Like
OK
Կայացավ Renault Arkana մոդելի պաշտոնական շնորհանդեսը
Դիլերներ
ՀՀ կառավարության 2012թ. հունիսի 7-ի որոշմամբ փոփոխություններ կատարվեցին 2007 թ. հունիսի 28-ի N955 որոշման մեջ, որով թույլատրվում է ճանապարհային գծանշումների սեւ գույնը փոխարինել կապույտ եւ կարմիր գույներով, իսկ հետիոտնային անցումների սպիտակ գույնը` դեղինով, ինչն ավելի ընկալեի է վարորդների համար:
Օրերս «Ֆեյսբուք» սոցիալական ցանցում օգտատերերից մեկը տեղադրել էր Գյուլբեկյան-Ավետիսյան փողոցների խաչմերուկի հետիոտնային անցման մի նկար եւ հայտնել, որ այն ներկվել է 4 օր առաջ, բայց անձրեւից հետո նկատվում է 30% մաշվածություն: Մեդիամաքս-ի թղթակիցը փորձել է պարզել` ո՞վ է կատարել աշխատանքն ու ինչո՞ւ է ներկն ընդամենը օրեր անց թափվել:
«Գյուլբեկյան-Ավետիսյան, ինչպես նաեւ Փափազյան-Ավետիսյան փողոցների խաչմերուկներում կատարվել է հետիոտնային անցման ներկի նմուշի փորձարկում` պարզելու ներկի որակը»,- Մեդիամաքս-ի թղթակցին հայտնել է Ճանապարհային ոստիկանության պետի տեղակալ, ոստիկանության փոխգնդապետ Եգոր Կարապետյանը եւ նշել, որ հետիոտնային անցումների, ճանապարհային գծանշումների համար նախատեսված ներկերի համար հայտարարվում է մրցույթ, որի մասնակից ընկերություններից վերցնում են ներկի նմուշը, կատարում փորձարկում: «Ձեր նշած տարբերակում միանշանակ հասկանալի է, որ ներկը որակով չէ, կան ներկեր, որոնց որակը երեւում է 20 օր կամ մեկ ամիս անց: Առաջիկայում այս խաչմերուկների հետիոտնային անցումները կներկվեն»,- ասել է նա:
Հետիոտնային անցման ներկի պահպանման ժամկետը 6 ամիս է, որի ժամանակ պետք է նկատվի մինչեւ 50% մաշվածություն: 6 ամիս անց անցումներն ու ճանապարհային գծանշումները վերանորոգվում են:
«Ճանապարհային գծանշումներն ու հետիոտնային անցումները գտնվում են Ճանապարհային երթեւեկության կազմակերպման հսկողության բաժնի ամենօրյա ուշադրության կենտրոնում»,- ասում է նույն բաժնի պետ Դանիել Դանիելյանը:
«Գյուլբեկյան-Ավետիսյան փողոցների խաչմերուկում հետիոտնային անցման գծանշումը կատարվել է բնակիչներից մեկի խնդրանքով. մի կին զանգահարել եւ խնդրել էր, որ նշված մասում հնարավորինս շուտ գծանշվի հետիոտնային անցումը, քանի որ երեխան ամեն օր դպրոց գնալուց անցնում է այդ ճանապարհով, մենք էլ նմուշներից մեկը փորձարկեցինք այդ հատվածում»,- ասել է Դանիել Դանիելյանը: Նա նշել է, որ փորձնական տարբերակը մոտ մեկ ամիս պետք է «աշխատի», որպեսզի երեւա դրա մաշվածության աստիճանը:
Անդրադառնալով ներկերի մաշվածությանն ու շուտ թափվելու խնդրին` Ճանապարհային երթեւեկության կազմակերպման հսկողության բաժնի պետը նշել է, որ դրան նպաստող տարբեր գործոններ կան, որոնց թվում է եղանակային ոչ բարենպաստ պայմանները. «Խոնավ ժամանակ կամ գիշերվա սառը եղանակին ներկն այնքան կպչուն չէ, որքան ցերեկային տաք ժամերին: Ներկը քայքայվում է նաեւ փողոցի փոշու, ավազի ու մեքենայի անիվների հետ շփման գործընթացից»: Դանիել Դանիելյանի փոխանցմամբ, գծանշումն արվում է երկու շերտով:
Նա նաեւ տեղեկացրել է, որ ներկի մատակարարման 2012թ. մրցույթներում շահել են ներկ արտադրող տեղական երեք ընկերություններ:
Ճանապարհային ոստիկանության պետի տեղակալը հավելել է, որ Երեւան քաղաքում կատարվում է ճանապարհային գծանշումների ամենօրյա աշխատանք. «Երթեւեկությանը չխոչընդոտելու համար աշխատանքները կատարվում են գիշերը, այս գիշեր, օրինակ, գծանշվել են Հալաբյան եւ Աթենքի փողոցները, Կիեւյան կամուրջը»:
Գծանշման ու ներկման աշխատանքներն իրականացնում է «Լուսաշին» պետական ոչ առեւտրային կազմակերպությունը, որի կառավարման լիազորությունները, Դանիել Դանիելյանի փոխանցմամբ, 2009 թ-ից փոխանցվել են Ոստիկանությանը:
Ծանուցումներ
Ծանուցումներ ստանալու համար անհրաժեշտ է մուտք գործել Ձեր հաշիվ։
