Hyundai Motors CIS-ը նոր Santa Fe-ի շնորհանդեսն անցկացրեց Հայաստանում

Նոր սերնդի միջին չափի Hyundai Santa Fe քրոսովերը փոքր-ինչ մեծացել է, դարձել ավելի հավաք եւ լավ հագեցած: Ավտոմեքենան շատ հարմար է մեծ ընտանիքների երկարատեւ ճանապարհորդությունների համար. Ընդարձակ սրահ, մեծ բեռնախցիկ, տնտեսող, բայց հզոր շարժիչ:

Hyundai ընկերության համար Santa Fe քրոսովերը շատ կարեւոր մոդել է: Նախորդ սերունդը իր «դասընկերների» շարքում երրորդն էր Ռուսաստանում: Նոր սերնդի ավտոմեքենայում կորեացիները հաշվի են առել անցյալի սխալները եւ նոր մոդելի հետ կապված ավելի մեծ հաջողություն են ակնկալում ռուսաստանյան շուկայում:

Հատկանշական է, որ ռուսաստանյան Hyundai Motors CIS ընկերությունը որոշեց նոր Santa Fe-ի շնորհանդեսն անցկացնել Հայաստանում: Ինչպես հաղորդում է bfm.ru հեղինակավոր ռուսաստանյան կայքը, ընկերության այդ որոշումը պայմանավորված է նրանով, որ Հայաստանն առաջին երկիրն է, որը որպես պետական կրոն ընդունել է քրիստոնեությունը: Իսկ ի՞նչ կապ ունի կրոնը: Ամենինչ շատ պարզ է. Santa Fe-ն թարգմանաբար նշանակում է «սուրբ հավատք»:

Նոր Santa Fe-ն մեծացել է: Եվ բանը ոչ միայն մեծացված չափերի մեջ է: Ավտոմեքենան ավելի ավարտուն եւ ժամանակակից է դարձել: Նոր քրոսովերն ավելի տպավորիչ, «տղամարդավարի» է: Ինչպես հաղորդում է bfm.ru-ն, նույնիսկ տաքարյուն հայ ավտոսիրողներն ուշադրություն էին դարձնում ավտոմեքենային եւ լավ կարծիքների արտահայտում Santa Fe-ի մասին: Իսկ դա արդեն ցուցանիշ է, քանի որ Հայաստանում ամենահեղինակավոր ավտոմեքենաներն ամենագնացներն են: «Պատվաբեր են, օրինակ, Mercedes-Benz Gelandewagen-ը , ինչպես նաեւ սպիտակ ու խուլ մգեցված «Նիվա»-ները» - գրում է bfm.ru-ն:

Ներսում Santa Fe-ն նույնպես մեծացել է: Ավելի հարմարավետ են դարձել նստատեղերը, հատկապես հետեւի ուղեւորների համար: Գործիքների վահանակն մշակված է Hyundai-ի ժամանակակից ոճով` սպորտային եւ հարմարավետության տարրերի համադրմամբ:

Նոր Santa Fe-ն մատչելի շարժիչների երկու տարբերակով. 2,4 լիտրանոց բենզինային շարժիչ` 175 ձիաուժ հզորությամբ եւ դիզելային շարժիչ` 2,2 լ ծավալով եւ 197 ձիաուժ հզորությամբ:

Hyundai Santa Fe-ն քրոսովեր է, որն ի սկզբանե նախատեսված որպես առջեւի քարշակային: Ետեւի անիվները միանում են միայն առջեւի անիվների մոտ դժվարությունների դեպքում: Այնուամենայնիվ, կոճակի սեղմամբ կարելի է ավտոմեքենան լիաքարշակ դարձնել: Քարշակը բաշխվելու է 50/50 համամասնությամբ:

Ըստ մասնագետների, Hyundai Santa Fe-ի գլխավոր բացասական կողմը գինն է: Ավտոմեքենան ամենաէժաններից չէ: Բազային, թեկուզեւ արդեն լավ հագեցած տարբերակն արժե մոտ $41 000: Դիզելային մոդիֆիկացիան կարժենա մոտ $46.000, իսկ ֆլագմանային տարբերակը` մոտ $60 000:

Լուսանկարները` Hyundai Motors CIS ընկերության Facebook-ի էջից:

Facebook Odnoklassniki

14939 դիտում