կայացավ Renault Arkana մոդելի պաշտոնական շնորհանդեսը
Դիլերներ
Երեկ Հայաստանում առաջին անգամ անցկացվել է ավտոմեքենաների “Tuning Show”. Հաղթանակի զբոսայգում կողք կողքի ներկայացվել են թյունինգի ենթարկված տարբեր մակնիշի ավտոմեքենաներ ու մոտոցիկլետներ, որոնք նաեւ մրցույթի են մասնակցել:
Հաղթանակի զբոսայգում ներկայացվել են թյունինգի ենթարկված ավտոմեքենաներ
Մրցույթ-ցուցահանդեսի կազմակերպիչները “Ադրենալին” էքստրեմալ սպորտաձեւերի ֆեդերացիան եւ “ԱրմենՏել” ընկերությունն էին: Ֆեդերացիայի հիմնադիր-նախագահ Արտաշես Ստեփանյանը BRAVO.am-ի հետ զրույցում հայտնել է, որ այս տարվա հաջողության դեպքում միգուցե “Tuning Show”-ն շարունակական բնույթ ունենա. “Շատերը տեղյակ չեն, չգիտեն, որ նման միջոցառում կա, համեմատաբար քիչ մարդ է հավաքվել: Մասնագետներն են ավելի հետաքրքրված, հուսանք` հետագայում ավելի շատ մարդիկ կհասկանան իմաստը եւ կմասնակցեն նմանատիպ շոուների”:
Արտաշես Ստեփանյանը, ավտոմեքենաների գիտակ լինելով, իր մեքենաները ենթարկել է էքստրեմալ թյունինգի:). “Մարդ կա սիրում է, որ իր մեքենան գործարանային վիճակում լինի, միայն հնչունային տեխնիկան է թյունինգ անում, մարդ էլ կա արտաքին դիզայնն է փոխում նկարչության միջոցով, իսկ իմ դեպքում ավտոմեքենայի ներքին մասերն են փոխված”:
Միջոցառման` "De Vinci Group"-ի կազմակերպած շոուի մասն ապահովել են հայ դիզայներների ստեղծած հագուստը կրող մոդելները, որոնք լուսանկարվել են թյունինգ արված ավտոմեքենաների ֆոնին: Կազմակերպիչների կարծիքով` նորաձեւությունն անմիջականորեն կապված է ավտո-թյունինգի հետ, քանի որ հագուստն էլ մոդելավորողներն են “թյունինգի” ենթարկում:
Աէրոգրաֆիայի մասնագետ, ժյուրիի անդամ Լեւոն Ալեքսանյանը հայտնել է, որ թյունինգն ունի տարբեր դրսեւորումներ. “Թյունինգը մեքենաների վերակատարելագործումն է, որը մի քանի աստիճան ունի. կարող է լինել միայն արտաքին դիզայնի փոփոխությունից մինչեւ մեքենայի սրահի, թափքի փոփոխություն: Ճապոնացիներն ասում են, որ թյունինգը լինում է 3 տեսակի` թանկարժեք, էժանագին եւ անիմաստ”:
Մինչ մրցույթի հաղթողների անունները հայտարարելը, տեղի է ունեցել հագուստի ցուցադրություն: Նախ՝ ներկաներին իրենց թմբուկների զարկերով ողջունել են “Երեւանյան թմբուկներ” խմբի աղջիկները: Երիտասարդ մոդելավորողներ Տաթեւ Մուսարյանի, Սերժի, Լիլիթ Ալեքսանյանի, Անահիտ Գեւորգյանի, Կլարա Խանզադյանի, Սուսաննա Աղգաշյանի զգեստները բացօթյա բեմահարթակում ցուցադրել են պրոֆեսիոնալ եւ սկսնակ մոդելները:
“Ադրենալին” էքստրեմալ սպորտաձեւերի ֆեդերացիայի PR պատասխանատու Տաթեւիկ Չապեջյանը, որը զբաղվել է մոդելների ընտրությամբ, տեղեկացրել է, որ մոդելներին ընտրելիս առաջնորդվել է հետեւյալ սկզբունքով. “Պայքարում ենք անորեքսիայի դեմ, մեկ մոդելի էլ ընտրել ենք՝ հաշվի չառնելով ընդունված ստանդարտները”:
Դիզայներներից մեկը` Լիլիթ Ալեքսանյանը, ներկայացրել է գոթական ոճի զգեստներ. “Հավաքածուն ստեղծելիս ոգեշնչվել եմ գոթական ճարտարապետությունից: Զգեստները մեքենաների հետ անմիջական կապ չունեն, բայց փորձել ենք միախառնել` մոդելներին լուսանկարելով ավտոմեքենաների հետ”:
Էրիկ Անթառանյանը, որը եղել է ժյուրիի կազմում, հայտարարել է հաղթողների անունները՝ նշելով, որ առաջին հորիզոնականի համար ընտրությունը դժվար է եղել: “Լավագույն հնչողություն”, “Լավագույն աէրոնկարչություն”, “Լավագույն սրահ”, “Լավագույն թափք”, “Լավագույն մոտո-թյունինգ”, “Լավագույն Deep Tuning” անվանակարգերում հաղթող մասնակիցների շարքում ամենալավ թյունինգ արված մոտոցիկլետի սեփականատերը եղել է Լեհաստանից:
“Ադրենալին” էքստրեմալ սպորտաձեւերի ֆեդերացիայի հիմնադիր-նախագահ Արտաշես Ստեփանյանը եւ Էրիկ Անթառանյանը
Դիջեյներ R-Men-ը եւ Extreme-ը դիջեյական վահանակի մոտ ապահովել են էլեկտրոնային ռիթմեր, իսկ շոուի ավարտին պարել է Բագիրան:
Տեքստը` Լիանա Մեյթարջյանի /Bravo.am/
Լուսանկարները` Էմին Արիստակեսյանի /Bravo.am/
Ծանուցումներ
Ծանուցումներ ստանալու համար անհրաժեշտ է մուտք գործել Ձեր հաշիվ։
