Մահացել է մեծագույն ավտոդիզայներ Սերջո Պինինֆարինան

Նախորդ գիշեր Թուրինի իր տանը 86 տարեկան հասակում մահացել է խոշոր ձեռնարկատեր, հռչակավոր ավտոդիզայներ եւ ցմահ սենատոր Սերջո Պինինֆարինան, որի անունը ողջ աշխարհում դարձել է իտալական ոճի խորհրդանիշը:

 
Պինինֆարինայի անվան հետ կապված է ընկերության սրընթաց զարգացումը, որը թափքեր էր ստեղծում լավագույն իտալական ավտոմեքենաների համար: Իսկ ընկերությունը 1930 թվականին հիմնադրել էր նրա հայրը` Բատտիստա Ֆարինան “Պինին” մականունով: 

1961 թվականին Իտալիայի հանրապետության նախագահի հատուկ որոշմամբ Թուրինի հանրահայտ ձեռնարկատերերի ընտանիքի անդամներին թույլատրվեց ազգանունին ավելացնել հոր մականունը: Այսպես ի հայտ եկավ դինաստիան, որի անունը կրկնում էր ընտանեկան ընկերության անվանումը` Pininfarina:

Պինինֆարինայի եւ նրա ինժեներների ջանքերի շնորհիվ Իտալիայում ստեղծվեցին եզակի ավտոմոբիլային թափքեր, որոնք համաշխարհային շուկայում առանձնանում էին ոճի հատուկ նրբագեղությամբ եւ բարձր աէրոդինամիկ բնութագրերով: 
1988-1992 թվականներին Պինինֆարինան գլխավորում էր Confindustria իտալական արդյունաբերողների միավորումը: 

1991 թվականին Դետրոյտում Պինինֆարինային շնորհվեց Designer Lifetime Achievement Award մրցանակը` որպես աշխարհի լավագույն դիզայների: 

2005 թվականի սեպտեմբերին ի նշան Իտալիայի հանրապետությանը մատուցած հատուկ ծառայությունների, նախագահ Կարլո Աձելիո Չամպին Պինինֆարինային նշանակեց ցմահ սենատոր: 

Facebook Odnoklassniki

5670 դիտում